炭兎

大肥爸爸最愛十三少，XO仔於父親節當日專登約咗枱麻雀俾佢消遣，晚餐就帶佢去灣仔一家幾人氣嘅居酒屋「炭兎」度歡樂一番。樓上餐廳佔用面積全層，門口左方位置展出多款是日精選嘅海材。週日晚全場爆滿，早於OR網上訂座嘅幾口子準時到步即有吧位坐。用餐大堂光線充裕，以木為主嘅間隔足以散發出和風味。開放式廚房就係前面，食物好自然地最為新鮮熱辣！餐桌上擺有企理嘅自助餐具、紙巾、牙籤及調味料。居酒屋文化，埋位第一時間當然係先黎杯啤酒啦！由於生啤早已售罄，最終就試咗枝帶甜嘅牡蠣司陶特啤酒（$88）。多頁餐牌可於網上參閱，細佬就冇特別去影，只係影咗黑版上嘅節令推介。炙燒和牛卡爾帕喬（$118）：碟底嘅炙燒和牛鬆潤多汁，揤上檸汁再撈埋舖面嘅蔥絲、蔥碎及芝士絲即倍添清爽，相當開胃。是日生蠔（$78/隻；$128/隻）：精選生蠔款式每天不同，歡迎貴客任點唔嬲，不過揀前記得問清楚啲海鮮價。兩隻唔同種嘅生蠔同樣白雪雪、滑嘟嘟、脹卜卜，入口柔滑細嫩，鮮美尤甚。蒲燒鰻魚（$148）：大肥讚個鰻魚燒得好香口。青椒仔（$28/串）、生海膽雞柳（$42/串）、鹽燒五花肉（$38/串）：串燒大多以拼盤上。第一碟中嘅青椒仔明顯唔係小肥叫嘅；生海膽雞柳一串有四件，以生海膽點綴雖則係濃味啲，無奈用紫菜包住嘅雞柳肉質比較乾嚡，組合唔係幾得；鹽燒五花肉肥瘦均勻，食落十分爽脆。鹽燒雞腎（$38/串）、味噌雞頸肉（$38/串）、味噌雞頸肉（$38/串）、鹽燒雞軟骨（$38/串）：兩串雞腎食落有啲燶，幸好夠爽口；雞頸肉就唔係好得，因為兩串都冇乜皮，好似食雞肉串咁，完全唔係嗰會事囉！雞軟骨串原來係胸骨嗰種，咬落唔算特別脆，不吃也罷。鹽燒牛舌（$48/串）：牛舌每串約有三件，鹽燒嗰串十分鬆爽，個人只係略嫌咸咗少少。汁燒牛舌（$48/串）：汁燒嗰串味道就甜美得多，不過唔知點解好似縮咗水咁。鹽燒雞尾（$38/串）：雞尾粒粒Q彈爽脆，依個食得過！汁燒免治雞肉（$38/串）：熱辣辣嘅免治雞肉軟嫩中帶著微微脆卜卜，黏上月見生雞蛋黃豉油迅即添上鮮濃與香滑，外層如果可以燒耐少少效果應更佳。鵝肝免治雞肉（$58/串）：球狀嘅免治雞肉串上加咗pat鵝肝醬，賣相認真唔吸引，又腥又嚡嘅肝醬直頭係污染咗串免治雞肉，典型嘅畫蛇添足呀！食到咁上吓，溫婉嘅服務生突然每人送咗杯清酒，講明係老闆請大家飲嘅。全場飲勝一刻成功掀起一度高潮，堅有氣氛！天婦羅盛合（$168）：炸至金黃嘅天婦羅外脆蝦彈牙。湯底燒冬菇（$45）：厚厚嘅冬菇半腍半彈，芳香不油膩，用湯浸住唔會覺得乾。北海道布丁（$38）：甜品北海道布丁香滑甜美，簡單可口。灣仔樓上居酒屋「炭兎」環境光鮮企理，服務生態度優良，送酒菜式質素就甚為參差，仍有頗大嘅進步空間，店子勝在老闆請飲酒識搞氣氛，可以一試嘅。…查看更多

放工同朋友去左一間樓上日本居酒屋，一進店就被滿滿嘅日式氛圍包圍，木系裝修嘅環境，日籍師傅喺開放式廚房用心烹調。鐵盒燒廣島生蠔廣島生蠔用鐵盒蒸熟，熱氣騰騰，仲要好大隻，鮮嫩多汁，另外加左Raclette Cheese，散發濃郁嘅奶香，芝士嘅絲滑與蠔肉的鮮甜非常夾。沙丁魚明太芝士沙丁魚炸至非常脆，明太芝士微辣鹹鮮味，夾住脆脆嘅沙丁魚另有一番風味，作為佐酒小食岩哂。薑葱醋鯖魚卷鯖魚肉質細嫩，醋漬後魚肉更清爽，酸度恰到好處，薑葱鮮香，口感豐富。拖羅大根卷拖羅脂香濃郁，肉質綿滑細膩，帶有淡淡嘅鮮甜味，入口即化。炙燒和牛卡爾帕喬薄薄和牛略帶大理石紋理，表面微微焦香，牛肉入口即化，肉質細膩柔滑，充滿油脂香氣。山芋明太子鐵板燒山芋口感細膩，明太子醬汁鹹鮮適中，帶著一絲微辣，放係鐵板熱辣辣。串燒牡蠣豚肉：烤得微焦嘅豚肉外皮略帶脆感，包住肉質滑順嘅牡蠣，多汁柔嫩，唇齒留香。鶏腿肉：雞皮烤得勁脆，雞腿肉多汁鮮嫩。夾餅紅豆雪糕（配士多啤梨雪糕）夾餅脆口，入面勁大球士多啤梨雪糕味雪糕，加埋紅豆餡料，充滿層次。梅酒甜甜地，好易入口。…查看更多

