東記上海麵

營業中

休息中

東記同對面既世記聽聞係兩兄弟黎，兩件都係賣一樣既野，都係出名食炸豬扒同雞翼，有咩唔同我就唔清楚la。住大埔既應該點都聽過或者食過佢地既炸豬扒，聽聞連發哥都好鍾意幫襯佢地。本身都諗緊試東記好定試世記好，始終兩件都好多人話好食，不過我去果日世記冇開，咁我就唔洗揀lu直接去東記😂  1️⃣豬扒雞翼麵（$40）自己就揀左上海麵，平時鍾意食米線河粉多啲，但係見呢間既上海粗麵好似幾特別咁，同埋好似見其他人都係食粗麵，咁我又試下。麵質呢就真係偏淋，冇乜咬口，我諗我都係鍾意米線多啲😬而個麵既湯底，可以話係冇乜味，不過清清地，配個炸豬扒同埋炸雞翼食都唔錯。我見佢枱面有罐醬，唔知係咩醬黎，應該係蒜蓉辣椒醬，我諗住個麵冇乜味就加啲落去試下，有驚喜wor！個醬偏辣既，唔食得辣既就唔好試la，但係佢既蒜味好香，加埋落個面到，辣辣地，又多啲蒜香味，好正！  碟炸豬扒同雞翼黎到既時候我真係嚇左嚇，真係好大碟😳豬扒同雞翼炸到金黃色，層炸衣好薄好脆。雞翼好大隻，食落唔會好乾，入面仲保留住啲肉汁。豬扒就好大塊好厚身，亦都夠鬆軟，調味唔算好重好鹹，啱啱好，不過多到好似有5定6件，食到勁飽。覺得呢度既豬扒又冇話好好食好驚艷咁，不

人好多，邊個霸緊邊張枱，無人知，員工完全唔會幫你。🙄在遙遠的粉麵店搵到位坐，員工話太遠，被迫買外賣，要加2元。仲話要等9個字。不過見到廚房已經炸咗一大盤喺度。😑最後等咗大概4個字就有。叫咗個雞翼拼豬扒河粉，河粉唔夠滑，湯無味。雞翼無以前咁入味，豬扒勁鞋，記得之前食過係鬆軟又入味，先想再幫襯，現在大不如前。唔會再嚟幫襯，人又多，員工又唔好服務質素，食物大退步。😵雖然好出名，成個街市最多人的店舖係佢，但咁嘅服務同食物質素，真係好失望，希望佢改善下。

好耐無去過大埔熟食市場食哩間馳名中外既麵店, 諗住避過個LUNCH TIME, 2點半到應該無咁多人喇卦疫情之下, 員工緊守4人一枱既守則, 就算等位唔食野住, 都唔會比你坐5個人, 非常值得讚賞, 雖然都要等大概15分鐘人多既情況下, 舖頭同隔離店一齊聯營左, 只要幫襯隔離店, 至少叫杯野飲, 就可以坐佢地既枱, 食隔離既麵, 正好東記係無水吧既, 真係和諧既小店就快有位既時候, 店員可以幫手落左ORDER先, 招牌食品一定係豬扒粗麵同雞翼粗翼啦, 佢仲可以配埋炸菜或者雪菜既, 不過店員冇提竹筍, 可能有D人唔太喜歡個陣味, 所以我都唔記得左叫豬扒同雞翼炸得好通透, 入面完全唔會生, 不過豬扒外面既炸粉就略嫌多左少少. 粗麵黎講, 其實有D似長既狗仔粉, 好窩心地仲比左2個辣汁, 辣得黎唔會太搶味, 配埋炸菜既脆口, 同麵質形成強烈對比, 不過菜就苦左少少, 所以暫時夾開先, 不過食到最後, 真係飽到都食唔落D菜添

朋友帶我去搵食去到都多人 要等一等位好多街坊食個個都叫豬扒 雞翼侍應姐姐推介 雙拼叫咗 炸醬豬扒粗麵 炸醬雞翼粗麵份量都幾多 見好多女性朋友都食唔晒 豬扒 脆卜卜 都唔薄 好夠味雞翼 好夠味 唔老 食落仲有啲滑上海粗麵 正常水準 有少少似烏冬的口感 炸醬 都幾辣 肉粒好好食😋唔食得辣嘅朋友可以叫雪菜覺得辣可以叫飲品 係隔離間野城仔記(搜尋唔到)仲叫左個奶油豬好多奶 又脆卜卜 正價錢來講性價比都幾高

