呢兩年無得去旅行,都開始慣咗周圍搵啲打卡餐廳食飯,但多數都係日本嘢、法國菜…無諗過黎巴嫩菜都係一種選擇,晚飯後甚至有種想去呢個地方睇吓嘅衝動,但唔知仲要等幾耐…
由黎巴嫩當地人開嘅Shahrazad Lebanese,煮嘅係正宗黎巴嫩菜。雖然香港人對黎巴嫩菜唔算熟悉,但其實當地最古老文明遠自幾千年,飲食文化被地中海健康文化影響,所有材料同調味都係用新鮮食材,主要以穀物、蔬果、香草、橄欖油入饌,係健康清爽嘅菜系。
![](https://www.openrice.com/userphoto/CMSContent/0/74/001EOM881633E2B548C77Aj.jpg)
黎巴嫩菜主要以新鮮食材入饌,品嚐食材最原始味道。
甫入店內已好有異國氣氛,眼前大窗恰好對住紅磚大館,窗前放有夢幻藍色梳化、中東色彩吊燈;左邊則有特色牆同露天座位,成間餐廳都好開揚舒服,令人心情Chill 住迎接今晚晚餐。
![](https://www.openrice.com/userphoto/CMSContent/0/7C/001G7T33767914BBE50B2Bj.jpg)
一入門口,即見大窗映透大館紅磚牆。
![](https://www.openrice.com/userphoto/CMSContent/0/7C/001G7U90F36B3D792964F7j.jpg)
店內充滿異國氣氛。
地道食法 先食前菜Mezze
地道黎巴嫩菜會先食Mezze,即餐前小菜。冷盤多數以醬類、沙律為主,味道輕酸微甜,開胃為主;熱盤則有香口小食,同朋友邊傾邊食炒熱氣氛。
冷盤Mezze 天然食材顏色繽紛
呢度冷、熱Mezze 選擇都好多,今次冷盤就試咗Hummus Shamender、Jebna Hara、Baba Ganoush、Mix Cold Mezze,都係用薄餅蘸嚟食。
粉紅色Hummus Shamender 咁搶眼唔使擔心,因為佢哋唔係用色素,而係用蔬菜─紅菜頭、鷹嘴豆嘅天然顏色,味道清甜。作為香港人已習慣少菜多肉,都忘記咗原來天然食材係咁靚。
![](https://www.openrice.com/userphoto/CMSContent/0/74/001EOP95375EB3BF071FD1j.jpg)
Hummus Shamender
另外Jebna Hara 用辣芝士;Baba Ganoush 則以茄子、檸檬汁製成蓉,食落香濃,用嚟餐前飲吓酒幾正。
![](https://www.openrice.com/userphoto/CMSContent/0/74/001EOQ55AACF699FFB8EB5j.jpg)
(左) Jebna Hara、(右)Baba Ganoush。
Mix Cold Mezze 正如其名集合幾款Mezze—Hummus、Mutable、Muhammara、Truffle Labneh,一次過食到鷹嘴豆蓉、煙燻茄子乳酪蓉、炭烤紅椒核桃蓉、新鮮薄荷乳酪黑松露蓉。
![](https://www.openrice.com/userphoto/CMSContent/0/74/001EORC7BF4999E6897364j.jpg)
Mix Cold Mezze 可以一次過試到幾款Mezze。
前菜冷盤有沙律
前菜都有幾款沙律畀你揀,Tabouleh、Dunyazed Fattoush 均以蔬菜為主,都係比較清爽微酸。Tabouleh 以新鮮芫荽、番茄、布格麥為主,食材切得較碎好啱夾薄餅;Dunyazed Fattoush 就有青瓜、番茄、蘿蔓等,蔬菜咬感就強啲。
![](https://www.openrice.com/userphoto/CMSContent/0/74/001EOS983562851518A4B9j.jpg)
Tabouleh
![](https://www.openrice.com/userphoto/CMSContent/0/74/001EOT30A03F7576B069F5j.jpg)
Dunyazed Fattoush
熱盤Mezze 香口濃郁
熱盤以地道小食為主,而且唔係平時食開嘅炸雞翼薯條行貨之流,好有新鮮感。個人最愛Falafel,雖然呢道炸鷹嘴豆球好多人都食過,但呢度做得好有層次
口感,外層炸得硬脆,「卜」一聲咬開就係內餡鷹嘴豆蓉。
![](https://www.openrice.com/userphoto/CMSContent/0/74/001EOU61ABC019300A9459j.jpg)
Falafel
呢道Kibbeh 望落有啲似Falafel,但相對全素嘅Falafel 恰好相反,Kibbeh 係用料十足嘅肉丸,以碎牛肉、免治牛肉混合松子、小麥蓉而成。外層比較薄脆,食落有肉香鬆軟,相比紮實口感Falafel 又係另一種滋味。
![](https://www.openrice.com/userphoto/CMSContent/0/74/001EOV4278AC511F59A2A5j.jpg)
Kibbeh
Roasted Eggplant 則於香烤茄子放上新鮮番茄、Feta Cheese,茄子多汁香濃,完全展現到黎巴嫩菜點樣將天然食材都煮得咁濃郁。
![](https://www.openrice.com/userphoto/CMSContent/0/74/001EOW900EA263A79729B7j.jpg)
Roasted Eggplant
如果你同我一樣鍾意雞肝嗰種軟糯口感,就一定要試呢道Swdat Djag,以雞肝、芫荽炒成,配飯或薄餅都好正!大廚巧妙地以檸檬、石榴醬中和雞肝膩感,所以食落濃味得嚟又幾開胃。
![](https://www.openrice.com/userphoto/CMSContent/0/74/001EOXBB7FD65D70557C31j.jpg)
Swdat Djag
超嫩!慢煮Prime 級牛肉
估唔到牛控食黎巴嫩菜都有必食菜式,私心大推Lahma Bil Fasolia!係慢煮USDA Prime
牛肉,最正係牛肉超厚切,可以話係大大件長方形咁呀!因為牛肉已經慢煮到好鬆軟,就算超大啖咬落去都完全唔韌,仲滲出超香濃肉味!
