香港人咁鍾意去旅行，無非想急促生活中放鬆吓，但未飛嘅你都要唞吓氣㗎。居港黎巴嫩人就開咗間“Shahrazad Lebanese”，全新菜單刪走fusion元素，黎巴嫩料理更傳統地道。逢星期四8:50pm、星期六10:00pm更有肚皮舞表演，全場響起阿拉伯音樂，舞孃隨時走到你身邊跳舞，以味覺、視覺、聽覺逃離現實，嚟一場異國旅行。
梳化位富異國氣氛，有咕𠱸攬坐得舒服。
露台位更加開揚，好啱飲酒傾計。
地道黎巴嫩菜 講究天然食材
其實黎巴嫩菜好健康，主要用新鮮食材、天然香料煮製，將調味料減至最少。所以“Shahrazad Lebanese”外籍主廚一直好堅持用外國食材，由主食材或小至番茄、番石榴、芝士等配菜都係外國直送，零味精煮出層次味道。
外籍主廚堅持用外國食材，零味精煮出層次味道。
飯局搞手福音！精緻素食&炭燒烤肉
黎巴嫩人平時以豆類、蔬菜為主，所以有好多素食料理，鷹嘴豆就係最常見食材之一。當地人會將鷹嘴豆打成順滑豆蓉；又會炸成外脆內軟嘅餡餅，單單天然豆香已相當好食。所以呢度好啱素食者一嚐精緻料理㗎。
當然，燒羊架、烤肉串、燒雞都係黎巴嫩嘅出名料理。“Shahrazad Lebanese”仲係少有香港餐廳設炭爐烤肉，做到高溫鎖肉汁又有炭香效果。一班朋友有齊食肉獸同素食者嘅話，終於有個地方畀大家飲酒盡興喇。
少見香港餐廳自設炭爐，炭香烤肉特別好食。
【唯美素食料理】黎巴嫩菜地道料理
就算平時唔係素食者，嚟到呢度都忍唔住試幾款。擺盤好靚之餘，最重要係零味精，只用天然食材就做到豐富味道，難怪黎巴嫩人每日都咁鍾意食。
黎巴嫩鷹嘴豆泥 Lebanese Hummus
鷹嘴豆蓉本身已經好綿滑淡香，當地人會用烤餅沾嚟食。呢度依傳統簡單配芝麻醬、檸檬、橄欖油，並以炸蒜片、原粒鷹嘴豆豐富口感。
鷹嘴豆及紅菜頭蓉 Hummus Beetroot
黎巴嫩人飯前會食各種cold/hot mezze，其實就係冷/熱前菜。當中豆蓉料理係常見又千變萬化，除咗頭先最基本嘅鷹嘴豆蓉，呢款cold mezze就將鷹嘴豆加埋紅菜頭，令豆香略帶清爽輕甜，又係另一種感覺。
炸鷹嘴豆餡餅 Falafel
Falafel 係經典中東菜，平時多數會搓成欖球形，今次大廚做成可愛嘅冬甩形好IGable。外層炸到硬脆，「卜」一聲咬開就係綿綿鷹嘴豆蓉，配上用乳酪、芝麻醬等製作嘅tarator醬，更加濕潤濃郁。
乳酪芝士 Lebneh
呢種乳酪芝士常出現於黎巴嫩菜，多數係自家製脫乳清乳酪，係近年網路人氣好高嘅健康食物之一。“Shahrazad Lebanese”同樣自家製作，可以用烤餅沾滿新鮮軟質芝士，伴番茄、酸瓜一齊食。
烤哈羅米芝士 Grilled Halloumi
坦白講，一直無諗過西瓜同芝士係可以咁夾。希臘、中東一帶都有出產嘅哈羅米芝士好鹹香軟糯，芝士味亦唔會太羶，試過都會好掛住呢款芝士呀。當鹹鹹香香撞上清甜爆汁西瓜、石榴糖漿等，一鹹一甜互相平衡，顛覆咗對芝士嘅刻板印象。
黎巴嫩素食煲仔飯 Hallat Khodar
黎巴嫩菜好講究香料調味，所以醬汁都好濃郁佐飯。當地煲仔飯同香港煲仔飯有啲唔同，餸菜醬汁較多，所以會同米飯分開呈上。佢哋嘅米飯較幼長乾身，撈汁食啱啱好。
扁豆湯 Shorbat Adas
秋冬自然想飲啲湯，經典中東菜就有呢款扁豆湯，主要以紅扁豆、蔬菜煮製，味道清爽並富營養。
【大份量Share】炭爐烤肉·外國海鮮
香港少有自設炭爐嘅餐廳，嚟到一定要試佢哋嘅烤肉同燒海鮮呀。黎巴嫩烤肉一直好出名，全部都大份啖啖肉。好似烤全雞、慢烤羊肩架都好大件㗎！由醃製、燒烤、配菜都係黎巴嫩菜傳統煮法，夠晒地道。
烤西班牙走地春雞 Farrouj Meshwi
外籍大廚特別介紹，呢道烤雞係黎巴嫩好地道料理，連沙律都係傳統風味嚟㗎。特別選用西班牙走地春雞，肉質嫩滑細膩，雞皮薄而惹味。
索性一手拎起雞髀沾dakka醬食好爽快，一咬開即刻滲出雞油，再食啖沙律解解膩。
慢烤羊肩架 Shahrazad Lamb Ouzi
“Shahrazad Lebanese”開業以嚟，佢哋嘅烤羊肉都好受歡迎。今次新菜單嘗試另一煮法，先以中東遊牧民族—貝都因人(Bedouin)常見香料醃製羊肩架再慢烤，配搭已調味嘅阿拉伯飯(Ouzi)別有一番風味。
黎巴嫩羊肉丸配希臘乳酪 Kebbeh Bil Labban
文中都提到，黎巴嫩人常自家製希臘乳酪，獨特綿滑奶香配肉、豆類或蔬菜都好夾，今次就將希臘乳酪醬滿滿淋上羊肉丸喇。
羊肉丸口感紮實綿密，有恰到好處嘅羊肉羶香。不時會食到清甜紅石榴肉中和肉味，平衡感做得好好。
芝麻醬煎鱈魚 Samak Bil Tahini
如果你都鍾意黎巴嫩菜嘅綿密醬汁，呢道芝麻醬煎鱈魚一定要試！鱈魚煎到啱啱好，魚肉嫩又keep到魚油。當然中東芝麻醬亦係重點，黎巴嫩人喜以芝麻製成黏稠嘅麻醬並稱為bil tahini，質感綿密卻不膩，配嫩滑魚肉一流。
Shrimp Matffie
另外2款蝦料理各有特色。Shrimp Matffie好重油香，煎大蝦配以橄欖油、檸檬、新鮮芫荽，香味會慢慢喺口中散發，飲酒必食。
Tiger Prawns
鍾意蝦味濃啲可以揀虎蝦。連蝦頭炭烤，再簡單配檸檬蒜蒔蘿牛油醬已經夠晒惹味鮮甜。
Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242