超有氣氛嘅日本餐廳🇯🇵 仲有香港少見嘅爐端燒、超高質手掌咁大嘅牡蠣✋🏻🦪，必須收藏🩷環境Bar枱位唔少，好有日本氣氛，店內亦有日籍廚師。有食客生日仲有敬酒環節超好氣氛部份餐牌 炙燒和牛卡爾帕喬 $188 冷盤炙燒和牛卡爾帕喬，Carpaccio 係指切成薄片嘅生的肉片🐗/魚🐟，呢到用炙燒和牛，紋路清晰，脂肪平均，做前菜唔會膩。 鹽燒銀杏 $68 健康小食燒銀杏佐酒談心，都係唔錯前菜選擇。 鐵盒廣島生蠔 $240/6隻 招牌牡蠣🦪 有來自唔同地區，鐵盒蒸蠔來自廣島，出名在廣島優越嘅地勢，寧靜海浪和適度潮汐，令牡蠣可以係豐富嘅營養物質下成長，特別飽滿，肉質厚而軟熟，仲帶Juicy鮮甜，真係好好食😭 仲可以加熱溶Raclette Cheese🧀 (+$48) 鹹香配海鮮鮮味另一食法。 炭火燒鳥 $168 既然店家叫「炭兎」，當然要食炭燒🍢，炭火燒鳥以石板上，保持溫度，雞粒炭火味突出，佐酒一流。 紫菜卷雞柳（海膽醬） $42、自家製肉丸 $38、雞腿肉 $42、牡蠣五花肉卷 $38 而串燒叫咗紫菜卷雞柳（海膽醬） 、自家製肉丸、雞腿肉及牡蠣五花肉卷，串燒皆可選鹽定醬汁燒，新鮮燒加食材靚，每款都唔錯👍🏻 子持香魚（爐端燒） $128 是日推介之一嘅子持香魚係用爐端燒處理，肉質細緻，魚身帶有一絲清香，連帶飽滿綿密嘅魚卵，另外子持香魚係無需清理內臟連埋一齊食，特色在於微苦味道搭配魚肉食別有風味。 山芋明太子鐵板燒 $78 自從係日本食完山芋明太子鐵板燒一直都想再食😍 呢到有，當然要叫！配上生蛋、蟹籽，超級creamy😋…查看更多

呢間灣仔店超有氣氛，日本人主理，食物又有質素，好岩feel～我地今次又食豪左，鐵盒燒牛蠔加左拉克萊特芝士落3隻蠔！無芝士確係食到好突出嘅鮮味，有半溶芝士就會加上咸香味道，睇住由燒到熔芝士嘅過程，真係會流口水！日式洋食屋嘅義大利前菜 - 炙燒和牛卡爾帕喬，今晚真係整得好好食，外層燒香、肉嫩無筋，配洋蔥檸檬汁，酸酸地好醒胃～一口size嘅薑葱醋鯖魚卷好perfect，裡面有薑、蔥、醋鯖魚，又酸又辣又juicy～呢度嘅串燒、燒魚係好正，可以睇到傳統嘅爐去燒，比普通火槍燒更香。另外，呢度入貨嘅明太子質素好日本地道，甜辣鮮恰到好處～所以鰯魚（沙甸魚）伴明太子、鹽燒鷄肝、芥末鶏柳、鶏腿肉，都好味～特別嘅山芋（淮山）明太子鐵板燒，又滑又黏之餘有明太子獨有嘅鮮辣味，仲有墨魚粒增加口感，唔係度度有。仲有個呢度signature嘅栃尾油炸豆腐，係新潟縣中央的小鎮栃尾歴史悠久嘅鄉土料理，師傅將呢款油豆腐上而加上吻仔魚，好似壽司咁好吸引，配上薑茸更好味。摸住杯Calpis Soda傾計都好暢快～…查看更多