Search大埔美食，個個首推這間在大埔墟街市二樓的雞扒麵，東哥世記兩間都出名。今日復活節連假慕名而來到東記，整個街市都是覓食之人。要自己搵位，站在其他食客旁等人食完才有得食的感覺，好耐好耐未試過... 😅 人多到的情况可以用混亂來形容，店員大聲嚷嚷，某些食客又食得勞氣，整個環境絕不可用舒適來形容。前一枱客，點了菜，等到不耐煩，一氣之下就走了😅 又見有食客食錯其他食客order的麵，未食已覺亂到我們坐下，身邊就立即圍上了等位的客人，未開始食已有被催促的感覺。下單到食物上枱大概等了三十分鐘。🌈雞翼雲吞幼麵 $40 雲吞好食但冇驚喜，雞翼炸得香口偏乾身 不夠肉汁麵的份量不少 整碗麵中規中矩🌈豬扒雞翼粗麵 $40以為剛剛的雞翼乾身這豬扒更乾 咬開裡面豬肉肉質缺水般 失望 出名的粗麵太腍身未食的碗碟就堆在一旁，邊食邊嗅到食物殘餘物的氣味😅 獨特的體驗試過一次冇下次🙈

大埔墟街市熟食中心又一間極度人氣嘅麵店，好耐無食，突然間好想好想食😅。上到去當然係一定要等位，售賣嘅主打🍜上海麵食，同幾款人氣食物，當然一次過試晒佢啦‼️☺️———————————————————————————🍜雞翼雲吞粗麵 $40💬酥炸嘅雞翼四隻，超大又多肉汁，味道剛剛好，配埋熱湯同菜肉雲吞，一剛一柔唔會太熱氣😌.🍜豬扒炸醬粗麵 $40💬想刺激啲嘅朋友可以試試炸醬，有菜粒同肉碎，帶點辣味令湯底無咁寡，當然配埋鎮店豬扒，一大塊切開四件，任何餸料都係咁重份量，胃口細啲都一定食唔晒😅

今日嚟到大埔食上海野呢間位於喺大埔街市嘅上海野喺大埔火車站行大概10分鐘就到呢度有一間叫東記一間叫世記聽講佢哋有親戚關係我自己就覺得東記好食啲每次一定會嗌炸雞翼米線其實我冇試過豬扒㗎不過好多人都推介我自己本身係好鍾意食雞翼所以次次黎到都淨係食雞翼 如果叫埋豬扒就實在太飽啦而且東記啲辣椒油係好食啲雞翼外脆入邊啲肉好滑 次次食都係熱辣辣佢啲竹筍都好好味 如果你要叫嘢飲就要嗌隔離舖頭嘅嘢飲啦一個麵40蚊有找 超抵食而且次次去到都要等位㗎 唔想等嘅朋友就早啲去食啦❤️❤️❤️❤️

住得大埔或者入得大埔食晏既朋友都應該對呢個名唔陌生,每逢星期六日必定大排長龍既食店.今日早左起身就過去食左碗雞翼米線加炸醬(本人因為唔算太中意粗麵個口感較淋身所以每次都係米線)雞翼有4隻大大隻,醃制恰到好處唔會偏咸炸粉亦唔會多,炸到金黃色外脆內軟.啖啖都有肉汁.另外值得一提係佢地個炸醬同出面食到既完全唔同,有一粒粒既芹菜係裡面令到更加有口感非常爽口,配埋米線真係無得頂.

今逢星期六日都會迫滿大埔，為左避開入大埔踩單車友，早午餐食左個炸豬扒＋雲吞兩粒＋粗麵$40，沒有包飲品的。份量足夠食，豬扒大大件，兩個人一齊share岩岩好，炸粉唔厚，肉質鬆軟，唔會炸到太乾身，不過好油有自家制辣椒油，不過唔辣......是上海鋪的粗麵咁既價錢唔要求得咁多，可以粗粗地再食

🐽大埔街市名物，好似我地咁星期六日去，係會坐爆哂人😳坐左隔離檔既枱就要幫襯杯野飲，落完order至少等半個鐘先有得你食😗。👅炸菜/雪菜肉絲粗麵+雞翼/豬扒（$34）炸豬扒同雞翼都炸得香脆，炸得薄薄地一層唔會cham口，而且幾大份，但好大個敗筆位係好油🙁豬扒都鬆軟同有肉汁但較薄身，係好食但絕對有更多店都炸到呢個水準，我食過更正既酥炸豬扒🤨唯一可以讚既係碗麵有超多炸菜同雪菜，上海麵偏軟身食起黎有啲似特惠牌烏冬😂😂。🐽唔值得為佢等咁耐🙂

