宏鮨芯 (已搬遷)

天氣熱辣辣，食壽司刺身就最岩胃口，今日妹妹帶我黎宏鮨芯，佢話食過好好食。門口同入面都四正，仲有啲日本燈籠呀扇呀做簡潔嘅裝潢，環境好舒服寬落飲品呀食物種類都多，生食為主，一般刺身都會叫到，有魚類有貝殼類。聽妹妹講，甲羅燒係招牌菜。老實講，呢道菜我完全冇概念係咩，原來係蟹膏同蟹籽，放係法包上面，完全好有高級感覺，好新鮮。之後我哋叫左個三人份刺身，望落去啲色水好靚，食落都係爽口，唔腥。完全唔洗靠個鼓油同wasabi 都已經好好食。黎到主食，叫左個牛油果軟殼蟹反卷，份量都幾多，有七件。軟殼蟹係現炸，食落去仲暖同脆卜卜。小食有南瓜天婦羅，炸粉厚度適中，南瓜咬落去岩岩好軟熟，外脆內軟。野飲就叫左巨峰梳打水同柑吉蜜。梳打水甜度溝得岩岩好，唔會死甜得糖漿味，同成個餐配埋就都幾fresh。 柑吉蜜聽妹妹講都重柑吉味，唔會好水味咁。食物質素對得起個價錢！我哋都食到好飽，從vcity行多幾步，就有間舒服，非連鎖嘅鋪頭，絕對會再encore!…查看更多

成日行去屯門市廣場時，都見到有間日本燒物餐廳，今日終於有時間嚟食個晚餐。餐廳外觀都幾吸引，裝修到成間日本傳統燒物店一樣，好有去咗日本嘅感覺，入到餐廳座位都好寬敞，店員都好熱情招呼。睇咗一輪，好多嘢想食，但點得多又驚食唔哂！ 最後都係點咗個浜燒二人前，可以試下多啲種類，首先嚟個花甲味噌湯，中規中矩啦，飲完個湯等咗一陣就所有食品，陸陸續續地放喺枱面！ 最吸睛嘅當然係鹽燒虎蝦，黃金焗蠔和主角嘅宏蟹味噌甲羅燒啦！當然其他嘅刺身沙律和三款刺身都唔錯，最尾嘅燒汁原條烏賊飯就剛剛飽哂肚了。鹽燒虎蝦食落爽口，黃金焗蠔有驚喜食落香滑爆汁，至於甲羅燒就真係有大阪食蟹膏嘅感覺，味道鮮甜入口即溶。食返啲沙律菜和魚生就剛剛可以中和噃。烏賊飯就啱啱補充返啲碳水化合物，而燒汁撈落飯到味道適中。真係一個好滿足嘅晚上。…查看更多

放假約咗小師妹食好西，平時去開屯市，今日行遠少少去到新墟個邊食日本菜。首選浜燒午餐，有最多人推介嘅甲羅燒。之前完全唔知係乜嘢，問問店員，店員好樂意咁樣解答我，原來甲羅燒係蟹蓋上面有蟹膏同三文魚子，配上麵包點蟹膏。另一樣海鮮可以喺帆立貝同花竹蝦裏面揀，選擇咗帆立貝。跟餐有日式炒飯。成個蟹蓋都塞滿咗蟹膏！ 食落有鮮味，一啲都唔腥。解開神秘食法，Jam咗師妹嘅珍珠白飯配蟹膏，比配麵包/炒飯更帶出鮮味。帆立貝燒得好正，浸喺牛油當中，食落有牛油香甜。剩低嗰啲牛油帆立貝汁配飯極好味。師妹嘅北海道魚生丼好豐富，有兩隻大甜蝦、四片三文魚、四片帆立貝同三文魚籽。刺身夠新鮮。甜蝦爽甜，三文魚算厚切。喺屯門都好少見到甲羅燒，對於呢個甲羅燒新體驗好滿意，會來再竹encore同發掘其他高質嘢。…查看更多

