日式鐵板燒新店「N.28 Teppanyaki」進駐飲食熱點尖沙咀！新店主打西日Fusion特色嘅鐵板燒，精緻用心程度猶如Fine Dining。加上所有時令食材均由日本空運直送到店，包括日本金賞米沢和牛、蝦夷鮑魚、時令海產等等，結合主廚嘅用心同獨家研發嘅醬汁，為客人帶嚟全新嘅鐵板燒體驗。
餐廳裝修走後現代風格，客人可以坐喺吧枱前欣賞師傅烹調過程，增加互動
24年經驗Roy主廚 創出西日Fusion料理
餐廳由主廚Roy同坊間少見嘅女師傅小磊主理，Roy師傅入行24年，師承日籍師傅，曾於多間酒店高級料理、西日創意餐廳等任職，擅於運用傳統日式烹調技藝，同時加入西式元素。而小磊師傅亦入行27年，曾於多間日式餐廳擔任主廚，手藝同樣出眾。
米沢和牛霜降油花分佈均勻，油脂入口即溶
選用山形縣A5米沢牛 連續8年金賞
鐵板燒有多款套餐選擇，招牌之一係以山形縣米沢和牛為主嘅「金賞米沢和牛鐵板套餐」。米沢和牛至今連續八年獲得國際肉類大賽金獎，同松阪牛、神戶牛並列為日本三大和牛。特色在於山形縣當地早晚溫差大，加上冬天天氣寒冷，令米沢牛有完美均稱嘅雪花紋理，融點低而肉質纖細。餐廳更選用評價最高、極品中嘅極品A5等級米沢牛。
金賞米沢和牛鐵板套餐 時日前菜 鐵板蒸蛋配魚子醬 米沢和牛他他配海膽 日本北海道活北寄貝 銀鱈魚 田園沙律 米沢和牛薄燒 米沢和牛厚燒 日本葷菜三款 鮑魚海膽黑松露釜飯 季節湯 廚師精選甜品 |
時日前菜
套餐第一道菜選用煙燻手法炮製，神秘嘅白煙籠罩之下係慢煮羊肚菌鮑魚、薑汁煮黑梅貝及自家製櫻桃蘿蔔漬。鮑魚先以羊肚菌日式醬汁慢煮約六個鐘至完全入味，同時保留其彈牙口感。薑汁煮黑梅貝則以薑汁嘅微微辛辣提鮮。最後以蘋果木煙燻，增添香氣同時喚醒味覺。
「時日前菜」選用時令食材，例如呢道慢煮羊肚菌鮑魚及薑汁煮黑梅貝
鐵板蒸蛋配魚子醬
惟妙惟肖嘅蛋形容器裡面係以日本九州雞蛋製作，蛋香濃郁口感嫩滑嘅蒸蛋。最後以魚子醬同紅菜頭苗點綴，前者特別挑選法國Kaviari出品，帶金黃色澤，一咬就喺舌尖上爆發鮮味。
「鐵板蒸蛋配魚子醬」用上法國Kaviari魚子醬，相當矜貴
米沢和牛他他配海膽
和牛他他選用米沢和牛嘅肉眼頂部，特色係肉質鮮嫩，入口會有淡淡和牛油脂香氣。配搭海膽及香蔥，旁邊再淋上意大利黑醋及日本山芋。海膽同山芋都係口感柔滑嘅食材，配和牛他他都有更添嫩滑嘅效果，一試難忘。
米沢和牛第一食，先以「米沢和牛他他配海膽」突顯其鮮嫩肉質
日本北海道活北寄貝
接住落嚟兩道海鮮菜式盡顯師傅手藝，首先係日本直送嘅北寄貝，師傅會拆出北寄貝肉直接放喺鐵板上面煎，亮點在於灑上清酒嘅時候，酒精揮發帶出北寄貝嘅香氣，真正做到色香味俱全。北寄貝熟度掌握得宜，口感爽脆、帶清酒米香。
燒「日本北海道活北寄貝」時會灑上清酒，瞬間滿室鮮香
銀鱈魚
師傅會將魚肉同魚皮分離，魚皮煎至金黃薄脆，唔講仲以為食緊即炸魚皮！魚肉則煎至僅僅熟透，肉質嫩滑富魚油香氣。配搭師傅炮製嘅有馬山椒汁，香甜微辣，辛香可以平衡銀鱈魚嘅油膩感。
「銀鱈魚」嘅魚皮同魚肉分開處理，能夠食到雙重口感
米沢和牛薄燒
米沢和牛再度登場，師傅參考壽喜燒嘅方法，先將米沢和牛嘅西冷薄片分別放到壽喜燒醬汁中輕灼，最後喺充滿和牛油香嘅醬汁中加入雞蛋，稍煮至半熟再淋上面。裹上蛋漿令米沢和牛更為細緻嫩滑，同時香甜嘅醬汁令人齒頰留香。牛肉下面嘅烤野菜更係吸滿牛肉精華啊。
米沢和牛第二食參考以壽喜燒方式
「米沢和牛薄燒」裹上蛋漿更為細緻嫩滑
米沢和牛厚燒
既然選用到日本三大和牛之一，而且係最高嘅A5級別，當然要以鐵板燒經典之一厚燒方式帶出脂香！特別係米沢和牛以霜降油花分佈均勻、肉質入口即化而聞名。厚燒能夠鎖住肉汁，同時帶出油脂甘香。可以自由配搭炸蒜片、昆布鹽、香草淡雪鹽同味噌醬增加味道變化。
米沢和牛第三食，以經典厚燒做出突顯油脂甘香嘅「米沢和牛厚燒」
鮑魚海膽黑松露釜飯
炒飯亦足見師傅心思，先用鐵板將部分配料、飯及松葉蟹膏炒過，令松葉蟹膏嘅鮮味滲入飯粒中。炒完放到釜鍋中，再放上黑松露醬、鮑魚，最後加入日本直送海膽刺身，每啖飯都充滿多重海陸鮮味！
「鮑魚海膽黑松露釜飯」集合海膽、鮑魚、松葉蟹膏及黑松露醬，鮮味滿分
田園沙律、季節湯
廚師精選甜品
完整嘅一餐又點少得甜品？選用日本沖繩黑糖，自家製作成香甜彈牙嘅果凍，加上新鮮水果，整體甜而不膩。
最後以「廚師精選甜品」，為豐富大餐畫上甜美句號
餐廳設有魚缸，客人能夠挑選新鮮海鮮
N.28 Teppanyaki
地址: 尖沙咀棉登徑28號錦榮商業大廈地舖
電話: 23888990