會所1號 萬濤 (已結業)

拉釘結婚了，恭喜恭喜，招乎唔到，食多兩舊、飲多兩杯，千奇唔好客氣！慣性囍宴都等要到九點先開飯，想餓死朕咩﹗囍宴前走轉尖沙咀金湖隊碗牛腩麵打定底穩陣喇。七半到達會場，立即開波飲兩啖啤酒開開胃，大會指定啤酒藍冰！真 Ice 流砂冰。往年曾試過 8 位 1 席都已非常經典，從來未試過 5 位 1 席爽乎呀，預計好飽好飽。李拜銀、黃格仙、宅男甲、哈佬喂加埋我，想食幾多有幾多，抵呀。不過最後加埋攝師及化師，湊夠 8 位好意頭，變成 8 位 1 席嚕。瞄瞄菜單都係基本那些，心裡有數。遁例進場、演講、播片、咀咀，開飯喇﹗鴻運脆皮乳豬，百年難得一遇，宇宙最強！滿分無得彈，就算頂級酒店中菜廳都未必有如此高質美豬供應呀！皮脆肉嫩暖笠笠，肉香多汁性感誘惑，半肥瘦散發淡淡香料芬芳，加兩滴乳豬醬更如虎添翼！不其然連食 6 件都唔夠喉，豬腳都被我全部沒收。野菌泡蝦球，配上湯紹菜神奇創新，還各據一方，河水不犯井水，得意有趣。觀賞性極高，超重份量，唔怕您唔飽。爽甜紹菜一片片堆得整齊有序，菜甜味出眾非凡，幾疊幾疊的塞入嘴，簡單的調味，爆汁爆水香醇濃郁。大大碌的蝦一粒已塞到我嘴仔脹卜卜，滿足地趙。蝦肉爽爽，鹽啤得不算過份，微微蝦甜，還感受到原始氣息。彩椒加菇菇爽甜清新，夾著紹菜蝦碌齊齊品嚐更豐富更安慰。百花海皇卷，聽個名已估到係炸沙律海鮮卷，我最不喜歡的料理，都比面試舊吧。新鮮出爐滾熱辣，厚厚的炸皮，質地口感味道十足十食緊煎堆一樣，分子調理嗎？薄如紗的沙律醬，連餡料都食不出來，吉列麵團？珊瑚扒翡翠，初期睇菜單時滿心歡喜以為有珊瑚蚌食，原來得幾篤蟹子呢！真身為蛋白蟹肉扒西蘭花。晨早烚好的西蘭花已放涼，淋上暖暖芡汁加蟹子點綴，禮成上檯。西施蟹肉芡淡淡的、微溫的、厚厚的，已凝固一劈。室溫西蘭花爽脆，輕輕清新菜甜味，滾上豆瓣醬咸香配菜汁，在平平淡淡中帶點樂趣。高湯海味翅，侍應嬸嬸比錯紅糖水，朋友碗翅變成啫喱味，笑死！嬸嬸入廚房搵正確的浙醋，但遲遲未回，我都已經食晒咯。肉絲食到，腍劈劈質地，外觀蚯蚓一樣。皇帝的翅針，睇唔到亦食唔到。腥得出奇的湯汁，免強吞落肚，嚇死朕咯！腥味明顯來自魚肚，用醋漱漱口。清蒸海石斑，緊緊熟剛到位，火辣噴煙出場，驚喜的演繹。結實肉質噴出肉汁，魚味濃濃清香，厚厚啖啖肉，海斑的特點。魚肉滾上精華及豉油，食得開心暢快。魚頭魚尾魚鰭滑嘟嘟充滿骨膠原，甜美無限，啜得乾乾淨淨。翡翠蠔皇鮑片，色澤鮮明賣相吸引，食慾增加不少。鮑片炆得異常軟棉，味道質地都似足鮑魚菇，真的疑幻似真，真假難分。反而蠔汁生菜實實在在的鮮甜爽嫩啊！用生菜捲著唔知鮑片還是菇片齊齊食，蠻喜歡的食法，心理平行很多呢。脆皮吊燒雞，果然係齋吊無炸過喎！凍冰冰腍劈劈巢巢的雞皮，內外油膩感同樣旺盛，咸咸的沒有雞甜味，低於水平的處理。龍芽花菇炆伊麵，毫無期待的最後炒麵炒飯，本來直頭不打算外賣，但我覺得試啖無妨，好食咪帶走囉 ﹗估您唔到十分驚喜，稀有的高質出品。即炒上檯無欺場，熱燙燙完整彈滑的伊麵，味道甜美清香，菇味與醬油味黃金比例撞得出色，唔該幫我全部包起去﹗砂鍋雞絲飯，跟伊麵一樣比個機會您，淺嚐一啖仔。乾爽嚥韌有鍋氣，蛋香雞甜好開胃，落味可口香噴噴。多年囍宴的不愉快經驗，難得最後的不凍不濕不爛，色香味非凡，請幫我全部包起外賣。…查看更多

