肉食控注意～音樂主題美式餐廳The Musicbox Grill House & Bar為慶祝踏入2週年，推出高CP值晚市套餐，主菜係12安士高質肉眼牛扒；另外更新推3款滋味肉料理同海鮮，當中嘅貓王漢堡，啱晒鍾意食花生醬嘅朋友𠻹。
【抵食2週年晚市套餐】
餐廳以牛扒做主打菜式，平時單點一份燒美國頂級肉眼牛扒，12安士係$538，而家做成套餐只需$388，有齊餐湯、沙律同甜品！你重可以優惠價$28起，升級加配各式酒類飲品同Mocktail。
2週年晚市套餐（$388/位）
開胃餐湯+沙律
餐湯有意大利雜菜湯、老海灣粟米周打湯兩款，後者嘅底味用蝦殼同蜆熬煮而成，入口鮮味突出。而凱撒沙律則灑滿芝士，蔬菜亦好清甜爽口。
老海灣粟米周打湯、凱撒沙律
12安士足料肉眼扒
餐廳嘅美國牛扒都選用US Prime Grade牛肉，今年嘅週年套餐就以12安士燒頂級肉眼牛扒做主菜。牛扒自家濕式熟成1個月左右，口感香軟，只需用黑椒、鹽略為調味就可以燒製。如果鍾意濃厚嘅牛味，可以蘸牛肉汁，用上大量牛骨、牛肉同蔬菜熬煮5日咁耐㗎！另外亦配自家製cowboy butter，用牛油、法式芥末等材料製成，甜中帶辣。
肉眼牛扒配烤大啡菇、薯仔同車厘茄
慢煮甜蜜燉蛋
收尾嘅法式焦糖燉蛋製作需時，有別於一般坊間做法，皆因用極低溫焗個半鐘，令燉蛋口感creamy幼滑唔實心。
法式焦糖燉蛋
【新品】
貓王漢堡
顧名思義，係由貓王Elvis Presley鍾意嘅花生醬培根香蕉三明治演變而成。亞麻籽麵包夾住香噴噴嘅牛肉漢堡扒、花生醬同脆口嘅培根，好似幾重口味，但有蜜糖燒香蕉喺中間，以甜味中和返，唔會過鹹。
漢堡扒有5.33安士，夠晒飽肚
芝士炸西班牙帶骨豬扒
厚肉嘅西班牙帶骨豬扒，低溫慢煮後再炸，成個過程都唔超過65度，切開依然保持粉嫩顏色。而巴馬臣芝士同麵包碎拌勻做成炸衣外，更大量灑喺豬扒表面，食落鹹香脆口。
芝士炸西班牙帶骨豬扒配tartar醬
美式水煮海鮮
美式風味嘅美式水煮海鮮，即係將各種海鮮放入袋再搖勻醬汁。餐廳為咗方便食客，設有2/4/8人分量，重幫你預先搖好，一上菜打開就食得。固定配搭有大蝦、蛻、青口、八爪魚仔、辣燻腸、粟米同薯仔，想豐富啲可以加配龍蝦尾、蟹等。而Cajun、蒜蓉牛油、麻辣味3款醬汁之中，店家推介Cajun，皆因用龍蝦汁等約30款材料煮成，鹹鹹辣辣又唔會蓋過海鮮嘅鮮味。
4人分量海鮮袋
美式水煮海鮮
餐廳以懷舊黑膠唱片機、珍藏黑膠唱片等作裝飾，打卡啱晒
The Musicbox Grill House & Bar
地址: 銅鑼灣駱克道459-461號The L. Square8樓
電話: 23386908
