情人節晚餐想感受吓異國氣氛，呢間黎巴嫩菜“Shahrazad Lebanese”好似阿拉丁宮殿咁，梳化位仲有咕𠱸攬吓。半戶外座位就有個大窗，遠眺紅磚大館夜景幾浪漫。
“Shahrazad Lebanese”充滿阿拉丁宮殿氛圍。
“Shahrazad Lebanese”由外籍大廚主理，堅持只用外國食材。黎巴嫩菜作為地中海菜系之一，煮法健康會將調味料減至最少，主要用香料、水果調味，呢種原始鮮味真係靚食材先做到。
情人節套餐可以食到一系列地道黎巴嫩熱/冷小吃Hot & Cold Mezze，好似紅菜頭鷹嘴豆蓉、紅椒核桃蓉，軟綿綿豆蓉配薄餅好好食。主菜則有黎巴嫩海鮮湯、炖牛肋骨選擇。外國人份量好豐富，幸福感滿滿呀。
“Shahrazad Lebanese”情人節套餐份量豐富，幸福感滿滿。
坐梳化位攬住咕𠱸食更chill。
【Starter】
阿拉伯熱/冷小吃拼盤(Arabic Assorted Hot & Cold Mezze)
黎巴嫩人好鍾意食豆蓉、蔬菜蓉，天然味道健康開胃。今次前菜就有4款冷盤—紅菜頭鷹嘴豆蓉、紅椒核桃蓉、塔布勒沙律、煙燻茄子蓉。
而黎巴嫩當地人鍾意嘅熱盤，多數都係酥脆炸物，但佢哋都會用天然鷹嘴豆、羊肉等入饌，絕對唔係fast food炸物，味道層次豐富好多㗎。今次套餐就有酥炸羊肉丸、中東芝士餡餅、酥炸鷹嘴豆餅。
【Magic Soup】
黎巴嫩海鮮湯(Lebanese Coastal Seafood)
自家用多款海鮮煮製嘅海鮮湯，飲湯嗰陣真係食到啖啖海鮮，好有地中海風味。
【Main(2選1)】
海鮮料理(Seafood Halla)
呢道Seafood Halla其實係中東炖煮方法，以番茄醬、阿拉伯香料煮製大蝦、青口等海鮮，湯汁都有種獨特香料風味。
塔吉鍋炖牛肋骨(Short Ribs Tajine)
另一款主菜選擇，就有炖到好軟腍嘅牛肋骨。大廚會用摩洛哥傳統廚具“Tajine”，放入牛肋骨、乾果、果仁、香料慢慢炖煮。呢種煮法會令牛肉變得軟嫩多汁，多種配料風味融入晒牛肉中。
【Dessert】
甜品朱古力玫瑰水蛋糕(Chocolate Rose Water Cake)名為“The Hearth of Shahrazad”，粉紅色蛋糕好有粉紅泡泡vibe。呢款Water Cake係加咗玫瑰水嘅朱古力蛋糕，入口有種獨特花香甜味，配杯氣泡酒微醺好浪漫。
Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242