影片
以上資料只供參考, 請與餐廳確認詳情
「四點鐘閂門，遲到連阿姐都唔吼你！」元朗大棠道熟食市場C11號舖「張光記」，呢間冬菇停大排檔已經over 40年歷史～.專程為咗排骨蒸飯衝過嚟，$50有找嘅蒸飯，底層鋪滿7-8粒半肥瘦排骨，醃到豉油香入晒骨，絲苗米粒粒分明彈牙到識跳舞，最邪惡係臘腸油慢慢滲落飯焦度😈.馬蹄牛肉球夠晒古惑，大大粒咬落「索索聲」，有種童年嘅快感～ .霉香鹹魚排骨飯係「重口味之選」，鹹魚不過不失，排骨依然keep住嫩滑。.☕️奶茶先係隱藏大佬！茶底濃到黐脷，撞埋花奶滑過溜冰場。溫馨提示：記住帶現金同埋早過兩點嚟～呢度收四點閂門
繼續閱讀
大家見到咁舊式既冬菇亭，會唔會好奇而走入去搵吓有咩好食呢？ 有次同長輩傾開，佢話原來呢間嘅盅頭飯好好食，好出名。住元朗嘅街坊通常都知道的。我從未試過，出於好奇之下去咗試吓。環境當然就要將就下啦，好在有好多個大風扇吹著。坐就坐摺枱。飯係粒粒分明。飯面淋上嘅豉油甜甜哋，幾好味。佢哋揀做排骨嘅部位剛剛好。有肉有骨又有少少脂肪食到。唔會好似出面有啲好唔勻稱或者太多脂肪好難咬。同埋排骨個味道調得幾好味，唔會好咸好甜，剛剛好。食得出製造嘅用心。鳳爪正常發揮。3樣嘢配合得幾好。下次可以再去試吓佢哋嘅粥品和中式點心。
繼續閱讀
放假特登一早入去元朗食下好嘢，知道有間冬菇亭叫張光記，出名食點心、粥品同埋盅頭飯，去試一試，叫咗個鳳爪排骨飯加凍奶茶，再加一個北菇蒸雞點心，個鳳爪排骨飯好大盅，啲餸都唔少，鳳爪好腍，個汁微甜，至於排骨唔算滑，上枱之前個飯冧咗豉油同豬油，佢嘅豉油味唔突出，但正正因為咁，令到豉油味冇蓋過豬油味，豬油味好出，如果豉油味重啲啲就perfect，所以個飯重點係豬油撈飯，至於個北菇蒸雞嘅點心，雞都算滑，冇蒸過龍，但係啲雞肉唔多，可能靚嘅部位拎晒去蒸飯，至於味道中規中矩，而且蒸出嚟嘅雞油亦唔算好多，唔會食到成口油，但係杯凍奶茶就差少少，一開始送過嚟嘅時候可能落錯咗走甜，所以一啲糖水都冇落，但係都飲得出茶味幾濃，但唔夠香，之後叫佢加返糖水，加完之後只係甜咗好少好少，唔知係咪又變咗少甜，如果佢最終係冇加少咗糖水嘅話，甜味嘅份量就唔係太理想，不過相信如果糖水嘅份量係啱，杯奶茶應該唔算太差，最後，冬菇亭就唔好諗住有咩服務，不過通常都係比較有人情味，但用餐體驗又唔覺得啲夥計同食客好相熟好有人情味，可能真係冇熟客喺度，三樣嘢埋單$65，一啲都唔算貴，但係以冬菇亭嚟講亦唔算平，但的確豬油撈飯，而家依個年代唔係周圍都有。
繼續閱讀
今日幫襯元朗冬菇亭嘅張光記朋友介紹話佢哋嘅點心同埋蒸飯好好食今日又係嚟到元朗覓食嘅時候見到門口都好多人排隊一坐低朋友叫咗梅菜肉片飯我就叫咗鳳爪排骨飯佢哋係倒轉吸落個碗度所以影相嘅時候唔係好影到個面有餸其實啲餸喺晒個底本身仲想試吓佢嘅臘味飯但手因為我哋今次得兩個人食，所以一人一個飯就冇特別再嗌其他野啦排骨軟熟得來有咬口鳳爪亦都好入味個飯唔太腍亦都唔硬仲有少少煙靭添講講環境，嚟得冬菇亭食嘢都係食個情懷所以唔好期望會係好好，但係都乾淨嘅我下次會再嚟幫襯，下次真係會想試吓個臘味飯呢度食嘢唔係真係食香港情懷咁簡單而啲嘢真係好好食唔係一般酒樓嘅一式一樣嘅味道推介大家值得一試
繼續閱讀
有一排無入元朗，今日見天氣OK入去探個朋友順便食最近上網睇到介紹既張光記。其實呢個冬菇亭我唔系第一次幫襯，但上次咖啡通粉既體驗十分惡劣，所以無再去幫襯，估唔到原來入面仲有間歷史悠久既老店可以試下。去門口見好多人排隊，諗住有排等，點知原來都係等外賣，咁見到有位就坐喇。事前做功課決定食鳳爪排骨飯同牛肉球，同店員直接落單，大約等咗十五分鐘左右，算有啲慢但都OK既。冬菇亭環境一般，但對香港人嚟講係有種情懷，只係天氣開始轉熱，無冷氣唔系個個都接受。鳳爪排骨飯既鳳爪口感有啲爽，同酒樓淋滑口感唔一樣，而排骨更加係麵豉醃製，跟酒樓既都唔一樣。見阿姐上飯前會加三樣醬料，猜測可能系熟油，老抽同生抽掛，但味道唔濃，少甜味。牛肉球如傳聞中紮實，有牛味有口感，感覺真材實料。好快咁食完，呢餐合乎期望，都幾滿足。麻煩阿姐睇數，阿姐收錢嗰陣講句多謝，我都講句唔該，禮貌睇嚟基本，但唔系間間餐廳都會。
繼續閱讀