德發茶樓 (已結業)

或許是全個大埔墟之中,最舊的茶樓,沒有四十年,好歹也有三十多年,門面極為殘舊,如果愛門面的年青人,一定掉頭走.早上踢住對拖來,隻手夾住份報紙來飲茶,完全切合這間舊茶樓的風格.茶客差不多清一色亞伯,懶理禁煙條例,照樣吞雲吐霧可也.看住電視論盡時弊,在檯上玩下啤牌,好像身處在公園的涼亭一樣.問阿姐:{有咩野食?}阿姐:{呀....金錢肚啦,雞扎,春蛋燒賣啦,粉卷啦..}我再問:{仲有無盅頭飯?}先奉上排骨飯一盅,飯粒幾乾身,但排骨肉質粗糙,肉汁略欠.吃罷就奉上鵪春蛋燒賣同金錢肚.春蛋不夠甘香,下面的豬肉質感竟然似芋茸.金錢肚軟稔,可是未盡入味.在今時今日仍然有個算盤在收銀處,姑勿論是否仍用算盤去計算,但都算惹來一點點注目禮.舊物不是一定好過新,如果不思進取,默守成規的話,就由得時間巨輪去自然淘汰吧.出到門口索一索件衫,沾上點點煙味,這個早上,當然不算精神爽利.

一心來找上次經過時拉二胡的阿叔。一推門，換來片刻鴉雀無聲。…。靚妹唔俾飲早茶架？閃到一旁坐下。甫定神，聽一男音響起：「鮮竹卷…」拿著托盤的阿叔經過。「阿叔，有乜好食架？」阿叔背著我，如孤魂野鬼般經過。「阿叔…」我拍拍他的手肘。他轉過頭來，目光呆滯般望著我。「阿叔…有乜食呀…？」他繼續呆滯般望著我。「乜粉都有。」呀？見隔離阿伯趴緊碟好吸引的齋腸。「有無齋腸？」阿叔放低咗碟蝦腸，舀咗羹豉油，走咗。…？另一個阿叔，抱住兜批到白雪雪既子薑，成九十度角橫過。…。莫非我幻聽？正在趴碟蝦腸時，男音又起：「鮮竹卷…」「啪。」早唔早，遲唔遲，就咁就食到粒砂。一望過去，有檯叔叔嬸嬸在打牙骹。「鮮竹卷鮮竹卷…讀歪啲咪『輸足錢』囉！」「唉，改壞名。」吓？「依家曾志偉匹馬…」…晃然大悟。正在沾一啖香片的時候…「唉，仲貴過食支雪茄。」又乜呀？「馬會唔肯俾錢吖嘛，梗係仲貴過食支雪茄啦。」「你諗吓，大拿拿九百蚊一隻馬噃…」「咪係囉，啲伙記都要食架…」「你諗吓，如果你有十隻馬，每個月要俾成九千幾蚊租…」咁都得？埋單時，靚姐同班高人搭訕：「今期邊個中呀？」「中…梗中架。」咁大口氣？成班馬迷齊聲道：「馬會中吖嘛，梗中架！」

呢間茶樓已經有好耐歷史,超過三十年,有兩層,佢既正確營業時間係,由晚上零晨2點半,至曜晚10點半,夜茶時段最旺,通常係的士司機居多,由於老字號,所以環境麻麻,唔太乾淨,不過食物都有番咁上下,不過味精頗重,值得一試係,由老闆親自炮製既燒味,通常D食客都係叫燒味例牌$55蚊碟,(雙併),有燒鵝,切雞同燒肉,在平價茶樓黎講算很好,燒鵝皮脆肉嫩,但唔係成日有得食,雞肉嫩滑,至於燒肉,皮好脆帶少少燶面(老闆會刮走)不過可惜太鹹,仲有排骨飯一流(一盎),值得一試,至於其他點心份量底食夾大件,(唔知點解無蝦餃),但係有而家好少茶樓可以食到既鵪鶉燒買,平衡每人$4-50蚊已經好夠飽,(3-4人計算,連燒味),順帶一提夜市就算樓下無位,都千萬唔好上樓上,樓上係專供江湖人物享用,老闆亦都唔俾上,不過幸好既係咁多年都無事發生過,可以放心