影片
以上資料只供參考, 請與餐廳確認詳情
招牌菜
「愛家，愛便當」位於觀塘鴻圖道76號聯運工業大廈地下，觀塘站 B2 出口沿著開源道行幾個街口就搵到，連我係路痴都冇難度。👍🏼工厦嘅食肆唔係冇去過，開喺地下嘅就少啲，可能因為响地下啲燈光有啲陰暗，變相覺得好唔吸引，心諗會唔會好伏呢？😬其實一心想試蔬菜壽司，但老闆娘（亦係廚師，好後生，好似細過我，anyway 要細過我好易 🤣）話冇預訂即刻整會好耐。最終點咗咖喱薯餅米治，配餸（選三款）就揀咗柚子味白蘿蔔，金平牛蒡，同今日廚師推介的腐皮卷。成個套餐 $78。 😊由於唔收八達通我又唔想比現金，用 Alipay 搞咗好耐都唔得因為入面電話訊號麻麻，好彩老闆娘提我可以連佢哋 WiFi 。另外佢哋都收 PayMe。💲即叫即整所以要等吓。嚟到見到個便當好精緻，不枉我特登嚟食。試吓個湯先，初初以為係麵豉湯，原來有西芹，薯仔，蕃茄，好清新又好消暑呀。😛再試吓啲配餸，柚子蘿蔔真係超級正，估唔到加咗柚子汁可以令個白蘿蔔提升咗咁多。金平牛蒡都好食嘅，但就有啲相形見絀。老闆娘話日式泡菜都好好食喎，下次要試吓。😋腐皮卷初初諗會唔會叫錯呢？因為好似好中式喎，唔 match 個便當。點知一食覺得都唔會喎，因為只係輕輕煎過，所以冇中式咁油膩，亦唔熱氣。呢個都好驚喜呀，好食程度僅次於柚子蘿蔔。🤩至於米治其實係沖繩飯糰，即係飯丸屋果隻呢。個膽係新餐肉，蕃茄，蛋同生菜，我叫嘅咖喱薯餅米治，顧名思義就加多塊咖喱薯餅啦。🥔我自己就覺得米治好食過飯丸屋好多，賣相好靚又好味，同埋佢份量好大，食哂好似食咗成盒飯咁，我本來有諗叫小食好彩冇，因為食哂個米治已經飽到食唔到其他嘢。😅不過要注意佢米治個牌寫 100% vegan，咁因為有蛋固然唔係啦，同埋佢部份款式有芝士。🧀臨走問下老闆娘係咪有學過整日本嘢食，原來冇係自己試，我覺得好犀利。同埋呢度原本唔係全素食，係開咗冇耐就改，所以餐牌上嘅肉食選項都被刪除哂，老闆娘話遲啲會印過。响香港呢個素食者仲係少數嘅地方夠膽做出呢個決定，都真係勇氣可加，梗係要多多支持啦，尤其佢啲嘢咁好食。😍
繼續閱讀
愛家，愛便當依家開咗係觀塘工厦地下，有得堂食。我哋跟住openrice嘅地圖去揾，行咗入冷行見到店舖嘅招牌，原來嗰個係後門黎。一入去就見到一排排座位，去到盡頭拉開左邊嘅趟門，先會見到正門同落單嘅位置。我哋走嘅時候行返正門位置，見到隔離都有唔少餐廳，而工厦嘅大門口放有素店嘅海報。餐廳可供walk-in，但部分食物需要提前1日預訂，例如蔬菜壽司。日式素便當 + 3款配餸飯糰 2個 ($58) (額外加1個飯糰 +$10)紫菜卷 5條 ($68)配餸柚子味白蘿蔔醬南瓜醬冬菇金平牛蒡韓式菠菜大豆芽蔬菜串串 (是日特色前菜)芝麻醬魔芋粉 ($38/ 散叫)原本想叫蔬菜壽司，但因為冇提前預訂，所以就叫咗飯糰同紫菜卷便當。飯糰同紫菜卷嘅材料都係一樣，只係包法唔同，飯入面撈埋冬菇粒、蜜糖豆粒同甘筍粒。飯糰有醬油嘅香味，紫菜有D韌。配餸方面大推柚子味白蘿蔔，白蘿蔔酸酸甜甜，帶有柚子嘅清香味。我仲買咗1盒拎返屋企食。韓式菠菜大豆芽麻油味濃。我哋樣樣都想試，但唔想叫多個餐，所以就散叫咗魔芋粉。原本想叫芝麻醬粉皮，但當日冇粉皮，老闆娘就建議轉做芝麻醬魔芋粉。芝麻醬即係日式胡麻醬，醬汁份量啱啱好撈勻所有嘅魔芋粉。魔芋粉口感好煙韌，夾起黎容易黐埋一舊。
繼續閱讀