響梧桐寨行完山太肚餓，去左大埔墟市政大樓快食😋再回家。2：30左右到，選左東記上海麵。座位太少，隔離係間茶檔，買野飲就可以坐低食哂2檔食物。本來諗住叫野飲，但茶檔姐姐建議叫下午茶更抵😜，於是叫左西多士餐(29蚊)凍同奶油豬餐(26蚊)凍奶茶茶味good喎❤️西多士配甜奶，熱辣辣😋響東記叫左2款粗麵，雙併(40蚊)可以選炸豬排/炸雞翼+另1款配料，我地要左菜肉餃同肉絲。呢度既炸豬排同雞翼真係好好味❤️，吾油膩👍，脆pok pok! 食食吓個脆豬油都黎埋，貪心根本食吾哂🤣，友善茶檔姐姐立即俾個袋我地打包回家。叫到成枱野都係135蚊😆，草根食物又好味又飽肚👍食完立即噴酒精揉手快閃😊

在二人限聚令下，街市熟食檔枱有限，而每張枱只可以坐得兩個人，一個人嘅我不如買外賣返屋企，唔好阻住人做生意。今日雖然係除夕，但好多人都仲要返工，所以冇人龍之下可以買到每日限量牛筋，真係執返個尾彩。街市裏面有兩檔豬扒麵，其實係兩兄弟，但我自己就比較喜歡食東記，尤其係佢嘅牛筋，炆得好入味又夠林，仲要每日得嗰少少有得賣，食唔食到都係睇你嘅彩數。今日買到牛筋豬扒麵，其實不論堂食或者外賣份量都係好大，如果早餐係食呢碗麵，一定可以頂到去下午茶時間，豬扒味道夠入味，拎回家食仲係熱的，加上炸到脆脆炸漿，難怪有時會見到有D叔父帶定枝酒去嘆豬扒。

今日無外出所以留在家，就去左大埔市政出名既東記上海麵買外賣回家吃。可能堂食位置少了，多左很多人買外賣，人龍都好長，但很流暢，落單很快就能拿到外賣，員工手腳超快，抵讚。我們點了， 雞翼雲吞粗麵和豬扒雲吞粗麵$40 外賣加兩元)，牛腩牛根永遠都係無既。我就覺得雞翼最正，有4只雞翼，炸得好香脆，必食。豬扒我就覺得瘦左啲，比較乾，不過都很好味。上海粗麵好好食，有咬口，雲吞就大大粒有四粒，雙拼無得輸，還有配的辣椒油，很香很好味。

大埔新街市食炸豬扒麵得兩間，都係喺同一層，分別就係呢間同埋世記。 平時呢我就食開世記嘅，咁今次呢就試吓呢一間（竟然係第一次食呢間）點左一份雪菜米線加炸豬扒🤤我印象中覺得個面碗啦好似大d，食麵就會方便啲多啲位，米線同雪菜都冇乜特別。至於主角炸豬扒我自己就覺得 另一間好食啲🤭 可能咁啱佢比我嗰份係肥d, 油比較多少少咁不過總括而言呢我都係會推介嘅因為都係得呢兩間可以食，而且我強烈建議係要堂食，因為外賣呢拎到返屋企可能會林咗少少但係溫馨提示呢如果大家喺weekend過嚟呢要預留多少少時間等位同埋等煮麵， 可能繁忙時間要等一個鐘都唔出奇

大埔墟街市名物🤤馳名嘅炸豬扒，係熟食中心個層。東記同世記兩間好似係兩兄弟店，唔知係唔係特登分開時間營業，第一次去食就世記開，東記唔開，第二次去就東記開，世記唔開🤣兩間炸豬扒都好出色，炸粉唔厚，好香脆，肉質嫩滑有彈性。份量仲要好多，起碼有成一塊半嘅大豬扒份量，食極都仲有🤣🤤食咁多舊都唔會覺得好熱氣好肥膩。今次揀咗上海粗麵，麵質好彈牙，仲配有兩條菜心🤣湯底清淡，完美中和返。檔口係無售飲品嘅，可以係隔離嘅舖頭叫。