銅鑼灣新開抵食日本菜小店!少見吉列鰻魚配白咖哩手拉烏冬
2021-06-04

日本菜永遠都係港人No.1,不過要搵間CP值夠高,特別喺港島區都唔係咁易!最近銅鑼灣食街登龍街呢間日本菜重開,無論裝潢定menu都係全新改造過,室內牆上貼滿日本漁市場海報、拍賣海膽盒及玩具,充滿日式居酒屋風味。食物方面都係選用最新鮮嘅食材,店主經駐日本買手喺魚市場揀魚,即日運嚟香港,所以話用平民價錢就食到呢個質素真係少有。

連Menu都盡顯心思,由布織成好有質感。


白咖哩手拉烏冬配吉列鰻魚($88)

呢道菜真係由湯底、烏冬同鰻魚都好有賣點。首先吉列鰻魚喺香港真係好少見,炸皮香脆一入口感受到陣陣魚油香,再慢慢食到醬汁嘅甜味,無諗過原來鰻魚拎去炸會有驚喜,真係會食上癮!另外白咖哩湯底都係自家調製,味道帶甜;手拉烏冬由日本進口,比起平時成日食嘅冰烏冬更煙韌更有口感,而且每一條都掛滿白咖哩。


高級生鮮壽司定食($388

因為魚類及海鮮都係由日本即日直送,所有刺身壽司都好新鮮,呢個壽司定食每日限量50份,有齊所有高級壽司,如牡丹蝦、大拖羅,北海道海膽、金目鯛及灸燒左口魚等。


海膽丼$248)、拖羅丼$168

丼飯方面,海膽丼選用日本拍賣嘅海膽而非一般嘅加拿大海膽,味道更鮮甜;而拖羅丼就好足料,除咗拖羅刺身,更有灸燒拖羅、三文魚籽及生蛋黃,充滿鮮味之餘仲帶有灸燒拖羅嘅油香、三文魚籽鹹香及蛋黃香。


長崎縣吞拿魚刺身拼盤$288

拖羅控必試吞拿魚刺身拼盤!選用長崎縣吞拿魚,一次過可以試晒大拖羅、中拖羅、赤身及吞拿魚腩蓉。


螢光魷魚$98、日式磯煮鮑魚$168/隻

螢光魷魚多數係omakase前菜先會見到,而呢度都有得單點食呀,口感彈牙。日式磯煮鮑魚係師傅每日開舖前用生鮮鮑及秘製醬汁烹調,口感超彈牙,食落有鮮味之餘略帶甜味,非常開胃。


外賣壽司盒基本$780起

想喺家中都食到高質壽司,呢個外賣壽司盒就啱晒,而且用木盒盛載就好似日本人嘅高級便當咁,壽司款式仲有得自行配搭添。


魚鮮生刺身專門店

地址: 銅鑼灣登龍街31-35號地下





文、相: Yanica


關鍵字
銅鑼灣
日本菜
鰻魚
壽司
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
1天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
1天前
榴槤Buffet真的很興奮~ 九龍區酒店7、8月限定榴槤盛宴
2021-06-30
投奔盛夏 7-8月份下午茶推介
2021-07-08