其實小朋友可愛得嚟，真係幾煩㗎。講梗嘅煩，係照顧佢哋飲食嘅煩惱。有時我哋大人冬天凍冰冰想食個烤魚，都因為小朋友怕辣而唔敢去。所以今次特別介紹間有辣有唔辣嘅烤魚店—「小魚兒」，足足有7款湯底揀，全部魚材都係即日喺香港街市買，新鮮健康，小朋友一齊食都好放心！
辣度．麻度 全部自己揀
店家共有7款湯底，全部可揀小辣至大辣。自問無辣不歡嘅可以揀「活火山泡椒剁椒豆花」，超足料泡椒、辣椒加辣油。魚肉入口先有輕麻，後續味蕾就會Feel 到慢慢滲出香辣後勁，而且湯底越食越辣。食到最後，加埋韓式年糕、薯粉吸滿湯汁仲正。
小朋友都啱食 開胃酸菜魚
大人食麻辣烤魚，小朋友都有啱食嘅酸菜魚—「老壇酸菜豆花」，唔駛再驚小朋友坐隔籬又悶又發牢騷。酸菜魚微鹹微酸程度可用清爽嚟形容，湯底唔算好濃，魚皮輕脆、魚肉鮮甜，係小朋友平時少接觸嘅魚味，就算平時唔食魚都會肯食，都算係改善偏食陋習嘅好機會（笑）。
原條魚食更爽 4款魚材揀
「小魚兒」有江團魚、海鱸魚、比目魚柳同沙巴龍躉4款魚揀，最有人氣係原條魚上嘅江團魚同海鱸魚。原條魚上可以食勻每個魚位，小朋友仲可以食最嫩嘅「面珠墩」同「魚尾」位。而江團魚厚肉嫩滑；海鱸魚就少骨，小朋友同「唔識食魚」嘅人都啱食。
外賣食烤魚！聖誕新年Party 唔駛煩
嚟梗聖誕新年，想成班人留喺屋企暖笠笠食烤魚，「小魚兒」仲有外賣烤魚！外賣烤魚套裝有齊火鍋架、火酒膏、錫紙盤、湯底、烤魚，打開外賣盒就食得超方便。盒上仲有QR Code，一掃即有教學片教埋你整，唔駛擔心手忙腳亂。
店家貼心準備2個火鍋膏，起碼可以食90分鐘。
輕酌小杯 有居酒屋氣氛！
烤魚除咗可以追加手切安格斯肥牛、黃金魚皮等火鍋配料外，堂食仲有串燒揀，加埋多款清酒、啤酒，直程可以當呢度居酒屋咁，一班人飲吓清酒、食吓串燒烤魚，好有Feel 㗎！
多人食仲可以叫啤酒塔，超有氣氛。
引入日本炭爐 串燒健康又有炭香
串燒係用日本炭爐＋陶炭燒，比坊間串燒更有炭香味，唔只係無靈魂地燒熟就算。而且陶炭環保無炭灰，小朋友食都無問題。
最有驚喜嘅係燒白鳝！因為即日來貨，新鮮白鳝咬落特別彈牙，咬開仲滲出魚油，推薦必食！
燒雞中翼火喉亦控制得好，雞皮燒得夠脆，灑上孜然粉辣辣哋幾有風味。
食完烤魚串燒想清甜吓，仲有焦糖燒菠蘿。焦糖外層輕脆，菠蘿亦多汁輕甜，用嚟做甜品一流。
小魚兒
地址: 尖沙咀金馬倫道16號金馬大廈1樓
電話: 23282122
