曾記粿品

營業中

休息中

早前和辣椒女兩個去<亭記>食，當然順便叫多幾件粿品試試啦！一問之下，原來最少叫三個才煎，我們便叫做了韭菜粿、芋頭粿和筍粿。韭菜粿- 韭菜好新鮮，好好味，但就比較油，令感覺唔多好。芋頭粿- 芋頭味比較淡，又乾身，感覺麻麻地。筍粿- 我對筍唔多喜歡，但辣椒女就話唔錯。說真的，我覺得這裡都唔錯，如來這裡食又順便叫來食，都可以的。

今日特登去左上環試左蘿白/豆沙/黑桃~雖然煎"稞"係油膩~不過勝在香口,唔係成日食的話有乜所謂丫!至於味道:咸甜各出色~蘿白稞:一條條蘿白絲,好香~豆沙稞:本來想芋泥,但係買曬~不過原來豆沙都好好食架wo~唔太甜又香紅豆味!黑桃稞:好好食~因為綠豆蓉係我至愛~下次食埋煎糕粿至得~

第一次接觸糕粿, 是在旺角豉油街的"潮洲巷仔"內的炒糕粿, 除了中式糖水外, 很少接觸中式甜食, 感覺很新鮮, 入口沒有年榚那樣"痴口", 又炒得很香, 感覺很好.那時連個"粿"字都不敢肯定怎樣讀, 問了收銀姐姐才敢肯定.可以好景不常, 帶了一個有食肆煞星的朋友去品嘗, 不久間舖頭就沒有了, 亦再沒有再試過榚粿.一別年多, 來到皇后街熟食中心又再試到了.今次叫了一碟煎糕粿, 另外一份咸的糯米品, 一個甜的芋泥味. 煎糕粿加了蛋及葱段一同炒, 很香口, 入口很滑溜. 不過個人覺得略甜, 但只是個人口味而矣.糯米糕粿亦很香口, 芋泥則有點像年糕, 食了半個已有點膩. 兩者味道都相當不俗.不過聽隔離舖講, 佢地最高峰期已過, 以前仲好食. 信不信由你.平日少食潮汕小食, 所以覺得很特別, 加上價錢相當經濟, 煎糕粿細碟15 元, 大碟25 元. 另外其他蒸粿亦只是3 元. 絕對抵食.

潮州巷重現皇后街熟食市場，在眾食店中，較具代表性的有陳春記、陳勤記、亭記及曾記四間。自己一個都來過幾次，但因為每次只吃得一、兩間，份量少又不夠過癮，已話過來找次搞次多些人的。乘大家都有點興趣，就搞個午市小聚，想不到吊腳的地方，都有八位食友出席，終於可以一次過試勻四間。之前也吃過這裡的鹹糕粿，今次仗著人多，就叫碟炒糕粿。糕粿用上甜醬、韮菜去炒，再加蛋，味道甜甜地，幾似炒蘿蔔糕的味道。略嫌炒得「立口」了一點，不夠香口。亦買來幾個鹹甜糕粿，多得kkkkkkkkkkk兄推介，甜的怕過油，不用煎；鹹的煎了上檯，更合味道，吃後果然是沒介紹錯。現在吃的又比之前吃過的軟熟，有進步；牛油果還買走了幾個返辦公室慢慢吃呢，而她亦分享了其中一個綠豆蓉的，大家吃過也如花花的評語，是「好好食」。炒糕粿廿蚊一碟，鹹甜糕粿就3蚊一個，都算幾經濟。來得這裡吃，也要叫兩個的，值得推介。

久聞呢度O既粿品好有水準，今次同食友們黎皇后街熟食中心掃勻幾個潮州檔，當然唔少得曾記啦！即場試左蘿蔔粿、韮菜粿同芋泥粿，幾款都係煎O既，少少油就在所難免。粿底O既腐竹煎得微脆，粿皮煙韌富米香，兩款鹹粿饀味道都不俗，芋泥餡更係高水準之作，綿軟得黎唔會太甜，好味！個人認為米糕類O既外皮都係配甜餡最好，其後亦外賣左芋泥粿同另外兩種甜粿─綠豆茸同黑桃。前者味道都唔錯，但就比較甜，而且餡O既份量相當多，不太嗜甜O既我就冇咁鍾意呢款。黑桃係最好味O既一款，個名應該係從外形而來，芝麻皮搓成扁扁O既桃形，內餡係綠豆茸。個芝麻味好香芝麻味，綠豆餡O既比例亦恰到好處，絕對係上住之作！一件粿只係三元，真係抵到爛！

