9月份好評餐廳十強
2020-10-09

上個月嘅疫情似乎有緩和嘅跡象,好多人都出返晒嚟食嘢,唔少餐廳嘅生意都好咗。而觀乎大家嘅消費意欲,似乎以「打卡café」同「旅行國」嘅餐廳最受歡迎。

第10位 素年(*新上榜)   

 圖:or#Tm65616234Joannakawai

素食餐廳嘅market愈嚟愈大,用植物肉代替真牛肉製作漢堡,亦都愈嚟愈普遍。今次呢間餐廳嘅素漢堡,除咗用Impossible™ Meat外,仲有自家製素芝士、洋蔥等等,不過,最最最重要嘅話題性主角,應該係雙層新鮮芫荽!!味道相當突出,鍾意嘅朋友應該會好開心。

第9位  虎鐵鐵板燒(*新上榜)       

 圖:waterchauRara.love.food

去少咗旅行,慳多咗錢用嚟食好嘢都好合理。呢間鐵板燒嘅食材有9成都係由日本空運到港,單係前菜海膽松露蒸蛋就已經令人眼前一亮,賣相精緻,面頭仲有金箔!雞蛋蒸至半熟,連埋海膽同松露一啖入口,喺濃濃香味中依然滲出蛋香。

訂座優惠:8折優惠

第8位  魚事者(*新上榜)     

 圖:RheaChimjudithk

炮台山唔算係飯局嘅熱點,但呢間小店能夠突圍而出,絕對有其過人之處。多款小食同麵食,都加入魚肉製作,好似薯條咁就變咗炸魚肉條,煙煙韌韌,香口又有鮮味。脆口嘅Nachos亦變成魚皮脆脆,意大利飯則變成魚肉粒粒,好有新鮮感,難怪吸引到一眾捧場客。

第7位  白房子(*新上榜)     

 圖:無米Jokeeatallyoucan

本身開喺荃灣嘅打卡café,搬到去銅鑼灣後人氣一樣冇減。舖面嘅花花牆絕對係一眾女生輪流打卡嘅熱點,夠晒fancy。打卡最啱就係叫埋個曲奇杯,將牛奶倒落個杯度,玩埋boomerang效果一流,飲晒牛奶之後,記住隻曲奇杯都食得架。

第6位  Bellevue Bar and Grill         

 圖:lankiman6330eatallyoucan

嚟呢間餐廳記得早啲訂定位,要揀窗邊呀,因為無論係日落景定夜景都好靚呢。肉食獸必食美國特級安格斯塾成肉眼扒,餐廳自設熟成肉櫃,肉質幼嫩多汁,而且仲係由前星級酒店嘅行政總廚主理,水準當然有保證。

訂座優惠:正價7折
訂座感謝祭 $20快閃優惠:熟成西冷牛扒

第5位  Non Kitchen    

 圖:leetszhineunice2046

呢間餐廳同樣都係有酒店級數嘅大廚助陣,炭烤牛扒有燒得好靚嘅格格網紋,食落又有陣陣炭燒香,肉味濃郁,牛魔王唔能夠錯過。加上餐廳情調不錯,天花上掛上一串串星星嘅吊飾,無論係情侶定閨蜜嚟都好啱呀。

第4位  Boholic     

 圖:hkfoodkiller_Lam.ng

作為吸引一眾女生同文青去打卡嘅café,純白牆不可缺少,仲要加多張籐製吊椅同幾個打卡corner,走波希米亞風嘅呢間餐廳,絕對有潛力贏在起跑線上。加上又可以打破「打卡餐廳啲嘢通常唔好食」嘅「傳統」,要入十強冇難度。推介香煎慢煮牛腹肉配紅酒黑醋汁,脂肪少而肉味濃。

第3位  燈籠滷味(*新上榜)   

 圖:FANKANA花太郎

可能大家都好耐冇去台灣,好掛住台灣嘅夜巿。呢間由師大夜巿開到過嚟嘅人氣滷味店,今個月打入三甲。最推介當然係師大人氣組合,包括甜不辣、豬肉片、花枝丸、白蘿白等,仲有好台灣嘅王子麵!滷汁用上台灣總店嘅祖傳滷湯,啖啖都係台灣嘅味道啊。

第2位  Homeland(*新上榜)     

 圖:技巧樹熊centimwl

呢間大埔街坊好熟悉嘅小店,開左半年左右最近去埋大角咀開分店,新店仲迅速上榜,實力不容置疑。佢哋自家製嘅手打意粉固然受歡迎,新店仲有限定菜式,外脆內嫩嘅德國鹹豬手,同用話梅蜂蜜酒製作嘅啤酒酸全雞,不論係賣相定味道都試得過。

第1位  Café Crêpe(*新上榜)      

 圖:Califish913

今期榜首係嚟自加拿大過江龍嘅法式薄餅店,店內提供大約28款法式薄餅,有鹹有甜,其中蒙地卡羅朱古力法式薄餅同抹茶忌廉芝士配新鮮紅莓醬都係新店限定呢,前者用朱古力味香濃,後者酸甜有層次。

文:Kar


關鍵字
十強報榜
十強名單
尖沙咀
大角咀
銅鑼灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
優雅小聚 11月下午茶推介
2020-11-03
【訂座感謝祭】 快閃$20餐飲券第八彈 激抵燒烤優惠
2020-11-06
桔梗姐妹店進駐牛頭角 8,700呎自設炒豆房及餅房 手沖咖啡配輕食
2020-11-02
Wine & Dine 2020預告 免費網上學品酒 精選品酒套裝率先睇
2020-11-19