有去過韓國釜山嘅朋友，應該都有去過呢間三進魚糕潮聖～呢間係韓國歷史最為悠久嘅老字號魚糕品牌，繼2017年喺新加坡開設首間海外分店後，今個夏天正式進駐尖沙咀K11 MUSEA啦！
「就算沒有利潤， 也要採用良好的原材料。因為全都是給人吃的呀。」呢句說話，係創始人Park Jae-deok先生嘅宗旨，所以全部嘅魚糕唔單止用料新鮮，而且仲有好高嘅魚肉含量。
香港店同樣有多款魚糕選擇，最有韓國味道嘅，當然係呢款成日喺韓國街頭見到嘅小食魚糕湯串，含有九成魚肉，可以食返魚糕最原汁原味。
魷魚魚餅棒，選用韓國產魷魚，由一層炸得香脆嘅麵粉包裹住，口感又幾新奇。
蟹肉花魚餅、香菇魚餅及蝦仁辣椒魚餅。魚糕全部都炸得煙韌彈牙，而且仍然保留到肉汁，蟹肉同香菇味都突出～鍾意食辣嘅朋友可以試試蝦仁辣椒魚餅。
一口魚餅細細件，而且帶微甜，啱晒小朋友食～而甘薯奶酪棒魚餅內餡包括甘薯及芝士，有陣陣甘薯香，而且仲夠酥脆。
食肉獸可以試試呢個混合肉及魚糕嘅烤肉江米塊魚餅，口感較結實，醬汁帶甜。
地址: 尖沙咀梳士巴利道18號Victoria Dockside K11 Musea B2樓B201-13號舖
文：Yanica
相、片：Tom Li