香港驚安の殿堂VS日本 實測排隊時間、人潮、食物價錢、種類(有片)
2019-08-16

香港嘅驚安の殿堂話咁快就喺香港開咗一個月啦,相信唔少朋友都同開飯仔一樣,畀佢日排夜排嘅人潮嚇親而未去住,今次就等開飯仔從四方面做個實測,睇睇而家仲要排幾耐隊,而且同日本驚安比較,價錢同種類又如何?


排隊入場時間

啱啱開幕嘅時間,淨係排隊入場條人龍都長到唔見龍尾,特別係放工時間及晚上更加係人潮湧湧。開幕一個月後,排隊人潮有稍為緩和,今次開飯仔就大約4點半到達,暫時未見人龍,唔使排隊就可以入去。離開時大約6點半,雖然都未使排隊,但入店人數明顯增多。


店內人潮

人潮方面,雖然4點半仍然係返工時間,但店內都幾迫吓,特別係零食區人山人海。而結帳條隊都要等大約20-30分鐘。


食物種類

跟住睇睇食物夠唔夠多元化,選擇都可以話係應有盡有。無論係壽司、刺身、肉類、水果、串燒同日式飯盒都有,零食都有大把選擇~


食物價錢

嚟到大家最關心嘅價錢,好多人都會覺得過江龍一定會貴好多,價錢比起日本貴少少就一定,但開飯仔覺得尚算合理。特別係熟食嘅價錢,例如蛋包飯及牛肉便當等日式飯盒,由師傅於場內即日製,價錢大多數都於40-60蚊之間,以尖沙咀區嚟講都幾抵食~


仲有以大家去日本都好鍾意買嘅Kitkat為例,呢個特濃抺茶味喺日本賣連稅價298yen,港幣約22蚊;而驚安呢度就賣緊$27.8,差額只有$5.8。咁就唔使特登去日本抬返嚟啦!


開飯仔總結:人流方面都尚算多人,傍晚時間都仍要排隊入場,如果怕迫嘅朋友都係等多一排先去啦。不過食物種類都幾多,而且價錢合理,都算值得一去!


驚安の殿堂

地址:九龍尖沙咀彌敦道118號美麗華廣場2期B1







文、相、片:Yanica

關鍵字
香港
日本
日本菜
比拼
飲食潮流
開飯仔為大家發掘香港這個美食之都的最新美食資訊,分享飲食潮流文化。
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
2019-09-09
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03