早餐選擇有好多，除咗去茶記食個早餐A，有時去食個豆漿粢飯組合都唔錯～今期介紹4間主要食豆漿粢飯嘅餐廳畀大家，有街坊小店、米芝蓮必比登推介同使用日式熟漿技術製作嘅新式豆乳店，睇下邊間啱你口味。

目錄

新蒲崗街坊推介 豆漿大王

圖: ngkuowai

呢間鋪頭雖然有其他分店，但唔少人都話新蒲崗店係最高質素㗎～唔少人都特登為咗食粢飯而來，粢飯一上枱熱辣辣，米粒煙韌有咬口，入面有榨菜、肉鬆同油炸鬼，鹹香味十足，油炸鬼脆卜卜值得一讚，仲可以按口味追加唔同嘅配料，全部加又得！另外食粢飯又點少得鹹豆漿，超大碗又足料，包括油炸鬼、櫻花蝦同蔥花等。仲有甜嘅粢飯，加入油炸鬼同砂糖，一樣咁好味～

米芝蓮推介爆餡粢飯 滿堂樂滬京風味

圖: yuchiro

已經連續兩年獲得米芝蓮必比登推介嘅上海小店。首推一樣係粢飯呀，糯米飯唔會太厚太多，比例啱啱好，餡料一樣係油炸鬼、榨菜、肉鬆，佢哋嘅肉鬆畀得超大方，爆晒餡，食完真係超滿足。鹹豆漿比較杰身，豆味香濃再帶有淡淡蝦米鮮味。仲有酸辣湯都好出色，酸勁強但唔刺鼻，用上濃香嘅鎮江醋，飲落有一陣醇香。

大埔人氣多餡粢飯 逸東餃子

圖：ShirleyyiiTse

你無睇錯呀！雖然呢間餐廳係主打餃子，但佢嘅粢飯一樣咁受歡迎～同樣新鮮即整熱辣辣，飯質感軟糯有糯米香，肉鬆份量都好多，味道鹹香。炸菜爽脆，油炸鬼香脆，口感同味覺都好滿足呀～

新式豆乳粢飯店 SOYmart by 豆乳狂人

圖: ching0727

食慣傳統嘢有時試下創新嘢分分鐘有驚喜！呢間新式豆乳店主打唔同類型嘅豆乳飲品同特色粢飯，好似鮮芋泥豆乳同黑芝麻豆乳都好受歡迎，前者豆乳香滑仲有芋泥甜味；後者黑芝麻好香濃呀～佢哋連粢飯都好有特色，傳統嘅狂人粢飯夠晒多料；仲有牛油果鰻魚玉子粢飯同吉列豬扒粢蛋飯都比想像中夾。

文: Yanica