四喜燒臘 (瀝源邨)

營業中

休息中

上次在這裡買燒肉飯，由於我是最後一個燒肉飯，正常有皮燒肉溝D沙利督，加一條菜，咁平總算OK，但今日就離晒譜，全部無味硬掘掘勁瘦沙利督，一舊正常有皮燒肉都無，怪不得比一堆菜我咁好死，原來用來蓋住D所謂「燒肉」，明明見到佢針板上切定一份份有皮正常燒肉，個老伯望左我一眼可能見我女仔好恰，又買一盒咁少，於是比曬D最衰的垃圾肉我，人地又咁價錢都正正常常，我就垃圾肉，把鬼火呀，女仔女人千奇咪去買，此舖明恰女人，火到相都唔記得影呀！

大前日(9-12-2015 Wed)放工 後o黎瀝源邨派帖俾八姨,之後繼續買餸,落o黎見到重有燒鴨,買唔買好呢?呢日天氣咁凍,但$45.00有半隻,真係好抵食,而且今次仍踫到有,咁就買啦.要o左半隻,老闆問我切唔切走屁股位?我話切.而佢又送多一舊鴨胸俾我,多謝老闆.返到屋企打開影低先,顏色夠深,味道好夠,同我平時o係荃灣家,爸爸買返o黎o既燒鴨味道一樣,又唔太鹹,$45.00半隻,真係唔知邊o度重有咁平o既燒鴨?

今日(5-12-2015 Sat)過大禮,男友一早返佢男家攞o野,但佢聽日又要返工帶飯,我o地今晚又出街食飯,於是買定燒肉俾佢做餸啦.o黎 到,梗係有o野賣,我揀o左一條燒肉俾佢,盛惠$55.00,又見到飯盒賣$18.00,雙拼$20.00好平,橫豎自己都要食晏,不如買個俾自己,就要燒肉切雞飯.返到屋企又影相,我o既雙拼隻,雞係俾o左雞翼位我,燒肉比我揀o個條肥啲.試吓男友o個啲先,鹹淡適中,皮脆OK.咁我食返我o既飯,飯偏硬o左,燒肉皮有啲係脆,有啲就唔掂,鹹淡就一樣適中.而雞翼呢,肉都仍嫩,不過鹹o左啲.下次正式買燒鴨試.

尋日(3-12-2015 Thur)放工後到瀝源移市買餸,行到o黎重未收舖,但已經冇晒燒鴨,只有兩件半邊o既雞,老闆問我要咩o野?淨返雞.佢就指下面o既叉燒,話$15.00俾我.我睇到有幾隻豉油雞髀,不如買豉油雞髀,就問幾錢?佢答$8.00隻.咁我要兩隻同埋o個件叉燒,佢見我食唔到佢o地o既燒鴨,o係幫我斬料時,就話俾兩舊(燒鴨)你啦,之後收我$33.00.返到屋企打開影相試吓先,叉燒係瘦叉燒,味道好夠,口感唔夠軟,但又好彩唔係好乾硬o個隻.豉油雞髀味道就唔算好夠,雞肉亦都唔係juicy,但唔o鞋.之後搵到o個個兩舊燒鴨,食冇咁多肉o個舊,留返啖啖肉o既鴨胸俾男友啦.件燒鴨雖然唔係好出眾,但皮香而且鴨肉味道濃,同我平時o係荃灣食到o既差唔多,甚至好啲啲,以$45.00半隻o黎講真係唔錯,唔怪得o個次同男友排隊等好耐,最後唔買.最後又發現有隻雞腳,我就食埋佢啦,睇佢冇乜顏色,但食落原來好夠味,雞皮爽,腳趾多啲肉,軟硬又適中,幾好食,我本身都唔鍾意依呢種雞腳,但我都要讚呢.味道係3.9分服務:個老闆好好傾,我重叫老闆下次留俾我呢.