平時好羨慕海外Starbucks有唔少新飲品？呢個秋季Starbucks就推出兩款香港獨家供應嘅咖啡！同時仲有咖啡主題甜品新登場，啡迷必試！順便買埋中秋月兔或者星巴克經典人魚系列商品就更開心啦。
 

香港獨家創意咖啡

凍荔枝椰果咖啡（另有星冰樂）（中：$43、大：$47、特大：$51）

星巴克咖啡9月12號起推出兩款新飲品，都係嚟自港澳首辦嘅2018星巴克創意咖啡大賽嘅作品！其中一款係清爽嘅凍荔枝椰果咖啡，最底有椰果，再加牛奶、特濃咖啡，最後加上椰子忌廉。椰果清甜Q彈，加上忌廉椰子香味濃郁，增加風味。
 

凍薰衣草意式特濃鮮奶咖啡（另有熱飲）（中：$43、大：$47、特大：$51）

另一款就帶芬芳花香！最底紫色嘅係薰衣草糖漿，依序加入蒸煮牛奶、烘烤風味更為突出嘅意式特濃咖啡、薰衣草味嘅鮮忌廉，最後以淡紫色嘅朱古力碎點綴。可以先用吸管分開試每層唔同味道，然後將糖漿、牛奶同咖啡稍微搞勻，最後連忌廉一齊完全搞勻，花香同咖啡香會帶嚟唔同滋味！
 

試埋咖啡甜品

咖啡雪芳蛋糕（$34）

Coffee Break除咗咖啡，食返件甜而不膩嘅甜品亦係一種享受。同樣喺9月12號推出嘅兩款新甜品都以咖啡為主。呢件咖啡雪芳蛋糕既保留咗Starbucks雪芳蛋糕鬆軟有彈性嘅優點，又食得出咖啡濃郁香味，值得一試。
 

朱古力咖啡榛子撻（$26）

如果想食甜啲嘅話，呢件朱古力咖啡榛子撻就啱啦。酥脆撻底上面有香脆榛子脆脆同朱古力咖啡軟心，食落口感一脆一軟，咖啡同朱古力味道平衡。撻面仲有忌廉同咖啡粉裝飾。
 

 
特色主題商品

中秋玉兔系列商品（$48-$220）

唔洗羨慕其他地區Starbucks嘅杯啦，今次香港分店一樣有唔同特色主題商品。先有琴日推出嘅中秋月兔系列，愛地球愛環保嘅你可以考慮買個月兔環保布杯套（$48），而最夢幻嘅就要數到12oz立體月兔水球隨行杯（$155）同12oz舞動小兔LED發光隨行杯（$160）啦。
 

星巴克經典人魚系列商品（$80-$260）

而Starbucks Fans唔可以錯過嘅就係經典人魚系列，9月12號推出，靛藍色主調加上雙尾人魚、浪濤或星空圖案。好似16oz星空不鏽鋼凍杯（$225），漸變色搶眼之餘，加埋金色星星圖案就好似夜空咁。
 

文、相、片：Cathy