影片
以上資料只供參考, 請與餐廳確認詳情
相關文章
有小組組員知我哋兩公婆成日由美孚行上馬騮山，不時問我哋幾時帶佢去行，卒之擇咗今日兜一轉，但起步前梗喺食個飽飯啦，所以，專登約佢哋喺美孚嘅「京都薈」 飲餐茶，跟住經「饒宗頤」穿上馬騮山，再晌「九龍接收水塘」、「石梨貝水塘」打個轉返番落美孚。話就話呢間屬於街坊酒樓，亦開咗好一段時間，但喺個大堂樓底超高，就算拍滿枱，都仍然唔覺會話太逼，加上被安排咗張死角枱，更加靜侷，方便我哋傾偈。一張價目表有晒平日、星期六日假期，早市、午市、下午茶各時段嘅點心收費，一目了然。另外，茶錢收$14位，有收加一服務，計埋呢啲「立立雜雜」，其實飲茶確喺唔平，不過，大家嘆吓點心，傾吓偈，開心嘛。有咩嘢揀就唔多講，始終飲茶嚟嚟去去都喺嗰啲，貼晒啲點菜紙出嚟大家就一目了然。此外，當然例有啲套餐，以及小菜嘅選項。沙律明蝦角 $39.8老實講，個樣就包得真喺麻麻哋，摺紋唔平均，不過，餡料都算足，豬肉鬆化，蝦肉爽口，仲夾雜啲蔬菜粒，況且，炸得亦香脆可口。香脆炸春卷 $36.8呢度啲炸嘢確喺唔錯，春卷外皮炸得甘香又脆口，完全無油膩感，沾上少少喼汁，效果更好，裡面混有少少蝦肉，比起得啲淨肉嘅更爽口。香煎蘿蔔糕 $32.8老婆特別鍾意食蘿蔔糕、芋頭糕，所以，佢點都要嗌番一客過口癮。碟蘿蔔糕叫做穩打穩紮，煎得香口，口感挺實唔削身，少臘味就更合老婆口味。蜜味叉燒腸粉 $36.8飲茶唔嗌腸粉感覺總喺差咗啲，睇落啲腸粉皮拉得有啲厚，但又透透哋裡面嘅叉燒餡喎，算拉得滑，亦有米香，叉燒落得無手緊，塞滿鬆化嘅瘦叉同蔥花，啱我口味。玫瑰金蝦餃皇 $39 8個名就改得勁，外觀都大大粒又夠晶瑩，摺紋細緻度尚可，而餃皮咬落軟熟卻唔黏牙，裡面全部都喺鮮蝦，非常之爽彈，甚具蝦嘅鮮甜味。潮州粉果 $36.8蘿蔔糕之外，粉果就喺老婆另一至喜歡嘅點心，粉果包得大大隻好飽滿，呢度都喺傳統做法，裡面滿滿沙葛粒、西芹粒、花生粒、蝦仁粒……等等，用料十足，味道唔錯，只喺外皮有少少削。奶黃流沙包 $36.8飲茶又點可以少咗包點架，一送到嚟就要趁熱食，一咬包身非常軟熟，而中間嘅流沙餡都算得上澎湃湧流，做得亦夠綿滑、香濃，甚富鹹蛋嘅香氣，確喺唔錯。鮮淮山雞紮 $39.8通常啲雞紮都喺捲住啲魚肚同芋頭，呢度就改用鮮淮山取代芋頭，都幾好吖，鮮淮山口感爽爽哋又有益，而啲雞肉亦幾嫩滑，魚肚好爽。懷舊乾炒牛河 $98同枱老友稱得上有食力之人，所以，都要叫番碟炒粉飯麵墊肚，由老友發板嗌咗碟乾炒牛河，炒得幾靚仔喎，條條河粉都上晒色，炒得均勻，食到尾嗰炷都唔油膩，炒功了得，牛肉裁得大大件，軟腍有肉香。香滑芝麻卷 $32.8「菲林筒」絕對喺我哋啲老餅嘅集體回憶，大家都一致要試番下，不過，咬落嘅感覺喺有啲乾，好在喺啲芝麻味都夠濃。雖然今餐得4個人，但嗌咗唔少嘢，食得大家都好飽，一陣行番轉山，夠晒消化晒啲卡路里。我哋就唔多北上，雖然食嘢、買嘢平咗，但時間成本高，飲吓茶、行吓山就最啱我哋兩公婆。
