影片
年初二下午茶時段，搵食艱難，隔住玻璃見到一圍枱坐滿晒人，其他枱都有客，即係照常營業啦，入到去都未坐低，有個阿叔即刻同我講話冇點心喎，問我想食咩，我心想我都未有menu，兼仲未坐低。我終於坐低咗，嗌咗羅漢齋炒米，落單個阿姐唔多客氣，都算，我主打係食嘢，唔係食服務。但係啲嘢食難食到嘔，個炒米啲油多到可以裝一樽返屋企煮餸，又唔香，個鼻涕芡（已經叫咗少汁）撈埋啲油，掩蓋晒所有食材的味道，兼夾好難入口。之後先發覺嗰一台客，同埋其他所有客，其實都係呢間食肆嘅自己人，全部係親朋戚友，搞到我好似入咗黑幫家族飯堂咁。可能就係因為咁，呢間嘢完全唔注重食物質素同服務態度。總之食完即走，永不回頭。
繼續閱讀