黃埔呢個地方，自從有咗地鐵站之後，就愈嚟愈多好嘢食喇。最新有間西餐廳，主打唔少手工菜式，加上負責人曾經喺多間五星級酒店度做過採購，所以揀返嚟嘅食材都有酒店嘅水準，回頭率都幾高㗎。
招牌秘製漢堡都有返咁上下高度，厚厚der澳洲手打和牛、蕃茄、牛油果等等疊下又一層疊下又一層，最頂放多隻太陽蛋，份量十足。中間塊車打芝士仲會用火槍即叫即燒添，做到熱溶嘅效果，所以上到枱就唔好放得太耐喇，嗱嗱臨食。底面嘅buns係自家製包嚟，有牛油嘅香味，同時好鬆軟。
寬條麵配龍蝦用嘅係活波士頓龍蝦，所以食落都feel到啲肉幾新鮮彈牙，而啲龍蝦醬汁亦都幾香濃下。要特別講下啲麵，係佢哋每日自家製嘅，用意大利蛋同麵粉製作好粉糰之後，再放入意粉機將粉糰變薄同切條，麵條有蛋香之餘，亦相當煙韌，好有咬感。除咗寬條麵之外，佢哋嘅天使麵同樣都係自家製嘅。
另一樣手工菜式就係pizza喇。由搓粉到碌成餅底，都係全人手製作，喺搽醬、入爐之前仲會用叉喺餅底上拮窿窿，令塊pizza脆口啲。搽埋以新鮮車厘茄、洋蔥、羅勒等自家調配嘅茄醬，同埋mozzarella芝士條，就可以放入爐焗。最後放上36個月嘅西班牙黑毛豬風乾火腿同火葥菜，鹹香薄脆嘅巴馬火腿火箭菜薄餅就大功告成。
至於食肉獸，揀「美國黑安格斯T骨牛扒」就無誤喇，煎香完再用190度慢烤30分鐘，所以即使大大嚿但都唔會好韌，肉質軟嫩而juicy。
Last but not least，佢哋啲飲品造型都幾靚仔。法國玫瑰花鮮奶茶同荔枝玫瑰梳打兩款都以玫瑰花入饌兼做點綴，就算唔係情人節飲都覺得好sweet池。前者係用自製玫瑰糖漿製，而後者就更加分別用上伊朗同法國嘅乾玫瑰作調色同調味，成杯粉紅色好少女心。
Amber’s Table
地址：紅磡必嘉街120號黃埔新天地黃埔花園第3期百寶坊地下G27號舖
文、相：Kar