去過東京大阪等地的釣魚居酒屋，一定覺得好玩又難忘，而想喺香港邊釣魚、邊食嘢嘅居酒屋，一定係諗起呢間位於觀塘全港首創釣魚船的「釣魚船屋」。可以坐喺入面用餐嘅大船已經好搶眼，仲有兩個大魚池釣魚，真係幾有氣氛同噱頭，唔駛去日本都有得邊玩邊食啦! 但唔好以為佢哋只係賣噱頭，原來刺身、熱食全部都有水準，今次先唔講釣魚，睇吓佢哋有咩食先。
好大個魚池，畀魚游水同養海鮮。
魚池有專人打理，確保魚種新鮮乾淨。
仲有幾間VIP房用餐，私隱度高。
釣魚船屋刺身盛(竹)
刺身款式夠多，大熱嘅挪威三文魚、日本三重縣吞拿魚、海膽都有。全部都係新鮮來貨，鮮味清甜亦唔會有雪藏味，食都食得放心。
海膽松葉蟹肉麵豉甲羅燒
將鵪鶉蛋倒入蟹蓋中，撈勻海膽、松葉蟹肉同蟹籽已經聞到好香。海膽份量夠多夠濃，蟹肉相對清爽啲，另外都可以配麵包食解解膩。
海鮮雜錦壽喜燒
海鮮壽喜燒份量比想像中大，海鮮類好豐富，日本蠔、文甲魷魚、帆立貝等等都有。清甜嘅壽喜燒湯底配海鮮就啱晒，唔會搶走海鮮鮮味，仲有提鮮效果。編輯覺得日本蠔最正，輕輕煮幾分鐘即食，保持到肉質肥美，咬開仲好Juicy。
蒜蓉片海膽炒飯
大廚將珍珠米炒至乾濕適中，再加入海膽粒炒香。所以口感有珍珠米嘅煙韌，又有粒粒海膽嘅軟綿。
A4和牛馬糞海膽名物卷
和牛同海膽呢個配搭真係無得輸，而且卷物上仲有魚子醬點綴。入口先係一粒粒爆開嘅魚子同埋海膽嘅海水味。和牛味反而唔算好濃，而係食佢嘅軟綿口感，大廚成功將幾種矜貴食材加埋一齊，味道恰到好處。
清酒煮蜆
沙白蜆比一般蜆肉肥美、爽口啲，唔會煮完縮得太細而無咩肉食。清酒湯底煮得清澈，加上日本大蔥點綴，隱約酒味又帶點清甜，食蜆之餘都忍唔住飲咗幾啖湯。
海膽天婦羅卷
紫菜入面全部都係加拿大海膽，用料都幾貴㗎，難怪坊間比較少食到海膽天婦羅卷。紫菜炸得脆口，海膽軟嫩之餘，又會咬到少少一粒粒海膽，外脆內軟嘅口感幾豐富。
濱燒海鮮盛(2人前)
可能因為店家有大大個魚池養住海鮮，所以燒完嘅貝殼類都唔會好乾，反而好有海水鹹香。新鮮鮑魚超大隻，入口彈牙好食係預料之內；而北寄貝都好有驚喜，爽口又多汁。同場仲有生蠔、沙白蜆、馬刀貝同日本元貝。
釣魚船屋燒物拼盤
串燒拼盤有鹽燒手羽、免治雞肉棒、鹽燒赤雞腎、日本青椒仔、煙肉車厘茄、鵪鶉蛋、雞皮同雞軟骨。
呢度有魚釣又坐得舒服，其實好啱一家大細嚟，如果小朋友同老人家唔慣食生冷嘢，呢度嘅串燒都好推介。自問有選擇困難症嘅話，就可以點呢個「釣魚船屋燒物拼盤」，店家話呢個拼盤集齊晒最受歡迎嘅串燒喇！編輯自己就最鍾意雞翼、雞皮串燒，真係燒得好脆、好香口。
菠蘿雪葩
日本直送嘅菠蘿雪葩用菠蘿肉打成，味道微酸清甜，好啱飯後消滯。仲要係原個菠蘿上，小朋友見到一定好開心。
釣魚船屋
地址: 觀塘駿業街56號中海日升中心2樓H室
電話: 36188260