個人最欣賞肉質煮得恰好,鬆軟得嚟保留到牛肉咬口,唔會腍到入口散開晒,少量膏位仲入口融化,完全做到愈咬愈有牛味嘅效果。
![](https://www.openrice.com/userphoto/CMSContent/0/74/001EOY682BD7C8C989FAA5j.jpg)
Lahma Bil Fasolia
原始味道!大大件燒羊肩
點樣先睇得出食材高質?最簡單就係大廚夠膽用最簡單配料,就愈見得對食材有信心,因為原始味道已夠做!呢道慢煮羊肩正正係寫照,簡單將羊肩烤香,外皮焦香,入口輕鹹少羶已經好正。
![](https://www.openrice.com/userphoto/CMSContent/0/74/001EOZE83AFF42A7663A29j.jpg)
Shahryar Ketf Kharoof
小朋友才做選擇 震撼多肉拼盤
雖然牛肉、羊肉同樣吸引,但小朋友才做選擇,我全部都要!超大份拼盤Shahrazad Ultmate Mix Grill Meat (Large),就集合咗羊架、雞肉、牛肉,食落有炭燒味,盤中仲有木炭維持熱度,打卡一流。
拼盤會跟Tomeya (忌廉蒜醬) 同 Tahini (中東芝麻醬),蘸醬瘋狂食肉勁爽,並可揀 飯 或 薯條。最估唔到個飯幾有驚喜,係用牛油同橄欖油入焗爐煮成,加埋滿滿Nuts,飯粒軟綿又有Nuts 脆口。
![](https://www.openrice.com/userphoto/CMSContent/0/74/001EP0BD4CB4B33C7D9CF1j.jpg)
Shahrazad Ultmate Mix Grill Meat (Large)
![](https://www.openrice.com/userphoto/CMSContent/0/74/001EP1FE06826B07E3FDEBj.jpg)
拼盤有大份量羊架、雞肉、牛肉,燒得有炭香。
海鮮都有得食!
除咗多款肉食 呢度亦有海鮮揀,呢款Grilled Prawns 將虎蝦燒香,夠多肉鮮甜。而且開埋邊畀你,唔使慢慢剥殼咁麻煩。
![](https://www.openrice.com/userphoto/CMSContent/0/74/001EP209142D9D353E732Bj.jpg)
Grilled Prawns
閨蜜約會一定要有甜品
甜品同樣有雜錦拼盤揀,同閨蜜Share 份量啱啱好。
![](https://www.openrice.com/userphoto/CMSContent/0/74/001EP312338F523B0BB05Fj.jpg)
Oriental Pastry
獨家雞尾酒 呢度先飲到!
同場有十幾款Cocktail 同 Mocktail,全部由駐場調酒師設計。如果想試黎巴嫩特產酒,呢度亦有當地紅酒揀。
Rock Glass
將無花果混入Gin 酒,再加入Mancino Rosso Vermouth、意大利苦酒,拌入冰塊同燒橙皮,味道偏剛烈。
![](https://www.openrice.com/userphoto/CMSContent/0/74/001EP4ADCA3CF66829D8F3j.jpg)
Coupe Glass
紅辣椒混入Vodka,再有蘋果汁、檸檬汁同蛋白等,口感綿滑清爽。
![](https://www.openrice.com/userphoto/CMSContent/0/74/001EP5250EF34F02633321j.jpg)
Flute
荔枝汁、玫瑰糖漿、檸檬汁加上意大利氣泡酒Prosecco,輕甜易入口,好啱女仔飲。
![](https://www.openrice.com/userphoto/CMSContent/0/74/001EP6A46C1ADCA287CA66j.jpg)
Tiki Glass
Dark Rum、Coconut Rum 加上Kahlua 咖啡、菠蘿糖漿,極有層次變化,好有驚喜。
![](https://www.openrice.com/userphoto/CMSContent/0/74/001EP772305333E03E031Fj.jpg)
Shahrazad Lebanese Dining Lounge & Bar
地址: 中環雲咸街75-77號嘉兆商業大廈2樓
電話: 23300242