【IG人氣打卡】夢幻日式下午茶 玻璃窗透視藍天白雲
將軍澳海濱長廊成為該區後花園之一,望住藍天白雲、遼闊海景散步好療癒,最正係路旁有多間餐廳閒悠~當中IG人氣打卡日本料理「花樂」,每到下晝3點就好受歡迎,全因呢度嘅「日式下午茶」以雙層金屬鳥籠上枱,仲有3層前菜、花茶只係HK$298 兩位。
夢幻「日式下午茶」有3層塔小碟、雙層金屬鳥籠同花茶,配埋整個日式環境好靚。

先食上層 多款日本小點
日本小點好豐富,最吸睛嘅一定係放滿拖羅蓉嘅「日本花餅」。將花餅放於手心,再用木羹將拖羅蓉慢慢舀入花餅中,唔止享受味道,係好似日本人咁享受整個用餐過程。

花餅連埋拖羅蓉入口,外脆內軟綿,每啖滲出拖羅魚香,無論口感同味道都好豐富。

同層仲有「玉子配煙三文魚」,輕甜撞上鹹香幾有驚喜;「炸米餅配牛油果蟹肉蟹子」嘅米餅比想像中更脆,係脆到有聲嗰種,配埋Creamy 餡料絕香口開胃。我自己就好鍾意好可愛嘅車厘子造型「壽司波波」,除咗影相靚外,壓成圓形嘅壽司飯比平常紮實煙韌,幾有新鮮感。

下層甜點 人氣日東卷+水信玄餅
講到呢排人氣日本甜點,不得不提鬆軟小巧嘅「日東卷」啦!呢度嘅日東卷口味會不時轉換,今次就食到清爽輕甜西瓜味~鬆軟蛋糕包住西瓜味忌廉,果味濃郁充滿口中。日東卷小巧Size 食得優雅,女仔邊食邊影相都好靚。

同層仲有一直大人氣嘅「水信玄餅」,剔透如水滴嘅水信玄餅,內裡係一片片玫瑰,沾上黑蜜食味道清甜雅致。

3層塔小碟 汁煮田螺有驚喜
3層塔分別裝載「Cocktail蝦」以番茄肉、洋蔥、黑椒、橙汁等煮製,有獨特果汁味;「 吉列蠔」炸得香脆,難得蠔身依然Juicy。最驚喜係「汁煮東風螺」,螺肉彈牙不在話下,拌汁甜而不膩,開胃又吊出螺肉鮮味,冷門跑出令人相當深刻。

大滿足下午茶 超豐富三色丼
下午茶心思思想食個丼飯,一解日本料理癮,呢個「三色丼」真係一絕。一次過可以食到日本魚子丼、吞拿魚蓉丼、魚刺身丼,每小碗都鋪滿刺身食材,每一啖都有魚子、吞拿魚蓉等充滿口中,食得滿足。

魚刺身丼每日會依據新鮮魚材轉變,今次就食到油份較重嘅白身魚—黑睦,大廚透露呢排當造嘅鱲魚、真鯛都有機會食到。

呢間料理店係由一班80後夥拍日本人開設,另外晚市會有多款高質日本料理,Menu 會不定期更新Keep 住有新鮮感。

直接拎起爽食 海苔粉炸松葉蟹腳
將蟹肉位置起殼,爽快地拎起蟹腳直接食最正。蟹肉本身灑上海苔粉提味,食客可自行沾上竹炭鹽同淋上檸檬汁,味道豐富得嚟更解膩。

咁點解係竹炭鹽呢?大廚解說日本人對食嘅講究,細至鹽粒都有好多種,例如綠茶鹽、柚子鹽、青椒鹽等。今次大廚選用竹炭鹽,則取其竹炭輕餘韻解膩並突出蟹肉鮮味。

多肉軟殼蟹 牛油果軟殼蟹卷
同朋友食日本料理,起碼都會Order 一碟卷物開心Share。呢度好講究擺盤美感,呢道卷物一上枱已忍唔住影張相先,口味揀咗大家一定鍾意嘅牛油果軟殼蟹,軟殼蟹超大隻,特別係尾部嗰件凸出大大隻蟹腳。

牛油果肉鋪上黑魚子,粒粒咬開輕脆,同軟綿綿牛油果夾埋一齊幾特別。

一試食材本身鮮味 炸海膽鵝肝
大廚將2種矜貴食材—海膽、鵝肝放埋一齊,而且無額外加調味料就炸香,食嘅係食材本身獨有鮮味、濃郁同Creamy 口感。因為炸漿夠薄,入口唔會覺得太厚重同膩,反而沾上少許竹炭鹽提升味道層次,自問係重口味人士一定要試。

花楽
地址: 將軍澳唐俊街21號翩滙坊地下G23號舖
電話: 23892628
* 資料由客戶提供
餐廳資料