鹹蛋芝士蛋糕!海洋公園新酒店餐廳一覽 情調扒房、悠閒酒吧 
2018-11-12

去海洋公園鋸扒?係呀,佢哋嘅酒店新開幕,除咗上星期介紹過嘅buffet之外,另外仲有間好有格調嘅美式扒房、一間中菜廳同酒吧。無論係情侶、一家人定一班老友一齊入去都有間啱食。

美式扒房 Prohibition

呢間扒房嘅一磚一木、一盞盞水晶吊燈,都散發住種既奢華又神秘嘅氣息,好有格調,原來係參考美國1920年代禁酒時期嘅風格,就連本drink menu都要收收埋埋咁用個盒裝住,又幾特別。

不過唔好以為禁酒時期就冇酒,事實剛剛相反,唔止有,仲好多。餐廳嘅酒窖收藏咗好多嚟自美國、法國、意大利,甚至南非、黎巴嫩等國嘅酒,就連菜式同熟成牛扒都一樣有落酒!好似前菜醃威士忌三文魚他他配紅菜頭香蒜蛋黃醬咁,就用咗微甜嘅美國波本whisky去醃釀挪威養殖三文魚,令到三文魚食起上有陣煙燻香氣。dip埋薄脆一齊食,口感豐富。

特色蟹餅配柚子鱈魚子他他汁,係煎香咗美國西岸嘅養殖蟹肉,再配埋柚子鱈魚子他他汁一齊食,鮮甜中帶有清新感。

而呢個特厚牛肉三文治,真係特厚。啲牛肉本身嘅味道較淡,有啲煙燻香,但就因為佢一塊疊一塊,疊到高一高、厚一厚,令到成件事嘅視覺同味覺可以一齊都覺得好rich。

去到扒房梗要食扒啦,美國頂級帶骨肉眼排,係呢度嘅招牌乾式熟成牛扒,仲要係用咗whisky同烏龍茶乾式熟成28日,牛扒表層烤香而裡面嘅肉汁鎖返住,不過重點係,佢超大份呀!上菜嗰陣真係會「嘩」一聲,成44安士,啱晒一班人開心些牙。

呢度cocktail都好有特色,好似Peach Cobbler咁,就用隻富中東色彩嘅杯裝住。呢款偏甜嘅cocktail,上面仲要加咗啲cream同杏仁片,口感順滑。而Oxford Night Cup就由蘋果白蘭地酒、金橘liqueur、莓子果醬、青瓜syrup、檸檬雪葩等調成,杯邊仲要搽咗層朱古力醬,先甜後酸、辣。

悠閒酒吧   Pier Lounge and Pier Bar

呢間吧都幾大下,仲有張原塊木枱好鬼型,最啱三幾個friends坐喺度嘆住酒慢慢chill。

唔好空肚食早餐都唔好空肚飲酒,所以介紹佢哋啲酒之前先介紹下啲佐酒小食同甜品。鹹蛋黃芝士蛋糕,呢個係必必必必食啊!造型精緻靚仔唔講啦,襯返海洋公園有幾隻海豚喺度,重點係個cake嘅芝士味香濃軟滑得嚟,仲有陣陣鹹蛋香啊,真係有粒粒蛋黃食到㗎!不過呢個唔多啱些牙榮,因為會食到停唔到口,唔捨得畀人食呀科科。

避風塘炸魷魚夠晒香脆,最啱送酒啦。介紹返門神大家可能都飲得多,但呢隻酸菠蘿啤就淨係得呢度先有得飲咋!放心,又唔係真係好酸嘅,有啲似踩單車途中會食嘅菠蘿冰咁嘅味。

另一隻要推介嘅cocktail都係一個諗都冇諗過嘅組合——紅棗同whisky!冇諗過原來佢哋係朋友呢!Whisky Date先係將啲whisky浸紅棗,令到whisky本身都滲透住陣陣香甜嘅紅棗味,然後再加埋紅棗syrup,於是乎啲whisky同紅棗嘅味道就完全融合埋一齊,毫無違和感。

順德小菜  南海小館

酒店內仲有間中菜館嘅,主打順德菜。順德菜以清、鮮、爽、嫩、滑為特色,加上以河鮮為主,所以呢度有唔少魚類嘅菜式。

順德菜向來有「一魚五味」嘅做法,呢度嘅涼拌爽魚皮就選用鯇魚皮,再加入埋洋蔥、麻油、花生、薑絲等調味,魚皮爽脆,連埋各種配菜一啖食落口,微辣香口。

蒸鮑魚或者食得多,但煎焗鮑魚應該比較少喇啩。主廚受順德煎焗魚嘅煮法所啟發,創作出煎焗鮮鮑魚一菜,食出鮑魚嘅鮮甜之外,面層嘅脆脆層仲好鬼過癮。當然,餐廳仲有其他小菜同點心,好似筍尖鮮蝦餃、鮑魚瑤柱灌湯餃等,甜品方面有紅豆綠茶薄罉、自家製蜂蜜黑糖糕等。


文:Kar
相、片:Tom Li


關鍵字
海洋公園
鋸扒
手工啤酒
芝士蛋糕
鹹蛋
扒房
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
2天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18