自己同身邊朋友都踏入適婚年齡，所以近期不停收到炸彈XD 除咗有朋友訂定今年5月喺Clubone時尚康山擺酒之外，我喺1月尾亦去咗沙田萬濤飲舊同事果餐。我都係第一次喺Clubone飲，原來侍應係會幫忙分餸的，因為我果檯我只認識4-5位前同事，有人分埋餸就食得冇咁尷尬啦~鴻運脆皮乳豬第一味例牌係乳豬，皮夠脆但有少少肥，每人分咗兩件之後仲有幾件剩低，夠食有餘啦。 野菌泡蝦球野菌就唔係好多，反而似甜豆炒蝦球先係主角，蝦球大隻又爽口，而且味道清淡唔會以濃醬汁為主，有時好怕去飲每個菜都加XO醬。甜豆雖然同荷蘭豆好似樣，但甜豆嘅豆莢會比荷蘭豆肥厚D，味道又甜甜地。 百花海皇卷外皮炸到鬆脆又夠熱，我一向都鍾意食海皇卷，咬開中間有好多菠蘿酸酸地十分開胃。本來都希望有人唔食炸野，我就可以分多件，可惜個個都食晒XD 珊瑚扒翡翠原本以為係珊瑚蚌炒西芹之類的物體，原來係蟹肉扒菠菜就真。白色醬汁落咗好多蟹肉去煮，食到啖啖蟹肉嫁！而且菠菜個莖係中空狀態，所以更易吸汁！ 雲腿雞絲燴花膠去飲我一向都不太熱衷於食翅，用花膠仲好過魚翅啦，環保又養顏。唔好以為金華火腰絲就咁放面會唔入味，雲腿甘香味其實10級濃郁撲鼻~ 清蒸海石斑平日我都唔係太鍾意食魚，唯獨是去飲可以食到嘅海斑例外~ 好幸運我分到魚背多肉又冇骨嘅部份，夾埋大棵蔥段一齊食真係滋味無窮~ 翡翠蠔皇鮑片終於食到一個較為濃味嘅菜式，蠔皇鮑片向來是個天仙配，但底下的生菜卻真正令我一試難忘。印象中我只有喺國內先可以食到爽甜嘅生菜，無諗到生菜雖然唔係呢味餸嘅主角，偏偏比主角更突出，一咬爽脆又清甜。 脆皮吊燒雞呢一味我之前同屋企人喺尖東薈ClubOne食過，同上次一樣咁好食~ 外皮經油泡後極度酥脆，但食落一啲都唔覺得油膩，隻雞本身脂肪唔多所以唔洗怕食到成口油。師傅醃雞嘅味道比例亦調較得宜，因為過多鹽份會令到肉質太結實，而家少少鹹味就唔會掩蓋雞隻自身嘅肉香了~ 砂窩雞絲飯食到呢刻已經有7成飽，平時飲宴中嘅炒飯 &伊麵我通常都只會二選一，但眼見今餐炒飯及伊麵賣相都非常誘人，所以兩樣都食晒~ 雞絲飯粒粒分明夠乾身，食落覺得幾夠鑊氣。 龍芽花菇炆伊麵伊麵同樣出色，面頭大花菇肉厚又炆得夠入味，咬落好Juicy~~ 意式泡芙酥 + 蓮子百合紅豆糕好有心思嘅甜品，終於唔洗食紅豆沙同西米露~ 紅豆糕咬開中間有爽口百合，如果可以俾我食多十舊八舊就更好了。 終於有機會食到Clubone婚宴菜，冇諗到Clubone一向都以裝修靚而聞名，而原來金玉其外，內在嘅食物質素亦相當有水準~ 雖然廚師功力係先決條件，但都要靠侍應們夠眼明手快，先可以keep到每味餸都咁新鮮熱辣嘅~ 在此祝賀一對新人佳偶天成，甜甜蜜蜜！…查看更多

