好似漫畫《深夜食堂》Feel 嘅「花晨月夕」，主打高質廚師發辦。食客坐喺黑色質感大吧枱前，一邊睇住師傅料理、一邊同師傅閒聊交流，為你度身揀選當日新鮮魚材。
黑色質感吧枱，可近距離欣賞師傅手藝。
於海膽季節 參與一場海膽盛宴
踏入海膽季節，當然想一試多道海膽料理。今次新推Omakase 套餐($1,880)，就引入北海道紫海膽、赤海膽、馬糞海膽入饌多款日本料理—刺身、天婦羅、豆腐杯等，盡顯海膽軟綿香濃特點；配以拖羅、障泥烏賊、鮑魚等日本高級食材，確實儼如一場「紫醉金迷海膽盛宴」。
紫醉金迷海膽盛宴 $1,880(16道料理)
【前菜】長芋海膽芝麻豆腐
以高腳杯上枱嘅第1道前菜，已經靚到要打卡。師傅將北海道馬糞海膽、三文魚籽、芝麻豆腐放於杯內，口感軟綿豐富。加埋秘製醬汁、長芋、楬粉，清甜開胃。
【揚物】海膽帶子天婦羅
天婦羅有海膽帶子紫菜卷、日本蕃薯。前者師傅將北海道新鮮帶子炸至半熟，軟嫩口感同香脆外層好夾；後者則脆得嚟好清甜，最後灑上微鹹惹味嘅櫻鹽。
【刺身4品】北海道原隻紫海膽
4款刺身唔係普通切成一片片上枱，而係獨立精緻擺盤㗎。首先海膽係double 上，有原隻北海道紫海膽刺身外，再加埋障泥烏賊、三文魚籽，引出海膽更濃郁鮮味。
最中餅配拖羅海膽三文魚籽
日本最中餅一向薄脆，師傅放入幾種人氣食材—拖羅、海膽、三文魚籽，拎起最中餅大啖咬落去，幾種魚材口感喺口中爆開好正。
障泥烏賊配赤海膽
有烏賊之王稱號嘅障泥烏賊，口感獨特，相信係多種烏賊中肉質最彈牙黏口，味道甘甜。師傅以出色刀工、手藝編織障泥烏賊，最後放上海膽，仿如一件藝術品。
薄切白身魚配鹽水海膽
最後一道刺身都係落足料地有海膽，將薄切白身魚包住海膽，一咬開海膽就於魚刺身中爆開，鮮味甘甜。
壽司9件 廚師發辦
師傅會按當日最時令魚材、食客口味，即席製作9款壽司。
吸物 漁師風海の幸清湯
日本料理店嘅熱湯，代表住呢間店嘅師傅手藝，所以高級料理店嘅湯都係好花功夫熬製㗎。今次Omakase 套餐熱湯就係用蜆肉熬製而成，配上鮑魚、碎海草、海膽。入口先有貝香，後續再慢慢滲出鮮甜味。
甜品 士多啤梨配紅豆羊羹
最後食埋日本傳統甜品—紅豆羊羹，配上日本士多啤梨中和甜度啱啱好。
花晨月夕
地址: 尖沙咀赫德道2號金麟商業中心2樓
電話: 29555288