 「囲炉裏」是日本傳統古民家火爐，主要用來生火煮食及取暖，位於灣仔的炭兎正是香港罕見的圍爐燒居酒屋。餐廳裝潢時尚，擁有開放式廚房，可以近距離觀賞到師傅們在爐火旁的精湛廚藝。大約八時會有店員揮起鼓棒擊鼓，為客人慶祝生日，氣氛熱鬧。全場所有人送上一人一小杯清酒助興，投入日本的居酒屋文化。店內最大特色就是特設傳統圍爐，在沙堆上放置備長炭，再把海鮮插在亮著明火的炭爐旁。餐廳由前米芝蓮餐廳日籍師傅主理，供應多款傳統及創意日式料理，選擇繁多。鐵盒燒廣島生蠔 (6pc) $240 加配 拉克萊特芝士+$48選用size較大的肥美廣島蠔，放在鐵盒中燒熟，火候控制得剛好，嫩滑多汁。開蠔後仍能吃到混雜海水鮮味的鮮甜蠔肉，還可自行加上新鮮檸檬汁、日本瀨戶內檸檬辣椒醬及唐辛子等，肉質甘甜爽口。另加$48就可為其中三隻舖上牽絲Raclette芝士，加熱後用刮刀一刮，讓濃郁奶香的熱融芝士緩緩流淌到生蠔上。炭燒"雞" $168餐廳引入了日本三大「地雞」之一的「名古屋交趾雞」，以燒熱的石板上枱，佐以明太子醬。切成小件的連皮雞肉，經過炭火的洗禮，炭香煙燻味完全滲入雞肉之中，加上地雞有足夠運動量，口感緊實富彈性，肉味比平時的雞肉更加香濃。炙燒和牛卡爾帕喬 $188Carpaccio做法就是將生牛肉切成薄片，以醃漬方法處理後變得軟身，最大限度地保留了牛肉的生鮮肉香。和牛保持嫩紅色，保留豐滿肉汁，一放入口就吃得出是上乘品質的牛肉，肉質鬆軟富油香。鱈魚一夜干 2枚 $108一夜干的做法就是把鹽度調節至接近海水的味道，連鮮味也濃縮了。燒至皮脆肉嫩，魚肉雪白嫩滑，調味不重，不會蓋過白身魚的清爽鮮甜。山芋明太子鐵板燒 $78鐵鍋熱呼呼，從頭吃到底都可保持熱度，山藥質地濃稠帶黏性，裹上炙燒後更出鮮味的明太子，混合八爪魚切粒和流心蛋黃，層次感豐富。免治雞肉 $38將雞肉切碎混合雞軟骨，口感更有嚼勁，蘸點日本蛋漿，滿溢濃濃蛋香，入口更滑溜。燒飯糰 (明太子) $48飯糰外層烤得酥脆焦香，中心位藏有條狀明太子，為簡單質樸的日式烤飯糰增添鹹鮮香氣。自家製法式栗子蛋糕 $128以糖漬栗子作點綴，由特製機器把和栗醬絞成纖幼細絲，並撒上白雪般的糖粉，賣相精緻誘人。香醇綿密的栗子蓉瀰漫著濃厚甘甜栗香，緊緊裹著雲呢拿雪糕和蛋糕，感受栗子蘊含的木質香氣在口中優雅釋放。夾餅紅豆雪糕 抹茶 $38抹茶與紅豆向來都是絕配，將冰涼抹茶雪糕與和甘甜紅豆蓉叠在一起，甜度不高。…查看更多

🥩炙燒和牛卡爾帕喬 ($188)呢款係和牛刺身嚟，和牛好鮮嫩🥰入口軟熟，唧埋檸檬汁一齊食好開胃😆🦪鐵盒燒廣島生蠔 ($240/半打)+🧀拉克萊特芝士 ($48/3pc)鐵盒燒生蠔係呢到嘅招牌，必點！火侯控制得剛剛好🤩唔會過火侯令到生蠔乾柴柴，每隻生蠔都脹卜卜好飽滿，而且呢到啲蠔仲可以加芝士🧀️加左3隻有蠔嘅鮮味之餘再多咗層咸香，芝士控唔好錯過呀😍🍢芥末雞柳 ($42)呢款雞柳串燒用嘅芥末有別於一般攻鼻嘅芥末☺️佢係只有少少攻鼻，但又帶點芥末嘅香，可以將串燒嘅鑊氣吊返出嚟，食落口冇咁寡🥰啲雞柳都好嫩滑😍🍢海膽雞柳 ($42)呢款海膽醬雞柳，雞柳層皮燒得比較焦香，咬落口有少少焦脆感，搭配埋海膽醬，感覺新鮮好正🥰🥠栃尾油炸豆腐伴魩仔魚 ($78)呢款炸豆腐面頭鋪咗大量白飯魚仔同香蔥，連埋炸豆腐一齊食口感幾得意🤣豆腐炸得好乾身，唔會覺得油笠笠～🍳山芋明太子鐵板燒 ($78)山芋泥整得好綿密，再將佢同明太子醬、生雞蛋撈埋一齊，食落口好滿足🥰整體味道好濃郁，而且滑捋捋好好味🤤🍳燉牛舌伴蛋 ($68)牛舌燉得好腍，口感唔錯，而且入邊仲有芝士同溫泉蛋，加埋一齊味道幾夾😋而且牛舌份量都唔少，呢個價錢性價比好高👍🏻…查看更多