上海綠楊邨酒家 (已結業)

離大閘蟹當造的季節還有一段長時間，正所謂九月圓臍十月尖，以農曆計算，距離現在還有三個多月，但一眾蟹迷卻不用擔心，因現在正正是品嚐六月黃的最佳時機。【六月黃】就是未足兩的大閘蟹幼蟹，只經歷了三次脫殼，與成年蟹相比，蟹膏雖不及豐腴，但卻來得香滑鮮甜，而且肉嫩殼軟，是另一種享受。今年，上海綠楊邨酒家推出了一系列的【六月黃】菜式，供應期至八月底。來到綠楊邨，當然要一嚐這兒的淮揚風味手工菜，擺盤極具美感，令人不禁嘩然四起。首先來些江南冷盤，先由清新開胃的【話梅鮮淮山】開始，以雪白的淮山莖部來做，味道清爽，帶點點黏性，並釀入剁碎了的話梅肉，酸甜開胃。再來就是擺放得栩栩如生的【香酒醉六月黃】，將原隻蟹放入多款混酒中浸製，除了酒香醇厚外，還保留了蟹的鮮甜，在啖啖蟹膏的情況下，盡顯鮮甜的一面。【蔥油海蜇頭】擺放得像花一樣嬌美，質感非常爽脆，口腔滿是蔥油的香味。【宮廷富貴花】用蘿蔔片捲著紅椒絲，再花心思地砌出一朵花的型態，美侖美奐。味道方面，酸中帶甜，帶上微微辣香，配合爽脆的質感，開胃又好吃。將【水晶餚肉】切成菱形，並擺放成另一朵花的型態，真的很美。豬肉與啫哩的比例恰到好處，爽口中帶軟滑，特別的是上面用作裝飾的小紅球，大家都以為是蕃茄之際，卻是醃西瓜，相當驚喜。最後的是【招牌丁香雞】，圓圓一球，很有趣，慢慢拆開，雞肉嫩滑入味，雞皮更是爽滑彈牙，醬汁的沙薑味道較重，但是味道相當討好。一輪冷盤後，來了一道招牌菜【文思豆腐羹】，盡顯廚師的刀功，豆腐及其他配料切得如絲般幼，配合由金華火腿熬製的上湯，鮮甜嫩口，美味得令人難以忘懷。接著以【六月黃蟹粉銀絲】來配合豆腐羹是一著好棋，師傅改用葛粉絲來做，煙煙靱靱，與嫩滑的豆腐羹形成強烈對比，而且六月黃做的蟹粉膏香肉甜，即時感到那份無比的幸福在盤旋。六月黃一直都融入在之前的菜式中，可是接著卻是牠們當上大主角，先來惹味為主的【黑椒炒六月黃】及【椒鹽六月黃】，前者鑊氣香濃，以乾炒來將醬汁掛在蟹上，非常惹味，而且豐潤的蟹膏更是美味。後者經滾油一炸，香酥鬆脆又不油膩，椒鹽更突出了蟹的鮮甜，加上微微的辣香更是誘人，連殼同吃也實在滋味。接著一道【六月黃鰂魚湯】以此稍作調息，以六月黃來煲湯也是第一次。雖然有點奇怪，但出來的結果卻是一致讚好，湯色奶白偏有金黃，鰂魚本已是鮮甜之物，現加上六月黃的蟹鮮，真是鮮味一發不可收拾，滿腔盡是甜美的蟹香，好蟹之士更將消滅了湯渣中豐腴的六月黃。雖然今天是全蟹宴，但總也要點纖維，這道【勝瓜百頁煮六月黃】來到合時。勝瓜及百頁同是能盡吸汁醬精華之物，放在以六月黃煮成的湯汁，所有鮮甜味美的湯汁皆被盡吸，每一口都非常濃香鮮甜，不消一會兒，連碟內的湯汁也搶奪一空了。來到這兒，豈能錯過【酥炸千里香】呢？由於工序繁複，會供應的食肆不多，更顯得矜貴。外層被炸得佈滿蜂巢紋路，質感鬆化，蘸上少許甜醬，不錯的，如果再臭多一點點，應會更為美味。來到全晚最賣座之菜式，這道【醬炒毛豆六月黃年糕】來到之前，眾人也嚷著很飽。可是一會後，首先被搶購一空的是年糕，大家冒著飽死的危險也要以身犯險就知道是何等的美味。