有間茶記响附近

營業中

休息中

應該係我呢排冇食神定宜家啲商家無良⋯見附近開左間新茶餐廳唸著試吓啦。午餐$48係同區差唔多啦。安全起見點紅酒燴牛尾標準嘢應該都問題唔大喇掛！見佢掃碼落單有少份量唸著都係少飯啦！點知少佢就少餸喔！睇吓張相？三舊牛尾？唔係，嚴格黎講係兩舊半（實際大小比我張相細好多）！後來我睇清楚啲⋯飯係係下面果欄，得標準一個選項！可以話係我大意⋯但真係第一次體會到原來可以咁！人地少飯佢少餸！三舊仲咁細不如唔放牛尾齋汁吖？又唔見你汁少份量？算！再睇第二張杯紅豆冰⋯忌廉幾咁雄偉？我好似係點紅豆冰唔係忌廉紅豆冰喔⋯清左啲忌廉同冰⋯哇！厲害！得半杯。唔洗咁嘛？附近都係中學小學多⋯係咪唔好咁呃啲小朋友呢？

呢篇應該係呢間茶記嘅第一篇食評就等我嚟介紹下今日行到攰攰地撞手神嚟到呢間食啲嘢時間約2點佢哋嘅茶餐時間開始供應係2：30剩低午餐、常餐、特餐或即做粉麵飯可選擇於是我揀咗午餐雖然剩低選擇少只能三選一但絕對係高質蓮藕燜腩仔配上熱奶茶茶質夠香夠濃雖然未算係最滑但絕對唔嚡口配上咖啡糖感覺確一流米飯軟硬適度夠而且粒粒好分明好耐未食過咁高質嘅米飯蓮藕用上南乳及八角燜腩仔增加味道層次感而且腩肉肥瘦均勻蓮藕亦燜得好鬼腍咁嘅質素午餐只收$48好多地區都食唔到呢間明顯係新開餐具非常之新乾員工做嘢唔熟手要主管提示點做嘢QR code亦壞咗要用人手去落單午餐餐牌只靠螢幕來顯示並無紙張印本放檯面雖然要改進地方確唔少但絕對值得畀機會再試

附近開左間新茶記, 叫”有間茶記响附近”, 見個名得得意意幾搞笑咁, 就過來試下!!茶記黎講佢都算闊落, 都坐得舒服! 食物黎講都係普通茶記食物, 有D午餐、常餐、特餐等… 價錢都算合理唔貴, 都係大約4X-6X左右, 同事叫左是日午餐, 大約$48, 我就叫左特餐"蕃茄排骨湯米粉配火腿煎蛋及雞扒"($47)試下!一開始上左個蕃茄排骨湯米粉先, 都幾大碗! 蕃茄味夠濃, 排骨略嫌有D少, 但食落D肉夠淋, 米粉煮得幾好, 有少少似新竹米粉的質感, 少少Q彈之後黎左個雞扒同火腿煎蛋, 份量好滿足!! 雞扒應該係有煎炸過, 外皮少少酥脆, 肉質正常。煎蛋好有誠意, 係流心蛋來的。整體黎講算幾好, 呢個份量對比價位, 應該無投訴的。服務就正正常常, 暫時食飯的時候都無遇到西員工。