廣東燒味餐廳 (已結業)

家庭晚餐今晚有老有少一行十人到廣東餐廳小廚晚飯，家人喜歡海鮮，餐廳有來料加工服務，價錢為公道市價，於是我因應母親大人吩咐去街市買了奄仔蟹和新鮮鮑魚，另再點了九道小菜。櫥窗掛滿各種廣東燒味，然而，那串串掛著幾個焦糖色的的東西對我來說頗新奇，不禁停步注目，一問之下原來是市面罕見的傳統菜式，金錢雞 和 蜜汁雞肝，那當然不能錯過，我決定點幾個 雞肝（$8/件）試試，正考慮 金錢雞（$25/份）可能太肥膩，就不讓三高爸爸試了，怎知他進來時早發現了它，而且甫坐下立即嚷著要試，於是也就順他意點一份來分嚐。飯店先送上例湯，是老火花生雞腳湯，喝著有家的感覺。雞肝 表面有焦糖色蜜汁，微微焦香，內裡軟嫩，味道濃郁甘香，絕不輸法國鵝肝。金錢雞 我沒試，只知道爸爸吃時頻頻讚好，還說走時要點一份打包（可惜被我勸止！三高人士，還是淺嚐好了！）。我忘記了自己想試 琵琶鴨，點了半隻 燒鴨，賣相吸引，大大份，味道也非常不錯，果然是做燒味的，絕對對得起自己的招牌。薑蔥炒蟹 一來，賣相非常了得！一上桌大家不禁嘩嘩聲，一看就知夠鑊氣，薑蔥給得豪爽，火喉剛剛好，蔥保持爽嫩，吸收了蟹汁，特別味美，我買的蟹很多蟹羔，蟹羔仍緊緊地留在

平安夜慶祝，順便慶祝埋小弟升職。食生不如食熟，又嚟到廣東食啦！一早訂左位，所以人多都唔怕！難得我臨時加位調枱都無詐形，今時今日咁嘅服務態度邊度搵？野多就唔駛講啦！試左最新推出嘅酸菜魚煲！嘩！啲湯底好味到我變左煩膠吳若希係咁問「點解嘅！點解嘅？」點解咁好味！我唔食魚都鍾意呢個魚煲！十分有九分！跟住啲燒味當然唔少得啦！依然係無得頂，想知有幾好食？自己過嚟試！我地食大閘蟹，佢地仲貼心煲埋薑茶俾我地驅寒！無得輸！

今天如常的很忙，三十幾度，老闆要我東奔西跑。又或者應該講係，我有個好老闆，衹不過喺office我本來就係要東奔西跑嘅角色，我哋啲西裝友喺呢個天時特別辛苦，收工之後我決定 斬料 返屋企同阿媽食好啲。半邊燒鵝，有油光好靚，燒鵝肉嘅味道好有鵝肉味，啖啖肉唔算太多骨，唔算鞋口但應該唔算嫩滑，食嘅時候點啲酸梅醬就very good，只係不過齋食嘅話就算係有啲鹹。燒肉，燒肉嘅肥肉同瘦肉都算平均，咬起上嚟啲燒肉皮都算脆卜卜不過又有啲硬，啲燒肉味道正正常常，但係唔知點解有幾嚿特別鹹。生活艱難，其實食乜嘢係乜嘢味真係冇所謂， 最開心就係返到屋企同阿媽同家姐食餐飯。老闆，我當然知道你會睇到我呢篇openrice文，我唔係怨你，只不過我真係好辛苦， 可唔可以請多件 行街佬 呀，請個fresh grad嘅 PT都好吖。

老公生日搵地方食飯, 聽人講元朗廣東燒味小廚好食就去試吓｡ 原來餐廳可以預定海鮮, 真的不是一間普通茶餐廳｡去到餐廳門口巳經見到燒味好靚, 入到去地方寬敞枱與枱之間吾迫同乾淨｡ 第一感覺巳經不錯｡食飯最緊要都系食物同味道, 我們點了﹒﹒﹒芝士龍蝦伊麵 - 芝士汁好味, 龍蝦新鮮, 伊麵爽口鮑魚燜鵝掌 - 鮑魚同鵝掌燜到好入味 (媽咪好like)蟶子燜米粉 - 平時蟶子總會用豉椒炒, 今次燜米粉好有新意豉汁蒸鱔 - 豉汁味岩岩好, 鱔好爽口冰鎮秋葵 - 好fresh美極牛仔骨 - 口感同味道啫啫通菜煲 - 少少辣好正芝麻蜜香炸雞 - 皮脆肉滑帶少少蜜糖味, 同一般吊燒雞不一樣生日飯吾少得壽包, 餐廳都有得食, 好perfect 大家食得好開心, 非常滿足的一餐 一定會再幫襯

