嚐甜

營業中

休息中

第一次幫襯，等左一陣有個女店員叫左細路女幫我落單同收錢，我叫一杯芒果沙冰同一杯芝士日本培茶（少甜走冰），個細路女想寫單但好似唔識寫咁，最後個女店員口頭幫我同廚房嗰邊落單，買完走左之後先發現杯培茶有冰同埋顏色勁奇怪，似足普通四季春茶既顏色，諗諗吓覺得唔對路就返轉頭去問下，佢地全部人堅持話冇比錯，咁我唯有照飲，杯野啲芝士已經因為有冰而逐漸溶哂，飲落味道好淡，似牛奶多過培茶，覺得有啲比人呃既感覺！唔會再幫襯！

服務態度差，仲要唔好食，榴槤西米露D榴槤好硬而且份量極少，西米露好似求其用糖開水加西米咁，草仙芋圓D草仙係港式涼粉，並唔係草仙😑，懷著失望的心情上船離開長洲～

夏天入長洲除左大魚旦同卷卷脆薯當然少不了食糖水啦尤其下午行到差唔多中暑更需要涼下冷氣～我地冇乜揀過就求其入左一間糖水鋪，可惜結果好失望啊雪糕紅豆冰，其實我都未食過唔好味嘅紅豆冰，但今次真係好失望啊雪糕好好味，但中間啲椰汁竟然可以一啲味都冇，就算撈左底啲紅豆蓉都冇乜味唔合格綠豆沙豆腐花，綠豆沙味道都係偏淡，但底嘅豆腐花都ok嘅，有少少豆味同埋都算滑。唔知係咪一時失手啦，朋友點個啲糖水都冇乜野，但我點個雪糕紅豆冰真係唔好味，應該唔會再食依間啦

今日媽咪入長洲探我，我哋食完飯就去食甜品，我哋搵咗最近屋企嘅一間甜品店，呢間甜品店係我第二次幫襯。原來第一次已經係上年8月2日(大家可以參考番😂😂)，當時叫嘅嘢同今日原來都差不多，而且唔知係咪老闆都睇到我之前個食評，所以個餐牌有所改動🤣🤣。今次我叫咗個芒果綿綿冰，而媽咪就叫咗個芝麻糊湯圓。今次個芒果綿綿冰比上次嘅賣相更差，味道都冇上次咁好味，芒果唔甜，仲有少少酸。值得讚嘅係佢可以加錢加配料(呢個就係我上次食評提議過嘅)，但係我覺得今次最差嘅唔係賣相，而係我覺得有少少被騙嘅感覺🤭。話說我揀芒果綿綿冰係因為我見到佢貼喺牆上嗰幅圖寫住$38芒果綿綿冰，賣相亦吸引，但當我order嘅時候老闆話嗰幅圖有三個配料， $38只係得兩個配料，所以要我揀兩款或者加錢要三款，最後我冇加錢呀，因為覺得咁樣唔老實囉！食完綿綿冰再食芝麻糊湯圓，就覺得個芝麻糊淡到冇朋友，所以食甜品嘅先後次序都真係好重要。起初我因為怕啲冰會溶所以食咗冰先，但如果調返轉食咗芝麻糊先，啲冰又會溶，早知分開叫。我哋坐咗半個鐘都冇人堂食，可能都8:30差不多關鋪，但係有好多人外賣佢哋自製嘅糕點，所以下次我都會試下。

夜晚落樓下同三個朋友食甜品，見到依間甜品店裝修好靚，幾大幾乾淨於是離試吓，食物出奇地好味。我哋叫咗一個雜果涼粉，一個哈密瓜西米露，一個抹茶椰果沙冰，一個芒果糯米糍。四樣甜品都好有水準，我最鍾意嘅係抹茶沙冰，抹茶味唔會太苦，夏天食消暑一流🤤而且店員態度好好，好親切友善，讚😘

今日食完午餐之後好想食返個甜品，於是就同朋友嚟試吓呢個新開嘅甜品舖。舖頭名同內街另一間甜品舖一樣嘅，唔知係唔係同一個老闆，不過呢間嘅環境俾人覺得寬敞啲丶光猛啲同埋坐得舒服啲！我叫左個芒果綿綿冰，配料要咗荔枝味爆爆珠同新鮮芒果，其實我覺得只可以揀兩個配料實在太少喇！如果佢可以加錢再加配料會好啲囉！侍應攞個甜品黎嘅時候我係有d失望，因為覺得同圖片或者佢嘅display 差太遠，個冰塌晒落嚟😪😪都唔靚嘅！不過食落口係幾好味嘅，芒果係新鮮同埋甜嘅，我最鍾意就係佢面頭有啲綠色嘅脆卜卜，令成個綿綿冰嘅口感唔同晒👍🏻👍🏻