6月份好評餐廳十強
2021-07-06

話咁快,2021年就過咗一半。呢半年依然都係冇得飛,大家留多咗喺香港,亦都去多咗唔同地方發掘香港本身嘅滄海遺珠。無論係美景定美食,都好似有種重新發現嘅感覺。6月嘅十強名單,各國菜式都有佔一席位,充份展現香港匯聚美食嘅特色。

第10位  Pizza Maru

 圖:拾四人妻kittyyy0313

荃灣呢間韓式餐廳,經常都有條長長嘅人龍喺門口。佢哋主打韓國炸雞同pizza,有多款唔同口味選擇,建議叫pizza嗰陣可以揀蜜糖杏仁邊,甜甜地又香脆,比起食開嘅芝心批有過之而無不及。另外鍾意食海鮮嘅朋友,秘製青口鍋就夠晒吸引,藍青口份量十足,醬汁creamy。

第9位  安平燒肉(*新上榜) 

 圖:mini454KathyPun

呢間燒肉店供應超過50款肉品同海鮮,非常受肉食獸歡迎。澳洲M5和牛油脂分佈平均,肉質香嫩,調味唔需要太多,輕輕灑少少岩鹽就ok。另外推介可試原住民鹽燒肉,呢款豬肉燒過後,微脆帶肉香。餐廳另外亦有台灣特色燒烤同夜巿小食供應。

第8位  麻辣風雲(*新上榜)   

 圖:sogoodwithfoodhkfoodphoto

好多人都鍾意食辣,食到噴晒火標晒汗,嗰種刺激感又真係麻辣嘢先畀到嘅,而呢間餐廳選用多款由四川空運到港嘅香料,辣都有幾種層次,入到十強榜當之無愧。招牌菜酸菜魚當然推介,魚片肉質嫩滑,酸辣湯底調校得宜。另外豆腐花米線亦值得一試,入口香滑,麻香愈食愈出。

餐飲券:正宗川菜酸菜魚 送菊花蜜一埕

第7位  JUST'er Bar & Restaurant(*新上榜) 

 圖:JJJJJJANwingcc

每個月都總有啲打卡café上榜,今個月輪到尖沙咀呢間牆上掛滿霓紅燈裝飾嘅餐廳。「邪王炎殺黑龍意粉」個名夠晒型,原來係炸雞意粉。餐廳特意選配甜酸汁,中和油膩感。唔怕變肥仔嘅仲可以叫埋焦糖棉花糖布甸奶昔,無論賣相定配搭都相當吸引,口感creamy,而且雖然樣樣嘢睇落都甜,但混埋一齊打成奶昔後,又冇想像中咁甜,仲有唔同層次添。

第6位  牡蠣不如帰(*新上榜)

 圖:ccrreami肥dodo

有米芝蓮加持果然係唔同啲,呢間以牡蠣湯底做主打嘅拉麵店,吸引咗好多粉絲慕名朝聖,開業一個月就已經打入十強位置。牡蠣湯底用咗幾十斤鮮蠔製作,伴埋自家製牡蠣醬等,難怪入口陣陣鮮甜蠔香。餐廳連用水都講究過人,特意引入日本淨水設備過濾食水,品質當然就有保證啦。

第5位  Thaiology(*新上榜)   

 圖:xmelissalamxkittyyy0313

由資深泰廚主理嘅泰菜餐廳,最吸引一定係泰式版嘅Shake Shake海鮮袋,有小龍蝦、扇貝、虎蝦、鮑魚等多款海鮮選擇,仲可以升級揀原隻波士頓龍蝦、原隻活大肉蟹。撈埋泰式生蝦汁或者冬蔭公汁,啖啖都係海鮮鮮味,要上榜冇難度。

訂座優惠:88折優惠

第4位  露面手工拌麵料理   

 圖:ShanLi5129haru.food_daily

隔咗幾個月,呢間手工麵店又再度上榜。以拌麵同湯麵做主打,五款麵底選擇包括擔擔麵、biang biang麵、白布湯闊麵等。油撥辣子魯肉biang biang麵較傳統嘅薄身啲、幼啲,食落輕盈啲,但一樣咁掛汁同有咬口。另外推介蟹皇拌麵,使用咗大閘蟹肉同蟹黃製作,撈埋落啲麵度,索晒啲汁,啖啖都咁香口。

第3位  Peko Peko Eatery(*新上榜)  

 圖:餐廳提供、patciica

位於荃灣嘅呢間西日式餐廳,自開業以嚟人氣一直高企。餐廳主打健康多國菜,好似salad bowl同牛油果溫泉蛋咁,後者更係冇經油炸亦做到香脆口感,實屬難得。加上餐廳設有戶外座位,仲可以望到海景添,夠晒chill。

訂座優惠:晚市二人及四人套餐88折
訂座優惠:於生日及週年紀念訂座送寫名甜品一客


第2位  Potluck Eatery(*新上榜)    

 圖:餐廳提供、sammipanggg

由佐敦一間西式小店原班人馬重開嘅餐廳,本身已經儲落一批忠粉,加上裝修成文青氣息嘅café,簡約木系加工業風格,自然成為一眾café愛好者嘅新蒲點。食物質素亦維持水準,手搖秘製醬汁海鮮拼盤有齊波士頓龍蝦、大蝦、鮮鮑魚等多款海鮮,無論賣相定味道都令人滿足。而18oz頂級牛扒、醬烤豬仔骨等份量十足,絕無欺場。

優惠券:$128啤酒餐優惠

第1位   舍利鮨(*新上榜) 

 圖:foodieloveeatingmaggiegiegie

今個月嘅榜首位置係屬於元朗呢間日本菜餐廳。由前江戶前壽司師傅主理嘅廚師發辦,食材由日本漁巿場空運直送,款款新鮮。而且師傅更有別出心裁嘅食材配搭,坊間少見,例如禾稈草配煙燻鰹魚,係幾有驚喜㗎。


文:Kar

關鍵字
十強名單
好評十強
報榜
元朗
佐敦
荃灣
cafe
日本菜餐廳
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
7天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗】多間餐廳立即推出限時優惠一覽
今天
榴槤Buffet真的很興奮~ 九龍區酒店7、8月限定榴槤盛宴
2021-06-30
尖沙咀新開燒肉Omakase 專人燒日本A5和牛+特級寶盒鑽石肉
2021-06-28