近年牛扒界打卡之選，一定係超大份嘅斧頭扒！估唔到阿根廷高級扒房都食到喇。阿根廷每日直送斧頭扒確實坊間少見，高質斧頭扒係肉味濃郁兼爆汁，唔係度度搵到㗎。
“La Parrilla Steakhouse”木系紅磚裝潢好有歐洲感覺。
窗邊位遠眺大館，約會或聚餐都好有氣氛。
“La Parrilla Steakhouse”主打阿根廷牛，當地牛隻出名肉味濃。喺度可以食到唔同肉位靚扒之餘，仲有其他阿根廷料理㗎，好似阿根廷牛扒他他、自家製醃鴨胸肉、燒八爪魚等等。加上歐洲木系紅磚裝潢，情侶約會或一班人聚餐飲酒都好有氣氛。
阿根廷料理都係大大份，一邊飲酒、一邊share。
【阿根廷料理Special Menu】
Tomahawk斧頭扒
今次限定Special Menu最吸引一定係斧頭扒！每日阿根廷直送，當日貨量賣晒就無，可想而知有幾新鮮，想食記住早啲嚟呀。
阿根廷斧頭扒有咬感、肉味濃，仲可以食埋骨邊肉。
阿根廷斧頭扒少啲肥膏，偏瘦特色令佢肉味香濃、極富咬口。好鍾意呢種越咬越多肉汁，肉味慢慢爆發出嚟嘅感覺。唔知你有無留意，坊間斧頭扒多數會肉骨分離，而呢款阿根廷牛係食到特別濃味嘅骨邊肉㗎。
Steak Tartare 牛扒他他
如果好追求肉味，呢款牛扒他他更食到最原始嘅阿根廷牛味。一般嘅他他都好重番茄、洋蔥配料味道，而呢度嘅他他有好足料嘅生牛肉，每啖都食到軟綿綿牛肉口感。
牛扒他他充滿原始肉味。
食嗰陣可以將牛肉他他鋪滿蒜蓉包，鋪得越滿越好食呀！配埋希靈魚魚子醬嘅煙燻鹹香，更有層次又唔會遮蓋肉味。值得一讚嘅係蒜蓉包，烘到脆卜卜又重牛油味，每個細節都做得好好。
Duck Prosciutto醃鴨胸肉
相當花心思嘅一款菜，因為係自家將鴨肉醃製後再風乾14日，完全唔係一般來貨呀。一開始直接食啖已經滿口鴨油香，再慢慢細咬會滲出肉味。之後再配埋香草包、醃青瓜中和油感，又係另一種風味。
自家醃製風乾嘅鴨肉火腿，享受滿口鴨油滋味。
Entraña Sandwich 牛排三文治
阿根廷當地周圍都見到三文治，豬排三文治、血腸三文治都係地道美食，而“La Parrilla Steakhouse”就有啖啖肉嘅牛排三文治！恰如阿根廷烤肉店用上法國長麵包，酥脆內軟更有風味。牛排則係超厚切側腹橫肌(Skirt Steak)，肉位取自牛橫隔膜外部好有咬感㗎。
三文治有超厚切側腹橫肌牛排。
Octopus Grill 燒八爪魚
食咗咁多肉，自然想有啲海鮮中和吓。燒八爪魚一上枱已經好吸睛，勁大隻八爪魚好Q彈。因為特別慢煮6小時以上，即叫即燒特別香。而且呢度嘅菜式都係偏大份量，好似呢道八爪魚咁當作主菜，抑或一班人share都好夠。
八爪魚先慢煮6小時以上，最後即叫即燒好香口。
Langostino Pasta 阿根廷紅蝦意大利麵
阿根廷紅蝦嘅人氣，真係拍得住阿根廷牛肉，兩者都係肉味濃郁。所以大廚就將紅蝦直接剁碎鋪上意粉，保留紅蝦原始鮮味。醬汁則用蝦頭熬製，完全係鮮味精華，食落濃而不膩仲好creamy。最後簡單加入青檸皮、紅洋蔥點綴已經好好食。
用蝦頭熬煮意粉醬汁，香濃鮮甜。
Black Beans Hommus 黑豆及鷹嘴豆蓉
鷹嘴豆蓉係經典中東菜，綿滑富豆香。當地人會用粟米片刮滿豆蓉，又脆又綿係好好食嘅健康配菜。“La Parrilla Steakhouse”外國主廚就進一步加入美國菜元素，以黑豆蓉+鷹嘴豆蓉口感同樣幼滑，微甜豆香更有層次。
經典鷹嘴豆蓉加入美國菜元素，更多一重黑豆香。
Asparagus 蘆筍
外國人聚餐多數有肉、有海鮮同蔬菜，呢度嘅蘆筍就鋪上自家製麵包糠再焗。蘆筍夠新鮮有草香，同時多咗種香口脆感。
新鮮蘆筍鋪上自家製麵包糠。
Cheesecake 芝士蛋糕
甜品方面就有早前人氣爆發嘅Burnt Cheesecake，外層獨特焦香；內裡則綿密幼滑。配上芒果、熱情果醬，輕甜微酸滿足甜品幸福感，又可以解解膩。
人氣爆發Burnt Cheesecake，外焦內滑。
La Parrilla Steakhouse
地址: 中環雲咸街77號嘉兆商業大廈1樓
電話: 26378555