民華餐廳

營業中

休息中

一心見到推介寫食西多，而且仲有傳統點心食，就滿心歡喜黎試黎到民華，當然要叫常餐試下啦，叫左個茄牛通，配多士同腸仔炒蛋，茄牛通同一般既唔同，唔係一味得茄膏，有新鮮蕃茄，牛肉亦都唔韌，多士好厚身，炒蛋亦都炒得好滑，質素比一般常餐高，絕不hea底之後點左份懷舊點心- 鵪鶉蛋燒賣，同一般舊式酒樓味道差唔多，無特別大驚喜接住落黎就係重點啦! 西多士! 依度比較特別，唔係配糖漿，而係配煉奶，多士非常厚身，炸粉一d都唔厚，切開後，可以清晰見到西多士分3層，上下為炸既表面，中間係比較淋身既方包，外脆內軟，配合埋一大塊牛油係西多左上面，邪惡至極點😈由於份量較大，一個人未必食得晒，建議二人share無咁heavy

是日胃口麻麻, 想食D開胃D嘅野~又想食常餐~ 所以決定去民華餐廳食茄牛通~常餐($43) 叫左茄牛通, 腸仔炒蛋配多士~ 田走(姐係阿華田走糖加煉奶), 咁樣飲會滑D嫁!~腸仔好食, 但應該係白烚的~ 冇煎炸過嘅~炒蛋好味! 滑, 又香蛋味!我中意放係多士上面一齊食, 牛油多士香脆, 配左炒蛋嘅香滑, 冇得頂!不過如果有人唔中意咁食, 我見佢可以加$2要多隻醬, 姐係可以加果占/花生醬/煉奶~蕃茄牛肉通粉個蕃茄湯! 真心濃湯來! 完全濃到係實色, 冇半點透明嫁!真係勁蕃茄!!!  而且入面都真係有一舊舊嘅蕃茄肉!牛肉, 我諗有5-6舊~ 好食! 係新鮮牛肉來! 冇用粉"也母"過!

位置：3/ 5餐廳位於旺角通菜街位置黎講都幾好行 大家睇完衫 行完街 可以過黎整個下午茶環境：4 / 5餐廳好多位 外面望落好細但入面係似一間有條理 整齊既茶餐廳落單已經進化到用tablet 落味道：4.5 / 5入得黎10個有9個客都係食一樣野就係蕃茄湯底既通粉我就叫左火腿通 個湯底好有味好開胃 而且好多通粉 最後我飲哂個湯了再黎多士 炒蛋 個炒蛋應該係我目前覺得最好食雞蛋 好滑 好甜 價錢：4.5 / 5價錢方面 我覺得同其他餐廳差唔多唔會話好貴

民華餐廳, 記憶中, 好味嘅有: 糯米雞、熱奶茶、菠蘿包、薑絲豬潤通粉。旺角金魚街附近, 依間算係頭三位。不過同好多餐廳一樣, 可能成本問題、人手又不足, 做下做下就維持唔到水準。今次嚟食冇豬膶, 咁啱我又唔食得牛肉, 所以焗住食叉燒。叉燒通粉嘅叉燒唔好食。炒蛋份量少咗, 味道叫保持到。餐肉薄咗, 因為薄咗所以冇咁好食。多士, 都ok。鳳爪排骨飯, ok。熱奶茶, 水準下降咗。茶味、濃厚度、份量都唔滿意。凍檸茶, 還可以。加油呀！keep 住做返好啲。

西多係唔少人下午茶既必點項目之一但要整得好食亦唔容易因為麵包有時會煎得過油 有時煎後又會變韌 失去香軟既感覺.. 對我黎講一份好既西多 除左外層要煎得香口外內層既麵包更要保持鬆軟而民華餐廳既西多士就做到呢一點♡♡實際上 比起蜜糖或楓糖漿 我更愛以煉奶配西多因為佢既奶香味更香甜可口♡因為即叫即煎 送到黎時仲保持溫度令人急不及待開動西多煎至金黃色  但仍然保持鬆軟 香甜可口而且西多比平時既更厚  應該用左大約4-5塊方包佢既方包並唔係死實類型 相反仍然保留一定既軟度另外 西多送黎時已經切成9大粒 方便客人食用雖然size要一口一粒仍然有d難度西多面頭放左一塊厚厚既凍牛油 同淋左一層薄薄既煉奶 牛油同新鮮煎好既西多士亦起左微妙既化學作用 即時化開為香甜既西多增添左一份咸香味西多底下仲有海量既煉奶 認真慷慨不過我認為可以稍微減少煉奶既份量 令甜度更為適宜因為西多長期浸住太多煉奶不但會過於甜膩 更會令麵包變得濕軟 失去香口既感覺如果能就呢一點改善 相信呢一份一定係100分既西多♡  不過餐廳空間較細 座位之間亦較擁擠而且往往好多人排隊如果想要係到長坐應該就會較困難!

