美式菜餚足料大份，而銅鑼灣呢間音樂主題美式餐廳The Musicbox Grill House & Bar更設有DJ台，又以黑膠唱片作裝飾，糅合現代同懷舊風格，好啱肉食控同潮流達人嚟打卡兼開餐！今個聖誕節推出嘅半自助晚餐包括多款招牌菜，如碳燒牛扒及香煎牙魚等；到時店內中間嘅長檯會好似自助餐咁，整晚輪流供應近廿款冷熱盤，包括美式水煮海鮮、焗蠔、松露蘑菇意式餃子等招牌菜式，選擇好豐富呀～
【鮮味餐湯】龍蝦湯
開餐前飲個龍蝦湯暖胃先～用大量嘅龍蝦頭同蝦殼焗香後，再煲幾個鐘熬成湯，入口鮮味濃郁，配埋蒜蓉多士更加香口。
龍蝦湯
【主菜4選1】
美國極佳級安格斯肉眼牛扒10安士
主菜提供牛、豬、羊、魚4款肉類同海鮮，配合唔同肉食控口味外，每款都分量十足！招牌菜式美國極佳級安格斯肉眼牛扒有10安士，用黑椒、鹽略為調味再燒，令肉味更突出。而跟配嘅牛肉汁同cowboy butter，前者用大量牛骨、肉同蔬菜熬煮5日；後者則用牛油、法式芥末等材料製成。
美國極佳級安格斯肉眼牛扒（$888）
烤蒙古豬扒10安士
同牛扒一樣，每份有10安士嘅烤蒙古豬扒，其實係美式中餐嘅菜式。餐廳選用西班牙栗飼豬，口感比較軟腍juicy。如果鍾意味道濃厚啲，師傅推介你蘸黑醋汁；想清爽啲則可以蘸莎莎醬。
烤蒙古豬扒10安士（$768）
燒羊架4件
餐廳選用慢煮方式炮製燒羊架，羶味適中，怕羶嘅朋友都可以一試。羊架用香草油及秘製材料調味再燒，再配薄荷啫喱同肉汁，伴上炸洋蔥圈、大啡菇都好夾。
燒羊架4件（$768）
香草牛油煎牙魚6安士
而紅肉以外，重有大大塊嘅魚扒！由於選用深海牙魚，魚扒比一般嘅厚身；師傅一邊用香草牛油煎香魚皮，一邊非常細心控製火候，確保肉質保持嫩滑而外皮香脆。連埋蜆肉一齊食，口感會更豐富同鮮味。
香草牛油煎牙魚6安士（$798）
【任食冷盤、小食】
自助餐檯輪流推出近廿款料理，全部都係任食㗎～冷盤有凍蝦、海螺同青口；熱盤除咗有美式水煮海鮮、焗蠔、蒜蓉牛油煮蜆、水牛城雞翼、四式芝士薄餅等招牌菜式外，重有芝士焗肉丸、松露蘑菇意式餃子等，選擇好豐富！
自助餐檯有各式海鮮同肉類小菜
冰鎮海鮮、水牛城雞翼
焗蠔、蒜蓉牛油煮蜆
【甜品】法式焦糖燉蛋
收尾嘅法式焦糖燉蛋，特別用極低溫焗個半鐘，質感好幼滑。再飲埋跟傳統方法，用玉桂、香料、橙等材料煮嘅聖誕香料熱紅酒或雜果賓治，絕對令人大滿足！
法式焦糖燉蛋
店內設有DJ台，牆上掛滿珍藏黑膠唱片
The Musicbox Grill House & Bar
地址: 銅鑼灣駱克道459-461號The L. Square8樓
電話: 23386908