前2晚打算同成班屋企人食飯，見屋企附近開左間新燒味店，又有小菜個啲，就走去問下有無得訂枱，因為屋企比較多人想佢地坐得舒服啲🤔 點知真系有得訂枱，個叔叔仲問我使唔使訂定隻乳豬，同屋企人一齊食。咁我見我屋企都幾多人，燒隻乳豬都無妨，所以就要左。🤓 最好既地方系佢會問定我幾點到舖頭，可以去之前先即刻燒！唔使怕凍晒唔好食！🎉到個日去到，一上隻乳豬，嘩！真系熱辣辣香噴噴！好靚仔！個個親戚都忍唔住系咁影相😂 正所謂色香味，色香都俱備，味道都好好！😍一咬落去塊皮真系脆卜卜，啲肉好嫩好多汁，成舊擺落口真係好好食！😵😵無論係自己嚟食燒味飯，定係一家人叫餸食飯，我都好推介👍🏻（唔好意思其實仲有其他小菜但唔記得左影😂）

廣東燒味咁出名，一見到佢開係元朗，當然去試吓啦！去到門口個綠色同紅色招牌好搶眼，門口同其他燒味店一樣睇到燒味乾淨企理午餐人流多，但安排座位妥當剛開張水準已經非常好，本人我對叉燒要求非常高，但佢呢個叉燒不得不讚叉燒入口即溶，味道非常好小腩仔個皮真係又脆又香！真係估唔到一間茶餐廳有咁好水準，識食既朋友一定要來食 價錢比一般燒味舖係貴少少，但食過一定會再返轉頭燒鵝同琵琶鴨都係必食之選，建議大家嚟到一定要試

今日落雨，又凍凍地，唔想煮飯食咪搵埋女朋友同世伯伯母落街食囉。咁元朗最就腳一定係大馬路啦，我提議食番廣東燒味餐廳啦。門口又係個位熱情叔叔，燒味依然係咁靚！坐低叫左個菠蘿京都骨、西芹腰果炒肉丁、再黎半隻琵琶鴨。先講個菠蘿京都骨，因為太香啦！未影相已經俾大家瓜分左⋯⋯味道無令人失望，酸酸甜甜好開胃！再黎西芹腰果炒肉丁，啲西芹同腰果都好脆好入味，美中不足係啲肉丁太淡啦。老闆話因為今日啲肉醃得唔夠，所以都話唔好意思，所以私人醒我地食個粉絲煲。粉絲煲超入味！賣相就好似武林高手咁，深藏不露。食落就知功力深厚！粉絲爽得黎唔乾，有汁得黎又唔膩，送飯一流！最後係主角琵琶鴨，想像下乳豬皮同燒鵝脾嘅混合體就知咩味。唔講太多，自己品味！最後有一樣野好值得讚賞，平時落雨，一入啲普通茶餐廳，一定成地水。而廣東咁多客出出入入，地下都咁乾爽，好舒服！

今日假期，諗住求其係屋企樓下搵野食，無端端發現醉翁館執左，變左做廣東燒味餐廳小廚，不過是但啦為左醫肚，求其食餐晏算啦。一入去，門口同其他燒味餐廳一樣，掛滿燒味，諗住都係碟頭飯一碟，點知有驚喜。睇完餐牌有炒粉面，又有燒味，但見人地隔離枱好多都叫燒味飯，咁所以我決定嗌個去骨海南雞餐，68蚊連熱飲，價錢都算係中等嘅，試下係咪無骨，因為好多餐廳嘅海南雞飯都有⻣，仲要係鞋圾圾嘅雞，一D都唔嫩。碟飯一黎到，份量都算大，雞又滑，最重要係無骨，岩晒我哩個懶人，脾位都可以去骨個師傅真係好犀利。決定下次再黎試下其他燒味

今日屎忽痕🤔，又諗唔到食乜，本身想去大快活食個下午茶，點知見到有間新開嘅，招牌青BB好特別。🤠咁門口個叔叔又好鬼熱情，猛咁請我入去，仲話唔好食唔收錢。🤣咁我就膽粗粗入去啦，我地四個人，點左豬扒脆豬、燒鴨湯瀨、雪菜火鴨絲湯米、仲有奶醬多。個豬扒包好大塊，奶醬多勁多醬，仲要烘底都唔駛加錢！😱個阿叔仲私人醒我地一碟仔叉燒，真係好食架！埋單都係百零蚊！無法子唔幫佢宣傳下啦😂話晒食左人一碟靚叉燒👅餐牌仲有好多野食，下次一定會再試！