本身諗住到民華餐廳食早餐， 點知遲咗15分鐘去到， 所以變咗做常餐！ 佢哋呢度嘅常餐$43一份，屬於正常價錢。種類都有幾多選擇， 本身我想試佢哋嘅薑絲豬潤通粉， 但係當日冇豬膶，所以我就叫咗薑絲牛肉通粉，一份火腿炒蛋& 香腸炒蛋，加埋牛油多士，配一杯熱咖啡和一杯齋啡。 薑絲牛肉通粉湯底夠清，有小小薑絲嘅香味， 通粉唔會太淋身，牛肉嫩口唔硬配埋火腿香腸炒蛋，還有熱辣辣嘅牛油多士外脆內軟，正！熱咖啡味道香濃，好飲！見到餐牌上還有中式套餐， 盅頭飯或者點心， 下次到來的時候會試下！

茶餐廳文化係香港人精神，無論早中午餐，一杯奶茶，一杯咖啡已經成為香港人的日常。太子嘅通菜街，茶記高手雲集，傳統鋪頭又有，連鎖式集團又有，民華餐廳亦是我慣常幫襯的一間。民華主打厚多士，香脆表面，鬆軟內層，滿滿的牛油，相當有水準。滑滑炒蛋亦係重點，或者是我的咀巴給寵壞了，今次略嫌過火，但味道仍然不俗。可惜的是午餐肉太差勁，睇見都唔想食。叉燒通粉保持水準，小小蜜汁溶解在上湯之內，通粉特別可口。早餐常餐內容是一樣的，常餐多付十元八塊，?避開繁忙時間，座位較為鬆動，吃得也較為自在。

晨早流流想食早餐，日本朋友都話去食麥當勞，但係周圍搵黎搵去見到呢間餐廳有好多人食過都話推介，所以就走咗入嚟。派左一陣隊就入咗去，見到餐牌都係正常嘅通心粉，面，再加正常嘅配搭，都係三十幾$40，覺得幾好。我就叫咗個好似幾多人叫嘅番茄叉燒通心粉，諗住可以飲埋番茄湯可以飽啲哈哈哈。佢嘅叉燒算係瘦叉燒，冇乜肥豬肉，而且份量都好足夠，本身我都擔心會唔會係得幾舊餸之後全部都係通心粉，但係佢嘅份量都算好足所以都算幾滿意。另外佢嘅蕃茄湯底都算係幾濃郁，如果擬$37來講佢都算係性價比同埋值得再次消費嘅餐廳。我見朋友食豬潤都幾好食可能下次會試下！

今日早餐去咗食餐廳快餐，同左同事去左了附近既民華餐廳～呢間民華餐廳都幾大～ 好多人，仲要等位Menu選擇都好多，有埋點心！好似去左飲茶咁，有點心餐同飯食我地叫左常餐，我就係鮮茄叉燒通粉，加配餐肉炒蛋多士😋 仲有野飲送👍🏻 我朋友就鮮茄牛肉麵，都係多士餐肉炒蛋～ 等左10分鐘左右，食物就到，先食多士，好大份，有牛油覆蓋，不過我麻麻地，所以食左半塊，覺得太硬冇食！炒蛋好好味，好似流質蛋咁，餐肉都幾正常 至於茄叉通，鮮茄配通粉一定係絕配～ 叉燒係menu選擇中最好，而且真係好👍🏻👍🏻肉質好軟，一咬就入口 不錯

香港人生活比較忙,民以食為天,所以一有時間我就會搵d平民食堂～民華當然係其中之選,可能我成日係金魚街買野,買次黎到都想搵野食,如果食早餐,多數都會黎呢到,貪佢夠多夠大份,今次又黎到呢到叫常餐～叉燒麵,餐肉炒蛋,多士,熱奶茶,唔該,唔到5分鐘,成個餐大大份送上！多士夾餐肉蛋,麵再加辣椒油,個麵好似愈揚開愈多咁,食極都仲有,你都咪話唔過癮,成個餐食曬可能用20分鐘,再回一回氣,抖一陣,加半茶匙糖,嘆埋杯熱奶茶,填飽肚,美滿既早晨