人長大了，開始要面對人生不同的抉擇。讀書如是、工作如是，愛情也必如是。最近一直忙著為即將舉行的婚禮尋覓場地，在一番轉折下很榮幸獲邀來到位於沙田萬怡酒店的ClubOne萬濤參加婚宴試菜式活動，品嚐這間近年崛起的婚宴集團菜餚是否合意。甫進入會場，便看到一座令人想起周星馳在國產凌凌漆中唱「李香蘭」情景的白色鋼琴，以及歐陸風情的花花牆，十分吸睛。白色的佈景也充滿歐陸色彩，帶點文青風味。場地採取長廳設計，約可坐滿24席。眾賓客與主人家之間的距離較為親近，相信在這裡的婚宴氣氛必定很熱鬧。婚宴最重要自然是好意頭。第一道菜便擁有具霸氣及意頭於一身的「鴻運脆皮乳豬」，在新年前夕吃上特別有格調。乳豬的外皮烤得金黃爽脆，皮下的脂肪十分豐厚，入口鬆化惹味，咬下去時那清脆的「卜」爆裂聲充份體現廚師的功力。第二道菜是野菌泡蝦球。平常在婚宴或大典宴會吃的蝦球一般都是配上西芹。ClubOne萬濤的這道菜一反傳統，以野菌加上四季豆作為配搭，吃起來味道協調，每一口鮮蝦的味道都滲著一絲絲野菌的滑嫩口感，十分好吃。在粵菜中，所有以蝦膠製作的菜式也通稱「百花」。這道百花海皇卷自然就是內有蝦膠的海皇卷。其表皮炸得色澤金黃，外頭的炸粉份量恰如其份。內裡更是軟滑無比，酸甜有致。這道菜的名字珊瑚扒翡翠充滿霸氣，看起來只是把蛋白和蟹肉淋在菠菜上，但要保持蛋白的滑嫩、蟹肉的鮮味之餘，又能吃出菠菜的鮮嫩，卻殊非易事。在ClubOne萬濤的這趟嘗試，也可說是誠意十足。現時婚宴大都響應環保，魚翅早就不是必備菜式。若長輩們始終喜愛魚翅的口感，這道雲腿雞絲燴花膠也許是個好選擇。湯底濃稠、花膠和雞絲的份量足，喝起來口感一流。婚宴菜式又怎能少了魚呢？這道清蒸海石斑肉質鮮甜，吃起來啖啖肉，味道清新。一向對蠔油的濃稠惹味情有獨鍾的我，每次看著它與鮑片的配搭，都引得我食指大動。這道翡翠蠔皇鮑片也沒有令我失望，厚重的蠔油味道，加上彈牙可口的鮑片，真是一大享受也。作為一個雞肉控，甫見到這道脆皮吊燒雞也不禁有種口水直流的感覺。雞的外皮炸得香脆可口，肉質也相當豐富美味。猶記得周星馳在食神中的那道經典黯然銷魂飯好吃得令人流淚，這道砂鍋雞絲飯的功力也不遑多讓。飯炒得金黃味濃，飯粒煙韌有咬口，加上用砂鍋烹煮而成，火候十足，令人回味。蠔油，蠔油everywhere。有說因為伊麵以長度著稱，寓意愛情也是一樣長長久久難離難捨想抱緊些，茫茫人生好像荒野……因此也是婚宴必備菜式。伊麵的醬汁固然美味，滲入麵條後更顯得鮮甜，加上冬菇的滑嫩，雖然到了試菜尾聲，但我還是吃個一滴不漏。到了最後的甜品環節，出乎意料地是個驚喜。意式泡芙酥和蓮子百合紅豆糕一中一西的配搭甚有心思，兩種甜品都令人充滿甜甜的感覺，呼應新婚婚宴的甜蜜喜慶感。…查看更多