迪士尼新推「嚐素」菜式 打卡必點米奇新豬肉丸湯、香煎新豬肉薯餅(有片)
2019-04-17

近年多咗朋友都響應Green Monday,甚至係每日都「跑素」,所以唔少人放假都會去嘅香港迪士尼最近亦新增「嚐素」健康菜式,以唔同植物肉入饌,而且有齊中菜同西餐。唔單止令素食人士多個選擇,亦係畀平時未有食素習慣嘅人、或者小朋友多一個接觸新派素食嘅機會!
 

晶荷軒 打卡必點米奇肉丸湯


花旗參米奇肉丸湯

迪士尼其中兩間度假酒店共三間餐廳日前推出全新「嚐素」菜式,中菜代表就有晶荷軒,菜式以新豬肉(Omnipork)為主。好似呢份花旗參米奇肉丸湯就好有驚喜,師傅特別將新豬肉釀入冬瓜當中,造成米奇大頭形狀!湯底亦係坊間少見嘅花旗參湯,以花旗參、甘筍、馬蹄、竹蔗、羅漢果、冬菇等熬成清甜嘅上湯,影相夠搶眼之餘仲好啱夏天享用。
 


生煎菜肉窩貼

窩貼係唔少人嘅Comfort Food之一,新豬肉可以模仿真豬肉嘅味道同口感,特別加入白菜,菜汁令窩貼咬落更Juicy,模仿埋肉汁效果!而且新豬肉零膽固醇、無抗生素、無激素,食多幾件都唔怕有罪惡感。
 


五柳素肉千層

千層其實係一層茄子、一層沙葛、一層新豬肉、一層沙葛、一層茄子咁組成,所以食落既有新豬肉嘅肉味,又有沙葛同茄子爽脆同柔軟嘅口感,層次豐富。金黃香脆嘅千層配上甜酸汁,係小朋友都會樂於嘗試嘅素菜。
 


松子欖菜肉碎炒銀絲

用熱辣辣石鍋奉上自然係加分點,粉絲加上欖菜同新豬肉碎嘅香味亦自然更突出。值得一提嘅係今次師傅為咗配合「嚐素」主題,調味方面亦無加任何雞粉或蠔油,盡量利用食材原味配搭出唔同口味。
 

芊彩餐廳 David推介香煎新豬肉薯餅


(左)Green Monday聯合創辦人楊大偉,(右)香煎新豬肉薯餅

Green Monday聯合創辦人楊大偉David都有試今次嘅「嚐素」菜式,佢最鍾意嘅就係芊彩餐廳呢碟香煎新豬肉薯餅,以日本大阪燒為靈感,將新豬肉混合薯仔絲再煎,非常香脆。另一亮點係薯餅上面黃色嘅唔係生蛋黃,而係藏紅花素蛋黃醬,同樣有流心效果,亦增加味道層次。
 


植物雞米紙捲·素凱撒汁

呢碟米紙捲相對就比較清新,半透明煙韌米紙包住各式蔬菜同植物雞肉,口感爽脆味道清新,點埋素凱撒汁更醒胃,做頭盤就最啱。
 

華特餐廳 首推Beyond Burger米堡


烤未來漢堡扒米堡伴燴雜菜

未來漢堡(Beyond Burger)喺香港先後都推出過唔少配搭同口味,不過配搭純素米堡就係第一次!口感同味道特別之餘亦係Gluten free,對麩質過敏嘅朋友都可以放心享用。
 


素肉腸串燒伴青瓜乳酪·雜菜沙律

而有地中海特色嘅素肉腸串燒就選用未來熱狗(Beyond Sausage),烤焗後配以青瓜乳酪同雜菜沙律,兼顧香口同清爽兩種口味。未來漢堡同未來熱狗都由美國食物科研公司 Beyond Meat 研發,零膽固醇,無激素、無抗生素及非基因改造。
 


未來香港迪士尼亦希望推廣至更多酒店餐廳,甚至園區當中,將更多素食同健康選擇帶畀大家。適逄每年4月都係全球迪士尼樂園嘅「地球月」,不妨趁呢個機會嘗試以植物肉代替動物肉,更健康之餘,同時為環保出一分力。
 




文、相、片:Cathy

關鍵字
迪士尼
Green Monday
晶荷軒
芊彩餐廳
華特餐廳
米奇肉丸湯
Omnipork
Beyond Burger
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
3天前
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!衛生保障 推行防疫措施餐廳一覽
2020-02-07
美國人氣肉桂卷抵港!煙韌原味/朱古力/焦糖胡桃卷(有片)
2020-02-06