筆者介紹：人稱「肥佬B」，自2009年加入openrice，一直以openrice用作bookmark餐廳用途。踏入三十之年，心廣體胖嘅我quota遞減，故每逢可以出街食飯定必事前做足功課，以免浪費quota，希望透過寫食評同大家分享飲食心得和介紹我嘅口袋餐廳。作為新界仔嘅我，更與女友相約「每月港島一餐」，有興趣就即刻follow我啦！我其實除左鐘意食邊爐放題之外，我最鐘意就係飲茶同常餐！第一次食民華係大埔，水準高！今晚女友突然話想食蕃茄湯，咁就一定黎民華啦！常餐$43我就覺得有d貴，不過都交足貨！先黎個蕃茄牛米，蕃茄湯裡頭你會搵到蕃茄蓉，湯身杰，足料！牛肉都有8小塊，都ok啦！食常餐我地一定叫餐炒！炒蛋又滑又香！一流！但塊餐肉就麻麻，因為係一早煎定，好乾身！常餐黎到一定係食個多士先，熱辣辣，牛油滲哂入去！正！我就叫左個牛筋腩米，呢度粉麵選擇少，原來係因為呢間鋪無粉麵兩個字，但係個麵都ok喎，牛筋腩好淋又入味，無欺場！加埋辣油不得了！

今朝遲咗食早餐，所以聽朋友講揀咗民華食～ 呢間民華算係幾大，入到去都仲有好多位！不過就座位間得迫左少少同埋衛生情況有待改善🙈因為唔係好多人，所以我哋好快就揀咗個卡位坐！服務員好快就問我地想食啲乜嘢，超級有禮貌～ 我叫咗叉燒米粉加多士火腿炒蛋~ 我覺得好豐富！對於一個女仔來講，真係食到飽好快就黎到，不過唔記得影相先！我放咗蛋同火腿落湯度，諗住一齊食先講多士，非常大份，牛油嘅分布好平均，全覆蓋，真係冇偷工減料！不過如果加煉奶就好味好多！ 至於米粉，都算幾唔錯！唔會覺得好硬！最好食係叉燒，我諗我之後都係叫叉燒多啲炒蛋就滑身同火腿一樣一啖覺得好好味 可能我太肚餓，食得太快，或者幾好味！所以好快就食完，但係對一個女仔來講，真係100%飽

今日好早放break蛇王,同事話佢今朝趕時間無食早餐,叫我陪佢去食野,咁佢就黎左呢間餐廳,叫左個招牌常餐,而我,無理由有得睇,無得食啦,見佢個菠蘿包有火腿又有蛋好似幾正,不如見黎試試喇！就叫左呢個菠蘿包餐！一黎到見到個菠蘿包成座山咁高哈哈,我同同事都哇左一聲,蛋炒得幾嫩,菠蘿包都係脆皮既,食一啖好容易跌晒d菠蘿包碎出黎,個包又要咁大咁高,真係好難顧及儀態呀哈哈,火腿相對上有d凍,同成個包好似有少少違和感,配埋野飲大概$30,這個early lunch還可以

今日諗住嘆個light嘅下午茶，但係周圍都好大份嘅下午茶套餐，咁啱見到太子民華呢度有小食叫，所以就行咗入嚟~位置都幾多，唔會太迫，所以嘆下午茶來講都幾舒服，我叫咗奶油多，再加煉奶本人好鍾意食煉奶，所以就叫左，嘆埋凍檸茶其實呢個份量啱啱好食下午茶，又唔會太飽冇得食晚餐🤣等咗大概5分鐘左右，就有得食，見唔到份奶油多都幾厚好似好抵咁！揭開，見到好足料，落咗好多牛油同煉奶😍感覺超級值！味道超好，我覺得如果淨係牛油多士嘅話就比較單調，但係加咗煉奶，仲要係暖暖地嘅狀態上，特別好食！淡淡都係甜味

早幾日夜晚同朋友打完波，打完波都有D肚餓，一行幾個人就決定搵反間茶記食下個宵夜。 十一點幾黎到民華，雖然好大間，但仲係坐滿人！真係好誇張，不過好彩等左一陣就有位了。 民華其實好多都好出名，點心係，常餐都係，而且我覺得民華既蕃茄牛肉通係比較出色既，所以我就叫左個常餐，43蚊。 蕃茄牛肉通個湯底好有蕃茄味，而且仲有一粒粒蕃茄係入面，都幾足料，而且通粉唔會太淋，size 幾好，因為我覺得太大粒既通粒反而無咁好食。常餐仲有炒蛋、餐肉同埋多士。 雖然天氣熱，但我仍然點熱奶茶，因為依度既熱奶茶都好飲。