香港人一向識食，當然知道「廚師發辦」係最高級日本菜之一。但唔少人一直躍躍欲試卻未試，可能唔知邊度有得食之餘；又驚入到去坐低先知價格不菲。所以今次就出咗呢篇「新手攻略」，講吓邊度有得食又抵食，最重要係……究竟有咩食？(留意返，拉到文末仲有師傅上門煮嘅到會服務呀)
新手入門先講價錢，廚師發辦一般都有幾個價錢揀。價錢愈高，食材自然愈靚愈多。今次編輯發現呢間日本料理「寿々乃」反行其道，入門價套餐菜單仲抵過廚師發辦，我偷偷地數過喇，入門價晚市套餐HK$980 有9道菜；略貴少少嘅入門價廚師發辦HK$1,380 套餐都係6道菜，980蚊就食齊真鯛、海膽、鮑魚、拖羅……而家仲有「第二位半價」優惠超抵，明碼實價最啱新手。
每位HK$980 4 月份 「第二位半價」優惠詳情
訂座：預早2日訂位 |
呢度嘅晚市套餐菜單會列出菜式流程，新手就唔怕唔知有咩食啦。師傅當日會再揀新鮮食材入饌，所以每日食材都略有不同，但都係同等價值嘅日本魚喔！如果你有特別口味要求，例如唔食貝類、唔食豆類，唔使怕醜開口同師傅傾吓，師傅就會幫你調整菜單喇。
櫻花點綴 前菜五點盛
HK$980 菜單嘅9道菜，首先會有季節前菜五點盛，承傳日本人不時不吃傳統，由前菜開始都用時令食材，有春天先食到嘅螢光魷魚，爽彈又帶海水鹽香；仲有明太子石斑卷，食到明太子嘅香濃，又有石斑嘅煙韌口感。正值春天，仲有櫻花擺盤點綴。
清甜海鮮 季節清湯
前菜味濃，所以接落嚟就以季節清湯清清味蕾。今次編輯飲嘅係大蜆湯，味道清甜，唔會過鹹過濃，清味蕾確實唔錯。師傅就話視乎每日貨源，有時都會以日本蠔煮湯，蠔味比蜆更突出，好啱鍾意重海鮮味重嘅人。
厚切刺身 刺身四點
個人對刺身要求，第一要新鮮；第二要厚切，咁先真正食到魚肉嘅鮮味同質感，呢度嘅刺身確實合格之上。師傅亦因應春季，揀正值時令嘅白身魚—櫻島嘅間八、春天當造嘅青森縣帆立貝、鮪魚腩，揀魚眼光可見一斑。
刺身四點之中，仲有原碟真鯛薄切上枱。真鯛喺日本人心中舉足輕重，更有天然之魚之稱。春天嘅真鯛特別肥美，白身魚嚟講魚味相當濃，但又保持到清爽口感。
綿滑口感 雲丹茶碗蒸配海藻汁
其實口感綿滑嘅海膽同茶碗蒸好夾，師傅今次就將新鮮海藻熬煮3至5日，以海藻汁代水蒸出鹹香軟滑嘅海膽茶碗蒸。
超濃郁鮑魚 肝醬鮑魚
原隻鮑魚上場時，以為只係簡單輕煮就搞掂，但食落就知鮑魚味相當突出，一問之下原來係用清酒慢煮8個鐘嘅鮑魚。汁醬亦特別用鮑魚內臟煮，濃味控一定有驚喜。
原條日本魚 季節燒魚
日本料理店有膽量主打廚師發辦，表示對自家魚材、師傅手藝有信心，理所當然呢度嘅魚材唔係一般雪藏魚貨，而係成條魚新鮮運到。
講咁耐就係想講…呢度嘅燒魚比坊間更出色，講嫩講鮮絕對完勝雪藏貨。正值4月就係食清爽鮮甜嘅池魚；去到5月係鮎魚(香魚)季節，到時就食到鹽燒、汁煮或天婦羅嘅鮎魚喇。
壽司五貫 蔥鮪魚腩卷
壽司五貫一上枱，心諗呢HK$980 太抵吧？無諗過由前菜食到壽司呢Part，仲有咁大碟壽司等梗我。師傅就話壽司魚材唔會重複，想食客喺一餐入面試多幾款魚。而因為香港人都好鍾意食拖羅，所以一定會有大拖羅壽司＋拖羅魚腩卷。
最後飲碗麵豉湯暖胃後，就有自家製甜品。因為Handmade 關係都會因應食材改變，芒果芝士餅、沖繩黑糖鬆餅卷、雪糕等都有機會食到㗎！
個人覺得HK$980 菜單作為一人份相當飽，但心思思想試多幾款嘅話，呢度都有唔少單點時令食材揀，單點菜單同樣按季節定期Update，每次嚟都有機會試到新嘢。而家春季就有日本水域紅衫魚、八角魚- 魴鮄魚、螢光魷魚刺身、燒榮螺等。
近睇就知魚材幾新鮮～
打破外賣傳統 精緻日本料理外賣
而家除咗堂食外，仲有外賣同到會服務，兩樣都有驚喜。先講外賣係行高級路線，以壽司十貫為例，師傅笑言用咗好多冷門魚，平時嘅壽司外賣好小機會食到，旨在令食客外賣都食得精緻。
想食熟食外賣都有好多選擇，夏天就有清新開胃啲嘅太卷。餡料全熟，甜蛋、蟹柳、青瓜、冬菇等，簡簡單單嘅滿足感。
熱食方面亦相當奢華，有日式鵝肝蓋飯、香炸薩摩雞定食等。日本菜甚少有咁大份鵝肝，今次以蓋飯入饌亦相當聰明，以日本珍珠米中和鵝肝嘅濃厚，味道啱啱好。
而薩摩雞更係鹿兒島名物，第一啖就知同平時食嘅雞肉完全唔同，因為薩摩雞肌肉發達，纖維又細，所以結實彈牙得多，雞味亦特別香口，未食過嘅話一定要試。
而到會服務係超級驚喜，因為呢度無特定到會菜單，食客可以按喜好同師傅要求菜式外，師傅仲會親自嚟公司／屋企即場煮，根本就係「廚師發辦到會版」呀，將成個廚師發辦搬咗嚟屋企！！最重要係價錢真係好吸引，我自己都心思思想試呀……
到會詳情
價錢：午餐 HK$480／位 (10位起) |
寿々乃
地址: 銅鑼灣軒尼詩道525號澳門逸園中心7樓
電話: 23770228