鄧一君尖沙咀賣車仔麵 新派食材x傳統風味(有片)
2019-06-04

童星出身嘅「香蕉仔」鄧一君實現夢想開車仔麵店,仲短時間衝出油麻地去到尖沙咀開分店!新店更大,食物選擇亦由一般車仔麵「升呢」至更豪華版本,仲有甜品懷舊香蕉船,新派同傳統港式風味兼具。
 


一君士多由前藝人鄧一君創立,叫士多係取其咩都有嘅意思。原來開一間車仔麵店係佢嘅夢想之一,因為鄧一君由細到大都非常鍾意食車仔麵,由細細個媽媽帶佢去木頭車仔檔,到而家終於可以自己開一間餐廳賣香港地道風味車仔麵。
 


霸王麵($98)

呢度既有傳統配料,好似豬紅、陳皮魚蛋、鵪春蛋等,亦有新派選擇,最好嘅例子莫過於呢碗霸王麵!一碗有齊鮑魚、廣島蠔、花膠、鮮蝦、冬菇,配料分量多到就嚟見唔到啲麵,都係一百蚊有找。
 


海龍王湯泡飯($108)

迎接夏天,為咗幫大家開胃,尖沙咀店新增泡飯選擇,有海鮮湯配半隻波士頓龍蝦、廣島蠔、鮮蝦、魷魚同青口等配料,分量十足。
 


鄧一君仲介紹一個食法:將店家嘅秘製麻辣醬加到海鮮湯當中,令鮮甜嘅湯底增加幾分麻辣刺激更滋味!
 


牛腩撈麵($58)

另外亦有撈麵選擇,鄧一君自己就比較鍾意牛腩撈麵同豬手撈麵($58),因為牛腩同豬手兩款都係佢鍾意嘅食材。鍾意有咬口嘅朋友記得揀粗麵,口感比幼麵彈牙。
 

更多【名人店】:
1. Chill嘆週末!黃宗澤蠔吧新推任食生蠔Brunch
2. A4和牛沾麵配雞白湯 李泳豪旺角新開拉麵屋
3. 楊明夥拍朋友開燉湯店 為都市人原盅燉無味精靚湯

 

香蕉成熟船($48)

取名靈感嚟自電影《記得...香蕉成熟時》,本身香蕉船呢款甜品就好有懷舊Feel,最大亮點就係鄧一君特別搵返嚟嘅遮仔!三球唔同顏色嘅雪糕同水果味道平實,食嘅其實係一種童年回憶嘅風味。
 


菠蘿冰(跟餐$15,原價$25)

飲品亦有懷舊選擇,原來鄧一君細個覺得冰室嘅菠蘿冰菠蘿太酸,同甜嘅冰水唔夾。自己開店就決心同師傅一齊改良配方,變成而家既咬到粒粒菠蘿肉,味道平衡又有氣泡口感嘅版本喇。
 


唔單止供應嘅食物款式新舊並存,餐廳裝修亦糅合懷舊同摩登元素。鄧一君特別同香港品牌紅A合作,燈罩、櫃、甚至係客人坐嘅膠櫈都係紅A出品。
 


而環境就延續油麻地店嘅屋台概念,走日式簡潔風格。鄧一君指因為佢希望將日本餐廳嘅乾淨、整潔風格帶到餐廳當中。而且以原木顏色為主,感覺溫馨,係附近唔少打工仔嘅飯堂之選!
 







一君士多
地址:尖沙咀堪富利士道6號地舖




文:Cathy
相、片:Tom Li

關鍵字
尖沙咀
車仔麵
撈麵
香蕉船
鄧一君
一君士多
名人店
開飯星探
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
1天前
RubberBand成員開石燒牛扒專門店 8款靚牛+自家調製鮮甜燒汁 最平$80
2019-06-18
炎夏感bye-bye!6至7月下午茶推介
4天前
5月份好評餐廳十強
2019-06-14
經典扒房中環新址重開 即席分切招牌特級燒牛肉 銀色餐車再現
2019-06-04