餐廳環境開揚光亮，座位闊落，餐枱非常大，坐得舒服，仲有d日式裝飾，夠雅致。當日12點半左右到食lunch，有lunch set menu提供，亦有單選燒物、刺身、壽司等，好多選擇。叫左浜燒午餐($98)，三文魚魚籽親子丼($98)。自選2款食材揀左甲羅燒、帆立貝，即叫即燒。甲羅燒蟹膏稠綿，製味過後既蟹膏鋪滿蟹蓋，非常香。混合蟹子後，口感更佳，咬落去卜卜聲，鮮甜美味，拌飯食一流。除左淨食外，亦可以配搭熱烘後既法包片，脆口。帆立貝燒開後，有濃濃既牛油香味，肉嫩唔韌，邊食邊飲埋燒出黎既汁，完全唔覺得膩。日式炒飯飯粒做到粒粒分明，炒至乾身，但食落濕潤。炒飯加入魚糕、粟米、紅蘿蔔粒等配料，炒到成碗飯金黃色。花甲面豉湯鮮美，加入花甲煮製後，更重海鮮甜味，花甲肉亦不錯。親子丼配有沙律、面豉湯，除左主角三文魚，伴碟既牛蒡，估唔到幾好食，自己少見餐廳會配埋。厚切三文魚大大塊鋪係米飯上面，新鮮肥美，紋理清晰。大大粒魚籽連飯一齊食，晶凝通透，咬開爆汁，好爽之餘，仲有陣陣海水味，鹹鹹咁。整體，可以好舒服咁嘆高質日式料理，係一件好寫意既事。lunch set選擇又多，重要lunch都食到甲羅燒添。而且，侍應服務周到，入座提供茶水，有禮貌。…查看更多

好人好事絕對要支持！o係fb 見到，呢間日式餐廳每日o既下午時份都會派飯俾附近d 長者，係良心企業~ 一於過o黎食個lunch，醫飽自己之餘，餐廳賺到錢自然又可以做更加多o既善事！午餐有成26 款丼飯、拉麵、刺身壽司定食揀，但係最eye-catching o既一定係浜燒午餐($98 無加一)，包兩款海鮮浜燒，另外再有湯、沙律同一個炒飯。浜燒做set lunch 真係好少見，之前食開都係散叫逐隻計……而家夾埋晒都唔使$100，感覺超抵！首先個面豉湯係有花甲，真材實料，飲落唔同外面得股死鹹o個d，反而係有種清甜o既味道。一小兜田園沙律，以胡麻醬調味。主角海鮮浜燒，三選二，揀o左甲羅燒同帆立貝。聞到好香燒貝殼燶燶地o既氣息，令人流晒口水……甲羅燒滿口蟹肉蟹膏o既精華，附以兩片烘麵包，塊多士本身都係熱熱的，可以搽得好厚大滿足！帆立貝亦好大隻，燒至全熟，好重牛油香，食落彈牙實淨。仲有碗日式炒飯，加入咖哩炒至黃黃的。我特登留番少少甲羅燒d 膏，用o黎送飯更覺高級~試埋佢d sashimi，寫o左一份甜蝦($68/5本)，實物非常吸引，估唔到我咁樣單點一份都有冰底，製作認真。d 蝦全部都粗身鮮甜，仍略帶膠狀口感，夠晒新鮮美味~個午餐加$8 可以配特飲，我點o左杯凍柑桔蜜，都好飲。我本來想叫酒飲，但餐廳o係飲品選擇就比較少，都有sake o既，但只有per bottle，如果per glass 得啤酒。希望下次o黎有燒酌之類o既o野飲就更完滿了！…查看更多

今日去左宏鮨芯食午餐，我叫左個浜燒午餐，因為一見到有甲羅燒就被呢個餐吸引左！海鮮三選二，我要左甲羅燒同帆立貝，跟餐有花甲麵豉湯同日式炒飯。我另外要左份油甘魚(4切)同三文魚(4切)油甘魚同三文魚刺身都非常厚切，啖啖肉，正！😋😋浜燒午餐物超所值！甲羅燒超多蟹膏！用來塗喺脆脆既多士上面食，一流！😋😋😋帆立貝都好新鮮，爽口，又大粒！😋麵豉湯完全唔重味精，反而好鮮甜！😋日式炒飯粒粒分明，不過有點乾身，但撈埋帆立貝既汁就岩岩好！😋餐飲我要左杯熱柚子蜜。呢餐lunch令我好滿足😊…查看更多