首創沖茶機即萃即沖 高質台飲店抵港 主打熊貓珍奶阿里山冰茶
2017-12-15

丸作食茶一芳台灣水果茶後,喺台灣、加拿大、澳洲、印尼、上海均有分店嘅鮮茶道亦都正式抵港,喺尖沙咀開設品牌旗下第370間分店!咁多間台灣過江嘅手調飲品店相繼到港插旗,似乎香港要掀起台飲爭奪戰,各位「飲家」準備好未?

一定要先介紹呢部沖茶機!鮮茶道以類似咖啡機嘅手法,放入茶包再莘取、分段浸泡茶,再沖調各款茶飲。品牌特設研發部門,制訂沖茶所需嘅水溫、水壓,而且每間舖頭都會用美國高檔濾水系統,好專業。

好似咖啡機咁,不過唔係擺咖啡粉,而係放茶包。

店內大部分茶葉都來自台灣,除咗斯里蘭卡錫蘭茶葉、印度伯爵茶葉及越南茉莉綠茶。

3大招牌茶飲:

1. 熊貓珍珠鮮奶茶$24

以錫蘭紅茶做茶膽,再加入黑、白珍珠、鮮奶及糖,再用機器瞬間冰震,令茶味得以保持,搞掂!茶味好濃、好香醇,而且口感亦好清,無茶渣或者雜質。

黑白相間嘅珍珠,睇落好靚,食落都係一樣咁煙韌。

2. 阿里山冰茶$17

名副其實嘅「無添加」冰茶,只用阿里山嘅高山烏龍茶葉,加少許糖、冰就完成。聽落似乎普通,但卻輕鬆成為品牌最熱賣茶飲No.1!點解?因為「無添加」嘅茶飲更容易品嚐出杯茶堅定流,起初入口普通,點知有啲茶嘅後勁,好有回甘!

3. 招牌水果茶$33

以台灣白桃烏龍茶葉做茶底,再加入蘋果、橙、百香果醬及鳳梨醬而調成。百香果醬、鳳梨醬全部喺台灣自家工場製作再送抵港。味道好fresh,好有鮮果嘅天然酸甜味,不會死甜,讚!

更多【新店直擊】:
1. 鹹食修女泡芙+巴黎特色咖啡 法國糕點品牌金鐘新店登場
2. 台灣人主理牛肉麵滷肉飯 湯底熬至少30個鐘
3. 坐吧枱睇日本師傅即整 尖沙咀過江龍芭菲新店

其他茶飲:

鮮奶皇家伯爵紅茶家族($30)有好多配料,入面有伯爵茶、鮮奶、黑珍珠、雞蛋焦糖布丁、仙草等,好豐富。布丁、仙草都係舖頭自己做架!

開飯仔都幾鍾意紫芋鮮奶三重奏($31),有紫芋、布丁、仙草等配料,芋頭味香濃,仲可以食到一粒粒芋頭,加埋布丁、仙草,口感層次都幾豐富。

(左)木瓜牛奶($31)係台灣夜市常見飲品,加入飲品店menu令客人可回味番台灣昔日嘅味道。負責人Dennis話,近日試業都幾熱賣架!而(右)冰漩檸檬益力多多($29)好fresh,又有檸檬又有益力多,好酸好醒神。

除此之外,店子仲會用雨林聯盟認證茶葉炮製幾款茶飲,類似fair tade概念,可保證由採茶農夫、以致賣茶嘅零售店都享有公平貿易嘅機會,好有意思!

香港店限定千層蛋糕!

鮮茶道亦推出人氣千層蛋糕,一共有伯爵茶、抹茶、芒果、tiramisu以及岩燒特濃朱古力5款口味,價錢為$28。

開飯仔好鍾意earl grey口味,每層都做得幾薄身,忌廉亦不太甜,仲見到茶葉碎,整體甜而不膩,好食!

除咗千層蛋糕,店子仲供應茶味軟雪糕,雪糕粉都係自家製架,可選雪糕筒/杯!口味會不時轉換,採訪當日有伯爵紅茶、抹茶兩款。比起其他雪糕店,伯爵紅茶雪糕茶味好濃,無乜奶味,甜度適中,鍾意歎tea嘅不妨一試。價錢為$22。

店內設少許立食位,仲有USB充電位,好貼心。

仲有呢個影相位添!

品牌不斷發展中,正考慮喺香港多開幾間分店,鍾意飲茶嘅人就要密切留意啦!


鮮茶道
地址:尖沙咀彌敦道100號THE ONE LG1層104號舖


文:Joy

關鍵字
台式飲品
鮮茶道
熊貓珍珠
水果茶
過江龍
尖沙咀
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
6天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
6天前
全城抗炎!屋企都嘆到三層架下午茶 Tea Set外送/外賣自取推介
2020-07-23