想喺尖沙咀搵個地方飲嘢唔難，但想搵個有Cocktail 飲又有大份量海鮮食嘅地方真係唔多，諗深一層香港本身就好少地方有大盤海鮮食，難得嚟到呢間Poseidon 有Outdoor 位，連海鮮拼盤都有冷、熱兩款口味揀，確實有種去到外國嘅感覺。
海鮮拼盤一上枱真係好似唔喺香港咁，中間有大隻波士頓龍蝦，側邊鋪滿生蠔、鮑魚、翡翠螺、雞尾凍蝦、藍青口、蜆，仲有一杯杯加拿大海膽。想食得盡興啲亦可以再追加波士頓龍蝦、海膽或特級鱘魚魚子醬。不過呢度仲有好多其他海鮮菜式，細食嘅話可以留肚試多啲。
正值10月，亦係食法國生蠔嘅季節。海鮮拼盤就用No.2 法國蠔Size 啱啱好，肉質飽和、海水味濃。拼盤跟埋泰式辣醬、紅酒醋、雞尾酒醬，係店家獨家調製，微酸輕辣，試吓將海鮮配唔同醬開胃又唔會膩。
生蠔Size 啱啱好，海水味濃。
店家溶雪控制做得好，鮑魚彈牙得嚟亦唔會冰到無味。
除咗海鮮冷盤，呢度仲有烤龍蝦海鮮拼盤，熱盤食落係另一種氣氛，比較香口惹味。如果形容冷盤為啱情侶浪漫晚餐；咁熱盤嘅氣氛就好啱一班人熱鬧咁食～
Poseidon Grill
熱盤海鮮有原隻波士頓龍蝦、香蕉蝦、扇貝、魷魚、三文魚、藍青口、蜆，海鮮類同冷盤有少少唔同，換上更加掛汁嘅魷魚、三文魚，因為熱盤係用豬肉腸、烤蒜頭、牛油多士、粟米一齊烤焗，令油香滲入海鮮更惹味。拼盤跟埋肯瓊醬、蘿勒青醬，個人比較鍾意香蕉蝦同青口沾醬，個味豐富啲又Juicy 啲。
驚食唔晒成個海鮮拼盤，但又心思思想食吓龍蝦海鮮，叫呢個波士頓龍蝦海鮮燴飯都幾好。海鮮燴飯唔係得個名，真係鋪滿蜆、青口、蝦、八爪魚仔等等。龍蝦就一分為二，分別用烤海鮮拼盤嘅兩個醬—肯瓊醬、蘿勒青醬焗，香口得嚟亦Keep 到龍蝦味。
飯底係傳統西班牙煮法，飯粒比較濕潤，令海鮮精華更易融入每啖飯。
除咗大份量海鮮外，呢度仲有幾多A La Carte 值得一試，好似呢款煙三文魚他他就有驚喜。他他由幾層組成，分別係最頂嘅金箔、鱘魚黑魚子、煙三文魚，去到下層嘅紅菜頭、藜麥等，全部都係有獨特口感同營養，好建議由上層𢳂到底一次過食晒咁多料，口感味道都好有層次。
意粉方面同樣以海鮮為主，並且係西餐比較少見嘅湯意粉，湯底係用馬頭魚骨熬製12個鐘，魚味濃郁，夾雜日本靈芝菇、海膽，令魚湯更Creamy 同有咬口，食完意粉一定要飲埋。
扒類就有美國頂級肉眼扒配大頭蝦，10安士肉眼扒切開肉質幾粉嫩，咬落亦有肉汁，配埋黑松露醬絕對合格之上。而大頭蝦出名蝦味濃同蝦膏多，絕對拍得上龍蝦嗰種香濃蝦味，肉質亦彈牙，比一般大蝦吸引得多。
外國回流嘅大廚想創作更多海鮮為主嘅Fusion 菜，呢道酥炸麒麟馬頭魚就係其中之一，唔用西餐常見嘅淡味魚柳，改用脆口馬頭魚幾有驚喜。
點解話馬頭魚特別脆口，因為佢特點係唔使起魚鱗，炸後一支支魚鱗會自然豎起，加埋獨家啤酒秘方，魚皮脆口、內裡魚肉嫩得嚟有微微酒香，加埋輕酸檸檬牛油汁完全唔膩。
呢度好多菜式都大份量，食飽後用檸檬雪葩清爽吓確實唔錯，雪葩連檸檬皮都食得，酸酸甜甜，食完幾舒爽。
呢度亦有啤酒、紅白酒，同埋各款獨家調配嘅Cocktail 同Mocktail，呢杯Poseidon 就係佢哋Signature Cocktail，夢幻藍色係由Rum、Blue Curagao、菠蘿汁同青擰汁調成。
仲有其他Cocktail 揀，唔少選擇都幾清甜好啱女仔飲。
唔飲酒嘅話都可以揀Mocktail。
Poseidon Restaurant & Bar
地址: 尖沙咀亞士厘道24-38號天星大廈4樓
電話: 25118299