CP值高!地區日、韓料理小店
2021-03-16

小店嘅名氣,雖然通常都遠不及大集團或連鎖餐飲店,但往往正因為佢哋「小」,容許發揮空間反而更「大」,更易搵到驚喜呢。今次要介紹嘅兩間餐廳,分別喺荃灣同將軍澳,都係深受區內街坊歡迎嘅高CP值小店啊。

(將軍澳) 

香港有唔少富有日式風格嘅居酒屋,位於將軍澳嘅緻就係其中一間,木系質感嘅裝修,予人一種舒服嘅感覺,而且更有榻榻米嘅座位,好似真係去咗日本咁。餐廳以日式串燒為主,特別添置咗部日本製嘅串燒電爐,可以快速烤熟食物之餘同時做到外層香脆嘅效果。師傅製作用心,單係串燒就已經每日都要花費兩個鐘去穿好,並且創作咗多款自家調製嘅醬汁搭配。

油甘魚鮫

油甘魚油份充足大家都知啦,而油甘魚鮫位即係魚嘅下巴同魚腩中間嘅位置。由於呢個位置嘅活動比較多,令到佢嘅肌肉都相對結實同有彈性,燒香咗之後,外皮有微微焦脆,食到油香之餘膠質亦重。


日式炸鮮奶

講起炸鮮奶,可能都會諗起大良炸奶,師傅參考做法再加以改良,以奶香極濃嘅3.6牛乳製作,所以奶味更加濃郁,外層金黃酥脆,內層綿滑,甜度適中,配多球沖繩黑糖雪糕,冰火交融係幾過癮。


炸物拼盤

想食香口嘢嘅話,炸物拼盤就啱晒。5款炸物包括有炸廣島蠔、炸忌廉蟹餅、炸魷魚圈同炸雞軟骨等,咩都有啲咁好豐富。另外值得一讚係炸粉薄薄一層,口感香脆又唔太油,佐酒更係一流。


牛小排

牛小排即係牛肋骨嘅位置,肉質柔嫩軟腍,油花均勻,入口即溶,配埋香蔥一齊食,層次變化更多。推介牛魔王要試。


加拿大豬拖羅

豬拖羅冇改錯名,食落嘅口感好似拖羅一樣咁肥美啊,。豬肉嚟自加拿大,天然無激素,雖然望落畀人一種錯覺以為實係好肥膩,但實情佢嘅脂肪含量唔高,仲好juicy添。配師傅自家調製嘅清新梅醬一齊食更可將膩度減低。

韓正屋韓國料理 (荃灣)  

呢間韓式小店位於荃灣,有多款韓國地道美食,不論係石頭鍋飯、鐵板燒、部隊鍋定小食等都有供應,而且份量大,價錢親民,性價比算幾高啊。

人蔘雞湯

呢個人蔘雞湯相當足料呀,真係有成隻雞喺度呀,雞入面釀入咗糯米飯,吸收晒湯嘅精華,清甜帶微甘,感覺好養生呢。


炆牛肋骨煲

先講講佢個湯底啊,有蘿蔔喺度就知一定清甜啊,仲有濃濃嘅肉香。至於主角牛肋骨,肥瘦相間,炆得軟腍入味。叫set就固然有得食啦,而選擇單點嘅朋友仔,推介要留一個quota畀呢個煲啊。


鐵板燒牛仔骨

另一款推介嘅都係牛嘅菜式——鐵板燒牛仔骨大大塊,鋪滿成塊鐵板,上枱仲係「滋滋」聲架!醬汁惹味帶果甜,口感軟腍,用嚟送飯最啱。


石頭香辣芝士豬肉飯

嚟食韓國嘢,枱枱都總會嗌個石頭鍋飯。芝士控無懸念,石頭香辣芝士豬肉飯!熱辣辣捧出嚟之後,要快手撈勻食啊,芝士份量都幾多下,重點係可以拉到絲呀,好治癒。加埋辣醬食係醒神嘅,至於倒幾多辣醬,就視乎大家想挑戰嘅辣度喇。


韓式無骨豬手

韓式豬手外皮膠質重有咬口,肉質鬆軟,就咁食又得;夾埋新鮮生菜、生蒜片、韓式麵醬同香辣嘅泡菜一齊食都得。前者可以專心咁享受豬手嘅肉香,後者口感當然更豐富。

心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異



關鍵字
荃灣
將軍澳
日本菜
韓國菜
大廚招牌菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【2021生日優惠】持續更新!9月壽星嘆Omakase送壽司蛋糕+清酒
2021-08-31
【隨時更新】零食速報 每周新款零食、酒品點評
2021-09-20
【特約分享】Happy Hour飲番杯Schweppes®期間限定特飲!9間必去銅鑼灣餐廳(下)
2021-08-31
Chill住嘆Tea!9月份下午茶推介
2021-09-06
8月份好評餐廳十強
2021-09-08