好好味呀....個9 菜粿,一連食左2個呀....哈哈

約左友人7點到蓮香樓食晚飯,見仲有空檔,於是走上去街市買茶粿食,全部都系$3個,眼見面前有既每款要左一個,有芋泥(甜),綠豆蓉(甜),花生條,韭菜,糯米,蘿蔔,芋頭.甜果2款吾洗煎都好正,好煙韌!而咸既粿,除左花生條較差外,其餘既都有反咁上下水準!老闆親切有禮,$3 個,實屬超值!

20050123 8.30pm本來我係走上o黎諗住食陳勤記, 點知無開,見呢度未收, 一場o黎到, 買個粿先走.又, 本來係想食蘿蔔粿, 阿伯伯話賣晒, 得返甜o既, 要o左個芋泥粿($3), 拎走, 芋泥不算太甜. 味道一般,不過因為唔熱, 有o的影響, 我諗熱食會開心o的.另外有季節限定筍粿好吸引!~我咁夜先o黎幫襯, 無論比咸/笑面都好似唔太fair, 所以係索性唔比o既.

上期飲食男女介紹呢間粿品係05 必吃, 而且openrice 對上兩個食評都係褒o既, 所以有日lunch time就特登老遠由金鐘過黎, 買個粿孝敬愛吃粿o既媽咪. 點知我盲摸摸, 摸錯左去上環街市, 好彩抄低左曾記o既電話, 至知道係o係帝后華庭對面o既熟食中心. 雖然老遠黎到, 但係都唔敢咁衝動一次買太多, 只係外賣左個芋頭粿同黑桃粿試一試佢先. (但係我隔離個師奶一買就買左20個!!!大客仔呀!)夜晚帶住戰利品返到屋企, 媽咪即刻蒸返熱個芋頭粿黎食. 個芋頭粿裡頭係芋頭切片, 芋頭味好香, 粿皮同餡都好有水準! 下次再去時可以買多幾款試下!

前幾日，本人睇完雜誌，決定同女朋友搭車由新界出試，好彩都無令本人失望。一坐低就叫左菜粿，蘿蔔粿，糯米粿同埋芋頭粿，樣樣都試，結果係出乎意料，真係好好食，本人之前都食過類似既潮州粿，不過都係呢間最好食，但係就多左少少油，無辦法啦，如果唔煎就無咁香口。之後仲叫左碟抄糕粿，粿雜同埋煎蠔餅，粿雜ｄ粉皮好煙韌，而抄糕粿就有ｄ似抄年糕，不過就比抄年糕'林'ｄ，煎蠔餅比起廟街個ｄ無咁油膩。食完後都好飽，不過都買左ｄ返屋企俾阿媽試下，就連阿媽都話要搭車出去試。一句講晒，好食！

是朋友說這裡開了幾間特色的舖頭，有質焚化爐兄吃過的陳勤記，亦有豬什湯及好多款糕粿，見今日下晝有空閒，就自己一個來試試。呢度係街市附設的熟食市場，擺設就如日式百貨公司底層food court一模一樣。選心水的食物，去舖頭落單就搵位坐，阿姐就會送食物來兼收埋錢。陳勤記成日吃，反而豬什湯好少見，就要了個淨豬什湯。見賣糕粿果邊又埋滿人，又去要了兩件煎粿。呢度的糕粿有好多款，分鹹的及甜的，鹹的有蘿蔔、菜、芋頭、花生等等，甜的有綠豆蓉、芋泥等。第一次吃就要了兩個鹹的，分別是蘿蔔及菜。雖然不是即叫即有，但都比豬什湯早到，熱辣辣的兩件，賣相不錯，唯獨是多油了一點，沾滿了碟底。但沒有辦法，用粘米粉整的，不下油是不好煎也。兩隻也熱辣辣，表皮微脆，入面較軟，但口感略嫌鬆散，如果可以煙韌一點就更佳。個人而言，是蘿蔔餡好吃過菜餡。亦是有款炒雜粿，是用醬油及蛋炒糕粿，賣相唔錯，下次要試這個。埋單6蚊2個，連豬雜湯米就21蚊，吃得飽飽的，幾抵食。