韓國料理呢幾年喺香港大行其道，所以揀韓國餐廳自然更嚴格，如果係韓國人主理嘅就更好，可以一試當地傳統口味嘛！今次食呢間Bingo & Cook 就係廚師至樓面都係韓國人為主，最重要老闆都係韓國人，仲會親身落場煮，味道更貼近韓國人口味。
一入店映入眼簾嘅係淺色木條，由門口延伸至天花到牆壁，加埋垂吊小燈泡、可愛小物裝飾，係一種溫暖小店感覺。呢度嘢食路線唔係花巧路線只畀大家打卡，反而著重食物質素同韓國味道。
開放廚房食得更放心。
米酒生菜包肉&豬腳套餐
講到最招牌菜嘅，一定係米酒套餐～可以配生菜包肉或豬腳。想試真啲Oppa 老闆手勢所以揀咗Special Menu 米酒生菜包肉&豬腳套餐，一個價錢食晒2款肉感覺幾抵。
一上枱係估唔到咁大份，先講碗裡其實係韓國傳統米酒—Makgeoli，無燒酒咁嗆口；但又比啤酒香，輕帶甜味，亦可以要求Makgeoli 加梳打水試另一種口味。上枱時，侍應會畀埋小碗我哋舀嚟飲，韓國人最鍾意用Makgeoli 配生菜包、豬腳，米香酒香可以引味解膩，三五知己邊食邊飲幾Chill，即刻諗起韓劇中韓國人夜晚去小店飲酒食肉嘅生活畫面。
生菜包肉同豬腳係用各種香料、香草同店家特製調味料一齊煮，唔會太鹹可以放心配辣椒、醃蘿蔔絲同甜辣醬，佐酒啱啱好。口感方面，豬腳皮煮得彈牙，入口又有種骨膠原化開嘅口感，好鍾意韓國人用蔬菜包住嚟食嘅方法，健康啲口感又豐富啲。
韓式無骨烤雞
香港人最熟悉嘅韓國料理，不得不提必有韓式炸雞，Bingo & Cook 係用新鮮雞肉同自家配方，Keep 住炸雞外皮超脆、雞肉Juicy 多汁，今次揀嘅韓式無骨雞仲灑上花生粒，香口得嚟又有啖啖嫩滑雞肉。仲有4款醬汁，可以食到幾款風味。
牛肉炒粉絲
早於韓風前，牛肉炒粉絲已係我好鍾意食嘅韓國傳統菜之一。因為韓國人處理牛肉有佢哋獨有嘅方法，令牛肉特別軟腍同鹹中帶輕甜，味道層次比較豐富。呢度嘅牛肉同樣用特殊醬油醃製，再同蔬菜、粉絲合炒，Oppa 老闆特別介紹呢道係正宗韓國味道。
海鮮蔥餅
蔥餅都係傳統菜之一，呢度嘅蔥餅有6款口味揀，五花肉泡菜餅、烤牛肉韮菜餅、薯仔煎餅口味等都有。今次我哋就揀咗海鮮蔥餅，店家喺控制蔥餅嘅鬆脆、柔軟同濕潤度落咗唔少心思，入口脆得嚟又有好多蝦肉，內餡幾軟綿。
韓式炒年糕
好多人對煙煙韌韌嘅韓式炒年糕抗拒唔到，每間餐廳又會演繹出唔同味道，每次都有啲驚喜。呢度嘅炒年糕就用蔬菜、拉麵同辣椒醬煮製，味道辛辣中帶甜，口感特別煙韌。食前將年糕沾上多啲汁，咬吓咬吓滲出甜辣味幾過癮。
魷魚勁道麵
韓國有款超Q彈麵叫쫄면，嚟到呢度就名為「勁道麵」，係韓國特有嘅麵條超軟彈有咬口。一般勁道麵都做成撈麵，今次店家就煮得暖暖的～配埋炸魷魚、芝士、熱湯食又係另一種味道！最吸引係炸魷魚超大隻，直頭要剪開先食到，香炸魷魚＋勁道麵同樣有咬口，好推介鍾意QQ口感嘅人！
部隊鍋
唔少香港人都係部隊鍋嘅粉絲～所以Oppa 除咗落足料外，仲特別為香港人熬煮靚湯底，以雜菜湯長時間熬煮多款蔬菜、五花肉煮出精華。最後鋪上五花肉、年糕、午餐肉、茄汁豆等配料，無論配料同濃厚湯底都好吸引！
Bingo & Cook
Instagram: https://www.instagram.com/bingo_and_cook/
地址: 銅鑼灣駱克道487-489號駱克駅2樓
電話: 24558766