繼續閱讀
我和朋友誤入咗一間美孚酒樓，點咗脆皮飛天雞、豉汁蒸大鱔同埋豉椒炒蟶子，真係驚喜連連！一入到去，場地好大，冇咩人，得幾圍，感覺幾舒服。.首先，$10蚊一隻嘅脆皮飛天雞真係必食推介！炸得金黃脆口，肉質滑嫩，拿手套自己再剪開，食落去爆汁，好味。真係意想不到，完全冇辜負呢個價錢。.接住嚟海鮮自選組合，任選兩款$238，簡左豉汁蒸大鱔，鱔蒸得剛好，鮮味十足，豉汁添香，食落唔油膩，真係正！同炒蟶子亦都唔錯，四隻蟶子肉質鮮甜，夠大隻，蒸得剛好唔老，味道入味，每一啖都食得好開心。.呢間酒樓嘅食物份量都幾足，唔單止味道好，仲係經濟實惠，適合兩人晚飯。雖然晚上冇咩人，但環境寬敞，唔使擠迫，感覺好輕鬆。仲有，佢哋嘅服務都幾好，店員親切，令我哋更加享受呢個晚餐。整體嚟講，呢次誤入嘅經歷真係一個驚喜！食物唔重口味，亦好適合我哋呢種鍾意清淡飲食嘅人。下次一定要再帶埋朋友一齊嚟，試埋其他菜式！肯定會返嚟幫親！
繼續閱讀
大年初二拜年開年，屋企人book咗美孚京都薈，雖然一樓，但有𨋢，方便老人家👵🏻同行動不便親戚。包房，有麻雀🀄️打，$5988一圍，落$500訂，後生既打麻雀🀄️，老既就坐下傾下計派下利是🧧拜下年。7:30pm打完就叫侍應收枱開飯，本身就懶洋洋，一俾利是🧧就精神哂，仲要多咗幾個衝咗入嚟逗利是🧧同幫手搬枱。啤酒🍻轉汽水🥤，有轉盤，有個親戚入咗院坐鬆d。一開波上乳豬，size唔大，皮脆有肥膏，正👍🏻。第2味竟然係脆皮雞，本身第8味，皮脆肉滑，正👍🏻，我鐘意食雞髀🍗。之後瑤柱甫，但最皓食係豆苗，炒得皓香皓嫩。竹笙海皇翅，翅唔多，但整得皓味。花膠玉掌，花膠同掌都皓巨大，掌入味。富貴斑，上菜時已經唔係魚型，肉唔夠滑。大蝦球蚌仁，蝦🦐唔算大，蚌爽口。鹽燒六頭鮮鮑魚，香口，但唔夠腍。伊面炒得皓味，唔太濕唔太乾。糯米飯唔夠腍，唔夠臘腸。糖水係紅豆🫘沙湯丸，大滿足😌。
繼續閱讀
第一次黎呢間京都薈食大閘蟹放題，真的驚喜！大閘蟹應該有3-3.5兩，公同乸都十分多膏，實在太邪惡！入座時侍應已提醒蒸蟹需時20分鐘，第一轉10隻算快到，第二轉就要催一催，呢個餐包鮑魚鵝掌，仲可以任食蛇羹、糯米飯、片皮鴨…味道不錯👍🏻其實2小時任食真係唔太夠，食到人地關門都唔趕我地走，仲話要幫我地影相，真係唔好意思😅環境闊落，酒樓整潔程度尚算ok, 侍應服務好好👍🏻👍🏻👍🏻因為好，下次食晚飯都會是選擇之一😁😁
繼續閱讀
之前返工做野時經過美孚見到佢出面video wall 有＄10蚊一隻雞好吸引，所以決定同屋企人齊去試下。我地一行5人去到大約6點半，當日係星期六，但人都好少，我地左一個套餐有元貝同燒腩仔，個燒腩仔皮好脆但元貝好細，但味道不錯。講番隻10蚊燒雞，真心正，唔係hea，堅好食。我仲叫埋特價蠔同埋個燉湯都好食，我媽媽話個湯係真材實料。而其他食物都好食又大碟。佢仲有任食大閘蟹，但要＄4XX我覺得有D貴，但當晚我都有叫左兩隻大閘蟹食都係＄98係抵食嘅，質素都好。
繼續閱讀