春秋坊排骨麵 (已結業)

剛巧在附近經過，見這間舖頭分別將清湯腩及排骨麵放在招牌上，兩者也是我所喜的食物，就進來一試。進舖時見一大舊牛腩架在廚架上，乾乾的，賣相十分差，穩陣計，還是先試排骨麵。一碗都加一碟炸豬扒，賣相也是十分的一般。先吃豬扒，薄薄的，炸得還算鬆脆，小店製作，算啦；麵是白色粗身的北方麵，對辦。但卻淥得腍了一點，湯底也當然是味精湯底，可以理解。可能是新張關係，也有點亂子，遲一點應會上軌道。排骨麵20蚊，不包飲品，幾便宜，但食物質數要再好一點就更好。

該店最近改了名，名為「春秋坊」，又另加了清湯腩，見肥嬸嬸日間仍在店內，估計只是易名，沒有易手。我和老婆作為肥嬸嬸的fans，不時都有幫襯。但最近老婆話，有一次買排骨粗炒外賣，晚上不是由肥嬸嬸處理，味道又麻麻，排骨和麵一起放，攞到返屋企已淋晒，而且份量少得可憐，一個小女人都唔夠食。我唔信邪，是晚再去外賣。去到果然不見肥嬸嬸，見店內只有小貓三兩隻，要了排骨飯，連豆漿都係$21，算平。今次的排骨用紙袋另載，不易變淋，排骨也是熱的，味道還可以，但應該是翻炸過，而且是切件後才翻炸，結果變得乾身，失去了肉汁。飯加了牛腩汁，但味道不濃。最大的問題是份量太少，飯盒只有半滿滿，排骨也不多，與以往大件夾抵食的作風相差很遠。這晚不太餓，但吃了整盒飯才僅僅夠飽。未知是否百物騰貴，他們又不想加價，才減少份量。但份量和水準一同下跌，難免令我有d失望。

估物論之前的non-members所講的是真是假,這裡的排骨真的不錯. 金祥的一早己經唔得啦! 只是菜飯比較油. 可以一試!

由上環源電車遊蕩到西環, 隔條馬路望到"排骨麵"三個字, 猶豫半下, 便橫過馬路過去(目及過冇差佬)行到門口, 有個靚女好熱情招呼我入去，店不大, 人不多, 算是光猛企理主旨︰點了排骨菜飯套餐——豬扒不錯, 算是香酥型, 脆脆地, 但唔太硬, 火侯唔錯, 只嫌可以醃得入味一點。我是愛味淡的人，但此點要改進我最欣賞係個菜飯, 菜粒好多, 飯又好味(雖然明知係味精飯)，吃著吃著, 差點吃到店家不用洗碗(我飯量不大)還有一杯豆漿附近，找數到廿二大洋備註︰絕對有下次

原本都無諗過入去食, 見到門口有d 相, 又幾好食咁, 咁就入左去, 個時我叫左個上海粗炒食,仲有野飲送都係$22 元, 仲有出面d 相同出來的食物真係一樣咁多同好食,真的值得推介....仲有一部勁大的電視睇..都幾好...

我係西營盆附近返工，前兩天原本到他們隔離的茶餐廳等位，但未有位，此時就見到這間舖位，門口有位有禮貌職員招攬我們入內品嚐一下上海小食。於是我們4人就試了。好耐無幫襯此舖是因為以前舊有的食肆實在麻麻，又唔知原來已轉了老闆好耐。轉了新老闆，我們就試一試啦。4人坐下，點了1) 排骨牛展湯麵、2) 排骨上海粗炒3) 番茄排骨飯後，我同事都讚好食，上海排骨其實係炸豬扖砍件上。排骨夠熱夠脆而不乾身。好味! 炒麵亦有口感不太油膩。牛展掩得幾好，不像雪藏般有雪味。唯獨是套餐為$22包飲品，但比較差的飲品銀菊露，味好淡，好似飲水一樣。座位就不太寬闊。總括來說，值得推介!!!

幾年來一向鍾情西環的金祥排骨麵，但自從幾年前太子女在水街開了新舖，加了幾款新食品，德輔道西的舊舖生意便每況愈下，但我仍是喜歡舊舖的大件夾抵食，最記得佢地個肥嬸嬸，朝朝早返工時，都見佢在店內切菜，一路做到晚上收舖。但前排行過見到舊舖摺埋，心情簡直跌到落谷底。話說某日同老婆行過這裏，見到金祥舊舖的肥嬸嬸，莫非嬸嬸另起爐灶？二話不說就入去試下：排骨粗炒：送菊花茶或豆漿。老實說，這裏的粗炒絕對金祥舊舖的家庭式風味，鑊氣不及大排檔和茶餐廳，因為他們用的是家用石油氣爐，炒出來也有一點鑊屎，但麵仍是熱騰騰的，就是這種家庭風味吸引我，炸豬排是以往一貫的厚身，外脆內嫰，唯一可惜的是不夠熱。以前吃過剛炸起的豬排，真係好食到不得了。菜膽竹笙雲吞麵：保持一貫水準，湯底味不濃，很清，有四棵白菜仔，三粒菜肉雲吞，五塊竹笙，加點冬菜和蔥，仲想點？雲吞包得很實，肉內夾著一點點冬菜和白菜，口感一流。麵的份量較金祥舊舖少，但無所謂啦，對我們來說是剛剛好(以前實在太多)。菊花茶：很大杯，但很淡，下次不如飲豆漿好過。以前d感覺返晒黎啦。