旺記點心餐廳 (已結業)

同事成日都話要黎食雞煲，但自從轉了工作地點真係好少入粉嶺，襯住聽日端午節放假，今晚就入一入黎吧。去了祥華邨的旺記，晏晝食過幾次，夜晚就未試過。是晚跑馬，店內有兩部大電視嘅關係，全場坐滿馬迷。老闆好好人呢，齋坐不食，仲可以涼冷氣睇直播，拎住叠報紙同周圍同僚吹水討論，現場氣氛熱鬧。先開壺普洱飲下，茶味一般啦，勝在老闆眼利，一拎起個滾水壺就知我地想加水，傾下偈食下野，前前後後飲左五、六壺水，呵呵。落完單即刻送上一大壺湯，是晚係蓮藕紅蘿蔔豬骨雞腳湯，湯頭又甜又濃，好好味。同事講左n次要食嘅雞煲無理由唔點㗎，先黎重慶雞煲半隻，要全熟就會好似小菜咁上碟，半隻雞都幾多喎。雞肉紮實有口感，但唔係件件雞都入味，不過個醬汁又真係幾正，辣中帶鮮味，唔係一味死辣喎，越食越過引，連配菜嘅青椒洋蔥都食哂，吸左個辣醬太正了。第一次唔係用打邊爐嘅方式食雞煲，咁食都幾好喎，唔怕個身一陣雞煲味。再黎係街頭炸蠔餅，哈哈，想食好耐啦，終於搵到人陪我食。大大份香噴噴，超猛火炸到卜卜脆，蠔仔鮮嫩多汁，雖然炸得脆口但一啲都唔乾，最正係多芫荽，勁香芫荽味呀，正～埋單淨係收左雞煲＄148同蠔餅＄78嘅錢，免茶免加一，仲任坐唔嬲，抵到爛

同同事出黎食lunch，因為同學生一齊放飯，基本上附近餐廳全部一位難求，左逛右逛最後黎左旺記，印象中三四年前黎食過點心蠔仔湯飯（$38）初到貴景，唔知有咩好食，見是日午餐有寫呢樣就食佢啦，蠔仔湯飯大大碗熱辣辣，上枱感覺唔錯。蠔仔很多很鮮味，細細粒但都好肥美，湯頭清甜，芫荽下得夠多好香，加上飯軟硬適中，好味喎涼瓜菜莆蛋角飯（$48）同事因為初一要食素，叫左呢款蛋飯，大大塊蛋角即煎的，好香口又無煎過老身，涼瓜好爽口不苦，菜莆鹹鹹地幾正，好耐無食過有傳統味道嘅茶仔啦。飯餐不包飲品，可以開壺茶嘆下嘅，不過lunch咁趕就費事了。環境迫啲，但食物幾好味，有下次