因六月黃的蟹鮮及油香已溶在醬汁內，香濃惹味，並剛好稠杰地掛在年糕上，美味得停不了手。最合適蟹宴的結尾菜式非【六月黃蟹粉小籠包】莫屬，有時真的害怕了蟹粉小籠包的味道，但這粒吊鐘狀的小籠包卻深得大家喜歡，肉鮮之餘還蘊含著巨大的鮮味及油香，值得一試。接著的【綠楊素菜包】及【三鮮窩貼】來到，包子塞滿了麻油香濃重的餡料，清爽不油膩。三鮮窩貼更是煎得香脆可口，肉餡鮮味，值得一試。最後來到甜品時間，有香噴噴的【腰果露】及【拔絲香蕉】，我當然支持食拔絲香蕉啦，因為有種情意結。小時候，對這款甜品一見鍾情，便因利成便學習如何製造，原來工序並不複雜，但卻是易學難精，需要一定功力才能成型。這兒的糖膠皮已經做得非常不錯，輕薄脆口，可是弄得厚身多一點點會更佳。腰果露則富重果仁之香，打得軟綿滑溜，稠杰適中，好味。品嚐過如此精彩菜式後，深深被那嬌小而滿載香滑味鮮膏香的六月黃所吸引，在這個多兩個月的期間，絕對可為好蟹之人的喜訊，一解對大閘蟹的思念之情。…Read More

這日朋友相約去銅鑼灣世貿內的上海綠楊邨齊齊品嚐六月黃，才發覺原來轉眼又到了一年一度吃六月黃的時候了，時間過得真快呢。六月黃，就即是大閘蟹baby。這時候的蟹，特色是殼嫩膏黃，肉質又嫩，真是想起也覺得吸引。在我們這夜開始吃六月黃這主角前，先來數款前菜。招牌丁香雞（＄125），去骨去脂肪的雞肉堆成半球體再在上面再鋪回雞皮，加上青瓜拌碟，賣相很美就像一朵黃花。雞肉肉質細滑鹹香，加上涼涼食感，很清新。水晶餚肉（＄95），切成粒粒的餚肉味道鮮香，同樣擺碟擺得很美像朵花。蔥油海蜇頭（＄195），海蜇頭爽口帶點蔥油香，好吃。淮山話梅（＄88），爽口鮮淮山卷著酸酸甜甜的話梅醬，很醒胃呢。宮廷富貴花（＄108），說到賣相，最美就一定是這如一朵花的宮廷富貴花。爽口酸甜的薄片醃白蘿蔔，作為開胃菜真不錯。吃過賣相都很精緻的前菜後，接著是文思豆腐羹（＄60／位）。豆腐切得髮絲般幼細，師傅刀功果然厲害！高湯湯底鮮甜，配上豆腐絲，是簡單清新的美味，我超喜歡這款羹呢。接著開始大家期待已久的六月黃菜式啦！香酒醉六月黃（＄108/隻），生醃的六月黃，蟹膏超滑溜，酒香亦濃郁。六月黃蟹粉銀絲（＄118/位），粗粉絲上拌著金黃色蟹粉，食起來滿嘴蟹油，雖然邪惡，但實在吸引。椒鹽六月黃（＄330，1.5份），做得乾身不油膩，連殼也炸得薄脆，椒鹽過的六月黃好香口惹味呢。黑椒炒六月黃（＄330，1.5份），黑椒炒六月黃，味濃夠鍋氣，不過我還是較喜歡香口的椒鹽版本。醬炒毛豆六月黃年糕（＄330，1.5份），是另一道必食推介！很typical的上海菜濃油赤醬炒六月黃，加上毛豆和年糕，煙煙韌韌的年糕與蟹黃和醬汁混和後味道鮮味濃郁，令我不自覺吃了好多塊年糕呢。勝瓜百頁煮六月黃（＄297，1.5份），相對之前多款較邪惡煮法，這款勝瓜＋百頁＋六月黃的配搭就相當清新。勝瓜和百頁吸滿了清甜六月黃的清湯，食起來十分鮮甜。六月黃鰂魚湯（＄298/份，4位用），奶白色的湯用料很足。六月黃與鰂魚煲出來的湯味道真是超鮮甜，飲得大滿足呢！