每逢天氣開始轉涼，就特別想嚟碗熱辣辣嘅清湯腩。湯底清香，軟腍牛腩配埋爽滑河粉或者幼麵，真係好滿足！今次就精選咗全港5間人氣清湯腩店，睇吓邊一間最啱你口味。
自家製藥材湯底 八寶清湯腩
圖：大美女
唔少老饕心目中嘅清湯腩前三甲!! 最大特色就係自家熬製嘅藥膳湯底，用上當歸等8種材料慢火熬成，湯色清澈、藥香突出，飲落有濃厚牛骨味之餘帶少少回甘，想試啲唔同於傳統風味嘅清湯腩，呢間一定要放入清單！
油而不膩清湯牛腩 正九清湯腩
圖：ymang
呢間同樣以湯底取勝！用牛骨、薑、八角、肉桂等多款香料，用自家秘製配方慢火熬足幾個鐘，湯色金黃透亮，飲落油而不膩。牛腩煮到好入味，軟腍得嚟又唔散，每啖肉都好有脂香。河粉爽滑有彈性，唔會一夾就斷；蛋麵就會有嚼勁啲。加埋潮州辣椒醬、蔥花、蒜蓉等調味，簡簡單單已經好令人回味。
原汁原味清湯腩 山水清湯腩
圖：wi3bon
堅持每日用自家秘方，將新鮮牛腩、牛骨慢火熬製，湯底鮮甜帶牛香。特別冬天飲落好舒服，又唔會有負擔～ 清湯牛三寶河係人氣之選，牛腩肥瘦適中、肉質嫩滑，牛肚爽口有嚼勁而唔韌。而牛筋就軟糯入味，啖啖骨膠原好正。識食一定食埋崩沙腩，肥瘦分佈均勻，有油香又唔膩，仲有啲筋膜口感。
選用草原騸牯牛 牛皇子草原騸牯牛清湯腩 
圖：專賣草原騸牯牛嘅清湯腩店，真係食得出與眾不同。湯底用大量牛骨熬製，味道濃郁甘香。招牌牛坑腩筋膜會略帶脂肪，入口軟腍帶膠質；至於崩沙腩肉質就好嫩滑，油脂分布平均～ 呢間無論係湯、肉定麵都表現出高水準，難怪深受牛腩迷追捧。
招牌崩沙腩/爽腩 傳承清湯腩專家
圖：lowbying
喺香港清湯腩關注組無咩負評嘅餐廳！湯底清而不淡，淡淡牛骨香味完全無被香料蓋過，飲落鮮甜順喉，真係清得嚟又有層次～ 選用新鮮騸牯一級靚牛，崩沙腩、坑腩都係必點之選，脂香滲入湯底，牛味濃郁又唔會嚡，推薦大家落埋自家辣椒油啊。靚肉位每日數量有限，想食好嘢要早啲去～
更多OpenRice詳細推介：
►【開飯熱店2025】賽果公佈 (按此)
► 4大韓式鍋物合集！ 鮮味海鮮鍋/傳統牛腸鍋/地道辣燉雞湯/土豆排骨湯 (按此)
► 持續更新！ 2025生日優惠餐飲精選 送多款免費餐點 (按此)
文：Yanica
編：Kate
