太興 (翔龍灣廣場)

營業中

休息中

朝早經過要試佢地好勁廣告的人氣早餐(25).炒旦連多士,火腿通同冰鎮奶茶.炒旦OK但多士凍,火腿通幾多料但D湯勁多味精,冰鎮奶茶雖有茶味但唔夠滑.奶茶始終都係行過D白宮好.所謂人氣早餐,其實好普通,似乎冇神冇氣多D.

連續四個食評都係我...哈哈...用埋最後一張燒肉券，補多十零蚊就可以買到半斤燒腩...天寒地凍，燒腩已經涼，但皮依然脆啪啪，還可以...加一碟灼西蘭花，兩口子簡簡單單又一餐..^0^

食得多早餐，今次第一趟嚟食個晚飯...响呢度叫燒味始終比較穩陣，就來個燒味拼盤。乳豬皮脆，稍嫌底層肉鹹香味不足；燻蹄肥瘦有致，水準唔差；油雞色水夠亦算入味；半肥瘦义燒用脢頭燒成，已加分。肉頗嫩，膏燒得微燶嘅部份，最得....小菜相對上就唔掂...叫個鮑魚菇豆腐班腩煲，冇嚟火氣，温温吞吞咁，肯定唔係原煲炆嘅，只係求其預先响鑊煑起以後再放落個暖煲到。咁嘅貨色，一睇就知死梗...食呢類煲仔小菜，點都係要响大排檔食嘅...

又撻對拖鞋落嚟食早餐....要飽肚，响menu就只有一個選擇，皆因只有一款set係既有通粉又有多士及炒蛋...蛋落咗極多油去炒，頗滑；多士烘得微脆，還可以...生菜火腿通粉件頭頗大，湯底師傅味極濃，食到一半已經放棄...好多人嚟呢度可能只係為咗杯冰鎮奶茶，奶味極重，好喝與否極見仁見智。對小弟嚟講，都OK ge...但响呢區嚟講，呢個早餐實在係貴咗D...

同太座行落嚟食個tea。之前食個普普通通嘅早餐，都收成二十五六大洋一個，實在太貴。今次食tea，choice比早餐時多，但水準仍然係油蔴地....最好嘅仍然係杯奶茶，夠凍亦算幾滑，甜度亦剛好，跟灣仔金鳳有得揮...燒味? 如果係散叫就會OK d ge...

間舖都唔算開左好耐，所以樣樣都幾乾淨企理。衛生環境方面都幾好，坐得舒服。五個人去，叫左四個餐午餐燒鵝飯，普普通通。無乜太大特色，鵝的味道都尚算可以。叉燒燒肉飯，叉燒的味道都唔錯，肉亦夠lum，不過就瘦左D。燒肉的皮相當鬆化，亦有少少炭燒味，幾好。瑞士汁牛柳絲炒河，這個午餐比就咁散叫這款炒河仲平，仲有野飲，$38算係幾抵。牛肉真係似紐西蘭牛肉(佢係咁寫)，又lum又有少少酒香，河粉方面用瑞士汁炒，味道好，少少甜，很濃郁。不過很多油，仲要放兩條菜落碟底，名副其實的油菜。份量則幾大仲有一個就係帆立貝手打烏東配炸餃子。炸餃子正常味道，無甚驚喜，個人覺得煎應該好食過炸。烏東則做得唔錯，又滑又有質感。湯及其他配料都幾好。預期之外。當然都有試那個冰鎮奶茶，D荼好似過濾得麻麻，有D茶渣，兩杯都係咁，應該就唔似係個別事件。奶茶味道和出面其他地方的差不多，無驚喜。P.S. 餐叫燒味飯其實唔係抵，只是比散叫平幾蚊，反而D炒野平之餘仲有野飲，是比較抵的

全土瓜灣最大屋苑- 翔龍灣,入伙不久已有新店進駐,就是太興新世代.反之一早事先張揚吉之島超級市場,仍然無了期.一貫靚裝修,門口有帶位,亦有侍應落單.一碟雙拼飯$30,索價比其他同區的地方高,不過其乳豬皮脆鬆化,又的確比其他店優勝.所謂熟汁叉燒,燒得不夠入味,肉質亦不夠鬆化.其另一鎮山之寶冰鎮奶茶,就完全不行,奶味大過天,茶味近乎沒有.相信用冰鎮上,綽頭而已.單價$16一杯,不如在隔離白宮飲好過.當隔離百多米之遙,偉恆昌新村的酒家,正賣緊$10一盒外賣燒味飯之同時,究竟這間太興新世代,一個連餐茶盛惠$43的燒味飯餐,能否吸納翔龍灣住客之外的土瓜灣街坊?