六月黃蟹粉小籠包（＄168/5隻），小籠包煙韌而薄的皮包著湯包，蟹粉和豬肉的餡料很鮮香，而且一點也不腥。這時大家都已經吃得很飽了。不過公關朋友還為我們預備了一些綠楊邨六月黃以外的點心小食一齊分享。酥炸千里香（＄108）-即炸臭豆腐。一磚磚豆腐擺在枱上時我們已經聞得到那陣香'臭味'，不過食起來那臭味其實比聞起來輕，豆腐炸得外面香脆、內裏軟滑，好吃。綠楊素菜包，蒸包的質感做得不錯，素菜餡料很清新，食起來感覺健康。三鮮鍋貼（＄65/5隻），薄薄的餃子皮煎得頗香脆，豬肉餡鮮甜。這幾款點心都很好吃呢。甜品店方爲我們預備了腰果露和拔絲香蕉。腰果露的腰果香很濃又自然，本來已經吃得很飽，但也不自覺把整碗腰果露食完。另一款甜品是做得亦很出色的拔絲香蕉。薄脆的糖漿包著軟滑香甜香蕉，一口一件，甜蜜蜜。這裡座位安排頗舒適，枱與枱之間不會太逼，而且靠窗位子更有近距離海景。食物方面以這水準，定價十分合理。綠楊邨的六月黃菜式供應期至約8月底。打著這篇文之際，已經心思思想要約朋友趁這個六月黃季節完結之前再去回味六月黃的滋味。…Read More

其實早年幾前媽咪同班姊妹已經黎過綠楊邨食，可惜當時所有招牌上海餸都叫人失望，所以ＸＯ仔都費事哂彈藥去試！不過，最近有不少傳言話綠楊邨轉左人打理，食物質素大大改進，所以家中冇飯開嗰日就叫左uncle請我黎食。實在太耐冇黎世貿啦，原來上11樓必先上電梯，然後再轉「車立」。個「車立」都好奇怪架，因為雖然「車立」門緊閉，但無端端會停喺唔應該停嗰幾層度，好似塞車咁。上到去先知裝修以綠色為主既綠楊邨佔用哂全層，只係分開左兩邊坐。入面高人一等既皮櫈式卡位，睇黎應該幾舒服。不過吸引倒我地注意力既係接待處既六月黃廣告牌同透明雪櫃內既蟹！嗰晚既小聚，Uncle真係算唔話得，安排我地喺間房度，有私人空間又唔洗咁嘈。除左請我地食六月黃，我地當晚食既其中幾味都要一早預訂，誠意十足。見我有本筆記，每道餸上枱時，帶有上海口音既何經理更會同大家詳細介紹，感激感激！餐廳非常之有文化，餸菜續樣黎，唔會一窩蜂咁上哂枱；見倒有不潔既餐具會即時自動自覺換走，完全不需提點；小肥對當晚咁細心體貼既服務無可挑剔。　美學編第一章之宮廷富貴花（$60）：依款酸酸甜甜既蘿蔔前菜，好多中菜館都會有，不過一定冇綠楊邨既師傅咁花心思去製作！平時嗰Ｄ中餐廳會放一細碟樣子不討好，白色橙色既條狀甜酸菜喺枱，再以神不知鬼不覺既手法自動加$30上張單度；綠楊邨就名正言順得多，以$60放左依朵咁靚既花上個餐牌度，令客人有權選擇:)。唔計份量，淨係欣賞倒精湛既刀法都已經值回票價啦！師傅張蘿蔔切成薄片，捲上紅色既椒絲，再砌成一朵花，富貴吉祥，令到從來唔食酸菜既ＸＯ仔都食左好多！雖則有椒絲，但一Ｄ都唔辣；蘿蔔爽脆，酸甜既味道醒胃提神，視覺效果亦增添食慾，必吃前菜推介也！　美學編第二章之招牌丁香雞（$95）：唔知大家有冇留意倒，雞肉底既青瓜片係砌成梨既形狀，好襯之前既富貴花:)！鹽味濃烈但唔過火既白切雞，一D肥膏都冇，妙！