銅鑼灣新開日式居酒屋 期間限定足料海膽杯+白松露壽司
2019-07-15

就算唔係身在日本,假如你工作累鳥,都可以去間居酒屋度飲下酒食下嘢吹下水,放鬆心情咁過一晚。銅鑼灣最近有間新開嘅居酒屋,仲有多款特色嘅期間限定創作料理,例如足料海膽杯同白松露壽司系列。

橙黃色嘅海膽總係特別吸睛,呢個海膽杯嘅面頭就舖滿晒一板板嘅加州海膽同埋三文魚子,下層係黏黏嘅日本長芋(即係山藥),口感清爽,中間仲有吞拿魚刺身添!

另一款期間限定嘅係白松露壽司系列,三款分別係海膽三文魚籽白松露壽司、白松露拖羅蓉卷同白松露帶子壽司,各有特色。白松露味道芬香,但又唔會太濃郁而搶晒風頭,幾款食材嘅原有嘅鮮味都食得到。

點可以唔叫刺身?人多嘅話叫個刺身盛都幾開心,影相打卡好靚仔。油甘魚、牡丹蝦等都係刺身盛嘅常客,而正值盛夏,就梗係要揀埋深海池魚呀、胡椒鯛等嘅時令魚生啦,不時不食嘛。深海池魚又甜又爽,至於胡椒鯛,師傅更特別以柚子預先調製咗個醬汁,食嗰陣唔使再點豉油喇,酸酸咪咪咁好fresh。

餐廳亦有多款串燒、燒物同鍋物等供應,其中廣島蠔鍋可以話係大滿足啊。一鍋入面有4大隻廣島蠔,隻隻都好creamy,連帶個湯底都零舍鮮甜。

 紅酒汁燒菠蘿酸甜醒胃

如果你係lunch去食嘅話,記得要試個牛肉丼飯,因為係午巿限定嚟,夜晚冇㗎~  用上肉味香濃嘅美國牛小排,最唔捨得但都係最精髓嘅位就係一定要篤穿隻蛋,撈勻啲蛋汁食先係王道!


百川居酒屋
地址:銅鑼灣駱克道401-403號榮華商業大廈地下A號舖


文、相、片:Kar


關鍵字
銅鑼灣
居酒屋
海膽
白松露
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【3月生日】優惠情報!有折扣仲有生蠔送
2020-03-03