潮濠城酒樓 (已結業)

阿姨的同事推介佢黎呢度食潮菜。於是佢就約埋我同阿媽，一行三人十二點半去食晏。由於到達時時間尚早，唔太多人。叫了三個小菜，加多個湯。咸菜豬肚湯雖然看上去好似好稀，但飲落味道好濃郁。胡椒味好勁，好辣呀！咸菜已煲到無晒味，仲好淋添！不過豬肚實在少少，每人只有兩小舊，豬肚都唔係咩貴料，點解咁姑寒？？？！！！滷水鵝肉拼盤有滷蛋、鵝件、豬腩肉、鵝心、鵝腎同鵝潤。全部都好入味，滷水好香，唔會只得咸味。鵝心好正，炆得入味又唔會太硬身。鵝腎爽口，而鵝潤就有少少硬。鵝件都好有肉，鵝肉肥美。蠔餅賣相好靚好整齊。蠔仔雖唔係好大隻，但就新鮮無沙無碎殼唔腥。粉與蠔的比例剛好，唔會食到成口粉。炸蝦蟹棗 唔掂！好粉呀！兩隻棗都係唔彈牙，而且好唔足料，好係食粉多d！兩隻棗除外表有不同之外，個味道有九成相似。環境ok，唔會太嘈，都傾到偈。服務不過不失，無咩話特別好or差，中規中舉啦。