雞肉唔嚡，連同滑嘟嘟既雞皮食，再以主角既丁香汁點綴，好清新既冷盤！　美學編第三章之文思豆腐羮（$45）：何經理介紹既時候，解釋話依款豆腐羮，師傅係用百福豆腐切成細細條，再以一朵花既形狀散喺個碗入面。湯中黑色既髮菜居然比豆腐絲還粗；幼如髮絲既豆腐令大家深深感受到師傅細膩既刀功，不得不拍手讚佩！豆腐入口即溶，但仍可嘗到豆腐既嫩滑感，非常精彩！媽媽勁讚個湯底尤其出色，火腿味道香濃不濁，而且芡汁唔會過火，冇一舊舊或水汪汪既情形。文思豆腐羮係ＸＯ仔食過最好味既豆腐羮，重點推介！　酥炸千里香：爸爸話喺餐牌度見倒有臭豆腐食，我搵極都搵唔倒，所以大家都以為手持既餐牌有分別；點知原來係ＸＯ仔見識淺薄，唔知道臭豆腐又名「千里香」！唔受得既人都會覺得陣「香」味好難頂；媽媽不斷打噴嚏既同時，豆腐迷爸爸只懂得讚賞臭豆腐適中既大小，香口既脆皮，同熱嫩既豆腐心。　美學編第四章之醬炒六月黃年糕：一入門口，已經見倒綠楊邨推介緊六月黃。好多時廣告既相都會比較誇張，不過今次因為自己親眼見識過，成碟餸居然可以砌返隻蟹咁樣，重影埋相，可以話比大家聽實物真係好堅；似乎小弟既拍攝技巧比佢地廣告更出色bor！細細隻既六月黃冇乜肉，但勝在膏多，蟹fans既表弟同媽咪食到津津有味，勁讚Ｄ膏鮮甜無比。同枱如果有人唔食蟹唔緊要，因為蟹底既年糕好入味，我地食到隻碟乾乾淨淨。（如果冇聽錯，六月黃應該食到中秋前。）　芹香桂魚絲（$120）：因為依碟餸味道比六月黃淡，建議食蟹前上。去左骨既桂魚絲算嫩滑，不過桂魚本身魚味唔濃，所以用芹菜炒就更加容易被芹菜蓋過左陣魚味，只可以話係正常既一味。　廚學編之清燉獅子頭（$38/位）：好多時去上海餐館，佢地既獅子頭，鍋貼，小籠包，生煎包，各款入面既豬肉餡都係一樣既，只係個外層有所不同，而冇皮既獅子頭多數都係最嚡既一味。今次真係要讚揚一下綠楊邨既獅子頭，因為肉質鬆軟嫩滑，完全唔似我地喺出面食開嗰Ｄ又乾又實既巨型豬肉丸！據何經理所講，要造出依個效果，關鍵在於豬肉唔係剁碎既；師傅既秘訣係張豬肉先切成粒粒，再慢慢啪鬆，直至起膠為止，似乎少Ｄ手力或耐性都唔得。中國廚藝，真叫人咆哮推介！　嫩雞煨麵（$43）：雞肉冇丁香雞Ｄ咁正，不過個煨麵就夠哂腍滑，湯底亦好香濃。　灌湯小籠包（$45/五件）：同枱每一個有份食既人反應都唔同。爸爸覺得個皮較厚，表弟就話整體好正常，小籠包皇既ＸＯ就好啱食。小弟認為個皮唔係特別厚，完全可以接受；豬肉都好滑；包內既湯份量足；味道又教得甜咸適中。　擔擔麵（$40）：麵條彈牙，湯底味道教得好好，唔會話太多花生或芝麻醬，而且因為辣油另上，自己可以控制辣度，表弟話"like"。　薑汁荳腦：爸爸同我真係大鄉里，要媽咪解釋先知「荳腦」即係爸爸既「飛氟」甜品，豆腐花，今次又學倒中文啦！爸爸話豆腐花好滑，薑汁又唔會太多，剛剛好，見倒橙色既幼糖粒，對眼直頭發哂光呀！　桂花燉雪梨：桂花味清香撲鼻，雪梨腍中帶爽，清甜潤喉，正好為依頓豐富既晚餐劃上完美既句號。屈倒uncle請我黎綠楊邨食好野，意外地重可以欣賞到刀法如神既廚藝，大飽眼福，抵呀抵呀！…Read More