講到四川菜，不外乎都係水煮牛肉、酸菜魚同辣子雞等菜式。如果想試試新意思，以下介紹呢4間新派中菜就啱你啦，有川菜酒吧、太空玩味元素裝修同麻辣黑松露味干鍋等，間間都令你有驚喜！

目錄

型格川菜酒吧 Shining Star Bar & Restaurant

當酒吧遇上川菜時會有咩火花？銅鑼灣呢間酒吧餐廳以川菜為主打，更大玩破格中式調酒，創意無限。三款中式雞尾酒係必試items，「青花池」以陳年花雕特調，加入青蘋果、青瓜糖水同新鮮檸檬汁炮製而成，入口夾雜淡淡花雕酒香及檸檬香味，酸酸甜甜好清新～食物方面幾推介麻辣小龍蝦，以秘製醬料加上多款四川香料炆製而成，口感豐富有辣勁，送酒一流！

麻辣黑松露干鍋 辛手村 

圖: eunicehau0802

一間好多菜式都好有創意嘅川菜小店。好似呢道麻辣黑松露干鍋就係人氣之選，將中式麻辣融入西式黑松露，鍋底已經包含娃娃菜及土豆絲，然後再額外加自己想加嘅配料。平時食嘅麻辣乾鍋都係只有麻香，估唔到加入黑松露後味道會咁夾，配料入口首先係黑松露香，然後麻辣越食越出，好過癮。岩燒厚切牛舌心都不得了，軟嫩多汁又富嚼勁，牛味濃郁。

招牌蝦米辣油拌蝦球麵 辨面館

圖: singyancheung

由前一星米芝蓮四川菜大廚創辦及主理嘅小店，主打四川風味麵食及創意菜式。如招牌蝦米辣油蝦球拌麵，拌麵另跟一碟特製蝦米油，蝦米油微辣有勁多蝦米粒，撈麵食好香口，另外麵質都幾彈，原隻蝦球大大粒，幾出色。另外小食都幾有特色，如慢煮口水雞沙律、水煮魚春卷及四川炸雞咁，真係有啲驚喜。

太空玩味元素裝潢 花椒子 

以太空玩味元素搭配光彩奪目霓虹燈為裝潢主題，供應一系列多元化地道川菜，如「椒」牌三「子」、川辣火鍋系列、山城水煮系列、巴蜀香鍋系列、惹味家常小炒及霧都主菜等。推介花椒魚頭鍋，選用新鮮大魚頭，湯底以多種辣椒及香料調味，麻辣香氣濃郁撲鼻。湖南辣椒炒雞煲都值得一試，首先品嚐鮮嫩雞肉；隨後可加入美國肥牛片或西班牙黑毛豬肉片，吸晒湖南川辣汁，惹味十足；最後更可加入少量清湯或啤酒作打邊爐添！

文: Yanica